a1Jer 51.13;
b2Ais 23.17, Jer 51.7; 3 Ind 13.1;
c4Jer 51.7;
d8Dan 7.7, Ind 11.7, Sum 69.28;
e12Dan 7.24

Revelation of John 17

Ambi kunöŋ jemnembagö qakŋe tari ehal.

Suep garata 7 qambi 7 mi memba kingeri, yeŋgöreŋök kunŋan kaba nöŋgöra keu kewö jiyök, “Gi mönö kanöŋga köna ketaŋaŋgö ambi qetbuŋaŋambuk o gwötpuk mieŋgö qakŋine tatzawi, mi kondel gihimam. Anutunöŋ keuŋi kewöta likepŋi meleŋni qakŋe öŋgöi malja. Gölmegö kiŋ kembuŋi kembuŋi yeŋön yambuk serowilin aka malget. Könagesöŋinan gölmenöŋ maljei, yeŋön mönö mewöyök ambi miaŋgö serowilinŋaŋgöra aka uruŋini wahöta sohoiga kahalalom aket. Wain o nemba eŋololoŋ ahakzei, mönö miaŋgö dop könahiba sero yoŋgorö aka mala kahapmahap aket.”

Mewö jiiga Uŋa Töröŋan nömeiga alburupŋan qakne öŋgöiga Suep garata miaŋön noaŋgiriga gölme qararaŋkölkölŋe aŋgoral. Miaŋgöreŋ aŋgota ambi kun jemnemba pisikŋi pötpöt yaŋgö qakŋe tariga ehal. Jemnembagö sileŋe mepaqepaik qetŋi qetŋi ohogetka kokolak qeiga nöröpŋi 7 aka ilikŋi 10 mewö kinök.

Ambi miaŋön opo sörö pisikŋi gugakgugak aka pisikŋi pötpöt mi löŋgöta tarök. Aködamunŋi goul, jamönjiŋ ölŋinambuk aka kösasorom tosatŋi miaŋön meŋölöm aŋguiga tandökŋan kölköl-bilikbilikŋambuk ahök. Böröŋe goul qambi memba taröhi, mi serowilin aka malöhaŋgö aŋgöjörakŋi imbiloŋloŋambuknöŋ kokolak qeqeŋa. Ambi miaŋgö mesoholŋe qetŋi tölapŋi mi kewö ohogetka ahöyök, “Babilon qetbuŋanambuk, gölmegö köna ketaŋi ambazip aka aŋgöjörak imbiloŋloŋambukö namŋini.” Qetŋi mewö ahöiga Anutugö ambazip sarakŋan Jisösgö könaŋi naŋgöba böŋ qeba kinda jiba malgeri, mi eŋguba sepŋini nemba miaŋgöra kahalalom ahöi ehal. Mi eka aurum tililiŋgöyal.

Aurum tililiŋgöbiga Suep garatanöŋ nöŋgöra keu kewö jii möral, “Gi mönö denöwögöra aurum tililiŋgözan? Nöŋön ölöp ambi kiaŋgö könaŋi tölapŋi indel gihimam aka jemnemba nöröpŋi 7 aka ilikŋi 10 ambi mi bisimakzawi, yaŋgö könaŋi tölapŋi mi mewöyök indela jim miwikŋaim gihimam. Jegi meleŋniga jemnemba ekzani, yaŋön mutuk malökmö, nalö kewöŋe jebuk qahö malja. Yaŋön ömewöröme yeŋgö löm dutŋi qahö miaŋgöreŋök guliba wahötmapmö, Kraistnöŋ kaköm waŋgiiga könöp sianöŋ gema. Anutunöŋ Suep gölme miwikŋaim etkiyöhi, nalö miaŋgöreŋök könahiba gölmenöŋ mala kotketka qetŋini malmal köhöikŋaŋgö papianöŋ qahö ohoget ahözawi, ambazip mieŋön mönö jemnemba eka aurume. Jebuk malökmö, nalö kewöŋe jebuk qahö malja aka könaŋgep kunbuk guliba asuhumawi, miaŋgöra mönö aurume.

