a1Eze 40.3, Zek 2.1-2; 2 Luk 21.24; 4 Zek 4.3,11-14; 61 Kiŋ 17.1, Eks 7.17-19, 1 Sml 4.8; 7 Dan 7.7,21, Ind 13.5-7, 17.8; 8 Ais 1.9-10; 11 Eze 37.10; 122 Kiŋ 2.11; 13 Ind 6.12, 16.18
c15Eks 15.18, Dan 2.44, 7.14,27; 18 Sum 2.5, 110.5, 115.13; 19 Ind 8.5, 16.18,21

Revelation of John 11

Anutugö jitŋememe yahötŋan keuŋi naŋgöba jiyohot.

Mewö jii möta kinbiga Suep garata miaŋön dop alalgö öröpŋi jehot ewö mi niŋgiba kewö jim kutum niŋgiyök, “Gi mönö wahöta anda Anutugö jöwöwöl jike aka miaŋgö jöwöwöl altaŋi mi dop öröp (rula mesa) miaŋön dopŋi ala oyoŋman. Mewöyök miaŋgöreŋ öŋgöba Anutu möpöseiba köulukŋini alakzei, mönö mi kewöta jaŋgöŋini oyoŋman. Jöwöwöl jike dopŋi ala miaŋgöreŋ sombem yaigepŋi mi mönö oŋgita mosötman. Mi kian kantri yeŋgöra al eŋgigetka ahöiga yeŋön siti töröŋi mi köiŋ 42 miaŋgö dop tiba anda kamakŋe. Miaŋgöra sombem yaigepŋaŋgö dopŋi mi kude oyoŋman. Nöŋön jitŋememe yahötni melaim etkiba keuni naŋgöba jimahotkö kukösumŋi al etkibiga asuhumahot. Asuhuba wösöbirikö maluku sanjöp ewö mem aŋguba liliköba (gölme gwakötak ariba) silim 1260 nalö miaŋgö dop kezapqetok keu nup memba malmahot.”

Oil ip yahöt aka lambe dum tatatŋi yahöt gölmegö Kembugö wösöŋe kinjahori, mi mönö meleŋda eta asuhuba dangunu ewö kinda nöŋgö könani naŋgöba jiba malmahot. Kunöŋ me kunŋan etkum mizit ak etkimamgö mötza ewö, könöp bölamnöŋ mönö numbuŋireyök eta kerökurupŋiri eŋgohoiga ayuhumakŋe. Kunöŋ me kunŋan etkumamgö mötza ewö, i mönö köna mewöŋanök miaŋön qeyohot kömuma.

Suepkö kousuŋi jöhöbitkö kukösumŋi mi yetköreŋ ahöiga kezapqetok keu jim sehimahori, nalö miaŋgö dop kie qahö yöhöma. Kukösumŋiran o jeŋi pakpak mewöŋanök dop köliga miaŋön ölöp o pakpak meleŋ eŋgigetka sep akŋe. Mewöŋanök kukösumŋiran öŋgöŋgöŋi ahözawaŋgöra aka sihimŋiran jimawaŋgö dop ölöp jigetka lömböt kanjamŋinambuk könaŋi könaŋi asuhuba gölme mem böliba ambazip eŋgumakŋe.

Anutugö keuŋi naŋgöba jim teköyohotka ömewöröme yeŋgö löm dutŋi qahö miaŋgöreŋök jemnemba kunöŋ wahöta bim qem etkiba luhut ala etkuiga kömumahot. Kömuyohotka qamötŋiri siti qetbuŋaŋambukö köna namŋe etkömosötketka laŋ ahömahot. Siti miaŋgö qetŋi tölapŋi mi Sodom aka Ijipt qerakze. Kembuŋiri Jisös i mönö mewöyök miaŋgöreŋ maripomnöŋ qegetka kömuyök. Qamötŋiran laŋ ahöyohotka ambazip pakpak mi etkehakŋe. Gölmenöŋ löm köl etkibingö jiba jöhöme. Mewö öne laŋ ahöyohotka ambazip kantriŋi kantriŋi, kambuŋi kambuŋi, bem isikŋi isikŋi keu tandökŋini nanŋik nanŋik jimakzei, yeŋön mönö qamötŋiri mi silim karöbut aka bahöŋi kun miaŋgö dop uba etkehiget.

