a2-3Eze 1.26-28, 10.1
b5Eks 19.16, Ind 8.5, 11.19, 16.18, Eze 1.13, Ind 1.4, Zek 4.2;
c6-7Eze 1.22,5-10, 10.14; 8 Eze 1.18, 10.12, Ais 6.2-3

Revelation of John 4

Jeni meleŋniga kunöŋ Suep jakenöŋ tariga ehal.

Miaŋgö andöŋe jemeleŋ kunbuk asuhuiga Suep miri naŋguŋi kun aŋaŋiiga ehal. Ekiga imbi mutuk tömun qainŋi kun (biugel) ewö keu jiiga mörali, yaŋön mönö suariba kewö jiyök, “Gi mönö kewö kotnöŋga andöŋe yuai asuhumawi, mi kondel gihimam.”

Mewö jiiga miaŋgöreŋök Uŋa Töröŋan nömeiga alburupŋan qakne öŋgöiga yuai kewö ehal: Suep miri uruŋe jakömbuak dum ahöiga kunŋan miaŋgöreŋ tarök. Taröhi, yaŋgö jemesoholŋaŋgö asakŋan mönö eröknam me jamönjiŋ qetŋi jaspö aka wale bönbönŋi me köt qetŋi karnilian miaŋgö dop gilikbilikŋambuk asariba ahöyök. Kiam nesilam kun kulem mundaŋi mumunene kamböŋi me jamönjiŋ qetŋi emerald ewö miaŋön jakömbuak dum mi lökŋanök liliköba töŋgönŋi göröhiba ahöyök. a 

Dum bohonŋi liliköba dum 24:ŋan tatze.

Jakömbuak dum tosatŋi 24 mieŋön dum bohonŋi mi liliköba tatketka mieŋgö qakŋine Anutugö jitŋememeurup 24 tatket. Yeŋön malukuŋini tuat lalamŋanök öluŋ geiga nöröpŋine goul ila jalö kunduta tatket. Dum bohonŋi miaŋgöreŋök wöl bilikbilik jesöŋgö asariiga giŋgururuŋ asuhuiga imbi wölpöndaŋgö ötöŋ kourukŋi ewö möral. Dum bohonŋaŋgö wösöŋe tos kiwa asakŋi 7 jeba asariba kinget. Kiwa 7 mi Anutugöreŋ uŋa bohonŋi 7 akze. Mewöŋanök jakömbuak jake wösöŋe yuai gilikbilikŋambuk köwet ewö ehal. Mi kirin jöhanŋi jöhanŋi kölköl-bilikbilikŋinambuk meleŋda asarimakzei, mönö miaŋgö dop asariyök. Jake bibiŋe dum liliköba bem jembon 4 kinget. Andöŋini aka wösöŋini mi jeŋinanök dop köliga kinget.

Bem jembon mutukŋan laion sömbup ewö ahök. Alaŋan bulmakau aziŋi ewö ahök. Alaŋiri kungö kaisoŋgolomŋi mi azi jesöŋgöröŋaŋgö tandök ahök. Alaŋini 4:ŋan tukapkap bölbölgömakzawaŋgö tandökŋa ahök. Bem jembon 4 mohot mohot yeŋgö ginginŋini 6 pakpak ahöm eŋgiyök. Sileŋini lökŋanök aka ginginŋini bapŋe mewöyök jekötŋinanök dop köl eŋgiiga kinget. Kinda suŋgem silim liŋet kewö qörörök kölakze,

“Kembu Anutu kukösum pakpakö Toŋi göŋön mönö töröŋi aka töröŋi aka töröŋanök akzan.
Malmal Toŋi göŋön mönö möpŋaŋgö möpŋeyök mala kota maljan aka kunbuk liliŋgöba asuhuba mal öŋgöman.”
Bem jembon 4 mieŋön mönö mewö möpömöpösei liŋet kölakze. Kunöŋ jakömbuak dumnöŋ kinda nalö teteköŋi qahö mal öŋgöba malmawi, i aködamun qetbuŋa al waŋgiba saiwap jimakze. 10 Mewö ahakzeaŋgö dop Anutugö jitŋememe 24 mieŋön eta kun jakömbuak dumnöŋ tatzawi, yaŋgö jeŋe simin köla sipkömakze. Kunöŋ nalö teteköŋi qahö mal öŋgöba malmawi, yaŋgö waikŋi memba möpöseim waŋgimakze. Möpöseim waŋgiba ila jalöŋini qeköba jakömbuak dum wösöŋe ala kewö jimakze,

11 “O Kembu Anutunini, göŋön öröyuai pakpak miwikŋaim eŋginöŋ. Göhö jitsihitkan nam köl eŋgiiga letota malmal miwikŋaiba malje. Miaŋgöra aködamun qetbuŋa mi al gihiba saiwap jim gihimakzin. Göŋön mohotŋan mönö möpöqöpösei pakpak aŋgön kölmanaŋgö dop akzan.” Mewö. b, c 
Copyright information for `BMU