“Nini keu ki möt asaribingöra möringa mötkutukutuŋan kewö ahöza: Nöröpŋi 7 mi ambinöŋ kunduŋi 7:gö qakŋine tatzawi, mönö kunduŋi mieŋgö söpsöpŋi akze. 10 Nöröpŋi 7 mi mewöyök kiŋ kembu 7 mieŋgö kaisöpsöpŋi akze. Yeŋgöreŋök 5 lök kömumba etketka 6:ŋi yaŋön mala ambazip galöm köl eŋgimakza. Qöndökŋan biaŋ asuhumawaŋgö dop akza. Yaŋön asuhumawi, miaŋgöreŋ mönö nalö töröpŋi kukösum qakŋe kinmawaŋgö dop akŋa. 11 Jemnemba malökmö, nalö kewöŋe qahö toroqeba maljawi, yaŋön 7 yeŋgöreŋök kun akza. Yaŋön kunbuk guliba nanŋak kiŋ kembu jaŋgöŋi 8 akŋa. Mewö akŋapmö, Kraistnöŋ köndeŋ waŋgiiga ayuhuba könöp sianöŋ gema.

12 “Ilikŋi 10 eŋgekzani, mi mönö kiŋ kembu 10 mieŋgö kaisöpsöpŋini akze. Yeŋön qahö könahiba ambazip galöm köl eŋgimakzemö, Anutunöŋ könaŋgep kukösum eŋgiiga kiŋ kembu ewö akŋe. Mewö aka jemnembabuk aua mohotkö dop ambazip galöm köl eŋgiba malme. 13 Kiŋ kembu 10 mieŋön mötmöt areŋ mohot miyök wuataŋgöba jemnemba naŋgöba kukösumŋini i waŋgigetka malma. 14 Ösumŋini mewö mindiriba Lama moröŋi tuarenjoŋ aka bim aumemö, Lama moröŋan mönö luhut al eŋgiiga etme. Yaŋön kiŋ yeŋgö Kiŋini aka azi kembu yeŋgö Kembuŋini akza. Yaŋön neŋgohola möwölöhöm neŋgiiga yambuk pöndaŋ kinda malbini, neŋön mönö mohotŋe luhut al eŋgiba köiraŋ kölbin.”

15 Suep garatanöŋ keuŋi mewö jiba toroqeba kewö jii möral, “Köna ketaŋaŋgö ambi ketaŋan o gwötpuk mieŋgö qakŋine tariga eŋgek teközani, o mi ambazip kantriŋi kantriŋi mieŋgö kaisöpsöpŋini akze. Yeŋön kambuŋini aka bem isikŋinaŋgö dop likeplikep tat angetka sileŋini könaŋi könaŋi aiga keuŋini tandökŋi murutŋi murutŋi jimakze. 16 Jegi meleŋniga ilikŋi 10 eŋgekzani, yeŋön mönö ösumŋini jemnembabuk mindiriba köna ketaŋaŋgö ambi mi kazik ak waŋgigetka kewö asuhuma: Yeŋön öröyuaiŋi pakpak kiom qegetka piromŋi aiga opo söröŋi köteköm tekögetka sile aukŋeyök aiga busuŋi nemba sihitŋi könöpnöŋ ohogetka jem teköma.

17 “Mewö asuhumawi, mi Anutunöŋ kiŋ kembu mieŋgö uruŋini kuŋguba sölölöhöm eŋgiiga urumohot aka mindiriba akŋe. Anutugö mötmöt areŋi mönö mewö wuataŋgöme. Miaŋgö dop kukösumŋini jemnemba waŋgigetka ambazip galöm köl eŋgiba malma. Mewö maliga Anutugö keuŋan ölŋambuk akŋawi, nalö miaŋgöreŋ teköma. 18 Ambi tari ekzani, mi siti qetbuŋaŋambuk toŋan gölmegö kiŋ kembuŋi kembuŋi galöm köl eŋgimakzawi, mönö kiŋ miaŋgö söpsöpŋi akza.” Mewö. a, b, c, d, e 

Copyright information for `BMU