10 Kezapqetok azi yahöt yetkön ambazip gölme qakŋe maljei, mi uru kuŋgum eŋgiyohotka miaŋgöra sihimbölö önöŋi qahö miwikŋaiba malget. Miaŋgöra kömuyohotka qamötŋiri etkekŋei, miaŋgöreŋ mönö köiraŋ ala saureŋ unduba nem söŋgaip pati ala nanŋini kalem könaŋi könaŋi aŋgubingö alget anda kama. 11 Silimŋi karöbut aka bahöŋi kun mi teköiga Anutunöŋ söŋgörö ösum söŋgöröŋire ui geiga guliba wahöta köŋgep kinohot. Wahöta kinohotka ambazipnöŋ etkeka töwöratiba jönömŋini unduiga sömbuŋini mötket. 12 Köŋgep kinohotka Suepnöhök qet köhöikŋi kun kewö qeta jii mörohot, “Iŋiri mönö kewö korohot.” Mewö jii möta kousu uruŋe wahöta Suepnöŋ öŋgöyohotka kerökurupŋiran öne etkeka nemböŋini teköiga kinget.

13 Könaŋiran gölme mosöta öŋgöyohotka nalö miaŋgöreŋök kenöŋ tandökŋi sohosohoŋi gila siti bahöŋi 10% (bahöŋi tenöhök mohot) miaŋgö dop kusuba köndeŋmöndeŋnök. Köndeŋmöndeŋda ambazip 7.000 miaŋgö dop eŋgui kömuget. Ambazip qahö kömugeri, mieŋön mi eka töwöratiba sömbuŋini möta Suepkö bemŋi Anutu i ösumŋaŋgö möpöseim waŋgigetka qetbuŋaŋambuk ahök.

14 Wölzik yei qet kanjamŋambuk yahötŋan mewö teköyökmö, mötket, wölzik yei qet karöbutŋaŋgö ölŋan mönö zilaŋ asuhuba qakŋine öŋgöma. Mewö. a 

Suep garata 7:ŋan tömunŋi qainŋi kun uyök.

15 Suep garata 7:ŋi yaŋön tömunŋi qainŋi kun (biugel) uyök. Mi uiga Suepnöŋ keu köhöikŋanök eraum mötketka kourukŋini mötpi kewö jiget, “Ayop, nanine Kembunini aka yaŋgö Amötqeqe Toŋi Kraist yetkön mönö gölme pakpak galöm köl eŋgibitkö kukösumŋi mi lökŋanök buŋa qem aŋgum teközahot. Yaŋön mönö nalöŋi nalöŋi galöm köl eŋgiba malma, ee-aa-ee. Galömkölkölŋan mönö nalö kunöŋ qahö teköma, ee-aa-ee.” 16 Mewö jiget mötpiga Anutugö jitŋememe 24 Anutugö jemesoholŋe jakömbuak dumŋine tatzei, yeŋön mönö eta bamgöba sipköba Anutugö waikŋi memba möpöseim waŋgiget. 17 Möpöseim waŋgiba kewö jiget,

“O Kembu Anutu kukösum pakpakö Toŋi, göŋön mönö mala kotnöŋ aka mal köhöizan.
Göŋön kukösumgi öŋgöŋgöŋi memba könahiba gölme pakpak galöm köl eŋgiba kiŋ kembuŋina aka malman.
Miaŋgöra neŋön mönö möpöseiba saiwap jim gihizin.
18 Kian kantriŋi kantriŋi yeŋön irimŋini seholiiga kazik ak gihiba malgetmö, göhö kazik nalögan mönö dölkewöŋe kam kuŋguba ahöza.
Göŋön nalö kewöŋe kömukömuŋi yeŋgö keuŋini kewöta jim teköm eŋgiman aka nangi ambazipurupki töwaŋini eŋgiman.
Kezapqetok ambazip aka ambazip sarakŋi tosatŋi göhö nupki memba malgeri aka öŋgöŋgöŋi eretŋi göhö qetki ayuhubapukö keŋgötŋini möta malgeri, i mönö töwaŋini eŋgiman.
Mewöyök tosatŋan ambazip eŋguba kantri köndeŋda malgeri, mi mönö köndeŋ eŋgiman.” Mewö möpöseiba jiget.
19 Miaŋgö andöŋe Suepnöŋ aŋaŋiiga Anutugö möpömöpösei jikegö (tempöl) naŋguŋan tali ekiga jike uruŋe Anutugöreŋ jöhöjöhö areŋ bokis aködamunŋambuk miaŋön ehekŋi ahöyök.
Anutugöreŋ jöjöpaŋ keu 10 aka jimkutukutu tosatŋi mi köt ilaŋan ohoba bokis miaŋgö uruŋe alget tari galöm kölakze.
Suepnöŋ aŋaŋiiga nalö miaŋgöreŋök wölbilik aliga wölpöndaŋ aka giŋgururuŋ qeriga möral. Kourukŋi kourukŋi mi mötpiga kenöŋ memba kie römbum giliga ais kötŋi ketaŋi ketaŋi etket. Mewö. c 

Copyright information for `BMU