a1Jer 49.36, Dan 7.2, Zek 6.5; 3 Eze 9.4,6
b14Dan 12.1, Mat 24.21, Mak 13.19;
c16Ais 49.10;
d17Sum 23.1, Eze 34.23, Sum 23.2, Ais 49.10, 25.8

Revelation of John 7

Israel ambazip 144.000 mi Anutunöŋ asö köl eŋgima.

Miaŋgö andöŋe Suep garata 4 eŋgekiga gölmegö waŋgömŋi 4 miaŋgöreŋ kinget. Yeŋön gölmegö luhut Toŋi bohonŋi 4 mi jöhöm eŋgiba aŋgön kölget. Luhutnöŋ gölme qakŋe me köwet qakŋe laŋ gilbapuköra me ip kunŋan qebapuköra mönö Toŋi 4 mi böröŋinan memba jöhöba kinget. Anutunöŋ Suep garata 4 mi gölme aka köwet köndeŋ eŋgibingö kukösumŋi eŋgiiga gölme waŋgömŋine kinget. Mewö kingetka eŋgehiga Suep garata kunöŋ wehön kotkotŋeyök asuhuba wahöri ehal. Yaŋön malmalgö Toŋi Anutugö muŋgem asö öröpŋi galöm köla kaba Suep garata 4 yeŋgöra köhöikŋanök qerök.

Qeta keu kewö jiyök, “Iŋini mönö gölme me köwet mi zilaŋzilaŋ kude köndeŋ etkime aka ip mi kude ayuhum eŋgime. Mi qahöpmö, mönö mambötketka mutuk zilaŋök Anutuninaŋgö muŋgem asöŋi mi nupŋi memakzei, yeŋgö mesoholŋine mekötahöm eŋgibin. Mi mutuk kösöba mekötahöm eŋgiingun andöŋe mi ölöp köndeŋda ayuhume.” Mewö jiiga Anutugö muŋgem asöŋi mi Israel ambazip tosatŋi yeŋgö mesoholŋine kösöm eŋgiget. Kunöŋ yeŋgö jaŋgöŋini jiiga kewö möral: Israel ambazip kambu 12 pakpak mieŋgöreŋök mindiriba ambazip 144.000 mi kösöm eŋgiget.

Israel kambu mohot mohot mieŋgöreŋök 12.000 mewö mewö kösöm eŋgiget. Juda kambugö 12.000, Ruben kambugö 12.000, Gad kambugö 12.000, Aser kambugö 12.000, Naftali kambugö 12.000, Manase kambugö 12.000, Simeon kambugö 12.000, Liwai kambugö 12.000, Isakar kambugö 12.000, Zebulun kambugö 12.000, Josef kambugö 12.000 aka Benjamin kambugö 12.000. Mewö mewö asö köla mekötahöm eŋgigetka mindiriba 144.000 ahök. Mewö. a 

Oyaeŋkoyaeŋ malmeaŋgö kambu ketaŋi ehal.

Miaŋgö andöŋe kambu jitŋi buburatiŋi jaŋgöŋini kude oyoŋoyoŋgö dop mi ehal. Ambazip mi kambuŋinaŋgö dop, bem isikŋinaŋgö dop, kantriŋinaŋgö dop aka keu jöl jijiŋinaŋgö dop tokoba jakömbuak dum aka Lama moröŋi yetkö wösöŋire kinget. Miaŋgöreŋ kinda maluku köröpŋi tuatŋi köteköm aŋguget geiga böröŋinan nip sinŋaŋgö böröŋi memba kinget. 10 Mi memba kinda köhöikŋanök qeta kewö jiget, “Anutuninan jakömbuak dumŋe tatzawi aka Lama moröŋi yetkön mönö mem letot neŋgiyohotka oyaeŋkoyaeŋ akzin.”

11 Mewö qeta jigetka Suep garata pakpak yeŋön jakömbuak dum kösutŋe areŋnöŋ kinda Anutugö jitŋememe aka bem jembon 4 mi liliköm eŋgiget. Mewö kinda jakömbuak dum wösöŋe bamgöba eta simin köla Anutu waikŋi memba möpöseim waŋgiget. 12 Anutu möpöseim waŋgiba kewö jiget, “Keu mi ölŋa! Anutu gi mönö kötuet, asakmararaŋ aka mötkutukutu öŋgöŋgöŋaŋgö Toŋi akzan. Neŋön gi möpöseim gihiba qetbuŋagi jim qarimakzin. Anutunini, göŋön ösum-mumu aka kukösum Toŋi akzan. Neŋön nalö dop mewö jim köhöininga Toŋi mi teteköŋi qahö mal öŋgöba malman. Keu mi ölŋa!”

13 Mewö möpöseiba jigetka Anutugö jitŋememe yeŋgöreŋök kunŋan kewö jiba qesim niŋgiyök, “Ambazip maluku köröpŋi tuatŋi löŋgöta kinjei, mi daŋön? Mi mönö denikeyök kaba mewö tokoba kinje?”

14 Qesim niŋgiiga kewö meleŋ waŋgial, “O ketaŋamni, mi nöŋön qahö mötpiga nangok mötzan.” Mewö meleŋ waŋgibiga jitŋememe yaŋön kewö jii möral, “Kahasililiŋ keta bölökŋaŋgö sutŋeyök kotkeri, yeŋön mönö mia akze. Lama moröŋaŋgö sepŋan mönö opo malukuŋini saŋgoŋni tuariiga malget. 15 Mewö malgeraŋgöra aka Anutugö jakömbuak dumŋi mesohol köla suŋgem silim möpömöpösei jikeŋe (tempöl) mala Anutugö nupŋi memba malme. Mewö malgetka jakömbuak dumŋe tatzawaŋön mönö opo koumŋi möröreŋgöba köl turum eŋgiiga malme.

16 “Mewö malgetka nalö kunöŋ nenegö me ogö qahö kömume. Wehönöŋ me yuai könöpŋambuk kunöŋ mönö qahö eŋgohotirima. 17 Kewögöra oyaeŋkoyaeŋ malme: Lama moröŋan jakömbuak jake bibiŋe tata galöm köl eŋgiba eŋguaŋgiriga malmal köhöikŋaŋgö o töwatŋaŋgö jeŋe anakŋe. Anutu nanŋak jeŋineyök imbilŋini pakpak kutuiga teköma.” Mewö. b, c, d 

Copyright information for `BMU