a2Jen 19.28;
b3Eks 10.12-15;
c4Eze 9.4;
d6Job 3.21, Jer 8.3;
e7Joel 2.4;
f8Joel 1.6;
g9Joel 2.5
h13Eks 30.1-3;
i20Sum 115.4-7, 135.15-17, Dan 5.23

Revelation of John 9

Suep garata 5:ŋan tömunŋi qainŋi kun uyök.

Suep garata 5:ŋi yaŋön tömunŋi qainŋi kun (biugel) uiga ekiga suepnöhök seŋgelau kun teköba gölmenöŋ erök. Eriga kunöŋ ömewöröme yeŋgö löm dutŋi qahö miaŋgö ki moröŋi mi seŋgelau Toŋi mi waŋgiyök. Mi waŋgiiga öme löm dutŋi qahö miaŋgö önunŋi musuliga miaŋgöreŋök köwak ketaŋi söŋgok imarurubuk jeba köwak wahörakzawi, mönö miaŋgö dop kundumgöba wahöta wehön jeŋi esuhuba luhut köwaknöhök dop köl teköyök. Köwak miaŋgö uruŋeyök gawötŋi gawötŋi mosöta gölmenöŋ kaŋgotketka Anutunöŋ kukösum eŋgiyök. Kukösum mi skorpion (omeqaqa) yeŋgöreŋ kukösum tandök ewö ahök.

Mi eŋgiiga Anutunöŋ kewö jim kutum eŋgiyök, “Iŋini mönö gölmegö yuai görökŋi gwözözak me ip mewöŋi mi kude ayuhum eŋgimemö, ambazip mesoholŋine Anutugö muŋgem asöŋini qahö miyök mönö mem bölim eŋgime.” Mewö jim kutum eŋgiyök. Anutunöŋ gawöt mi kukösum eŋgiiga ambazip eŋgöhögetka köiŋ 5:gö dop sihimbölö önöŋi qahö mötket. Sihimbölö mi skorpion (omeqaqa) azi yöhöiga sihimŋi mötzawi, mönö miaŋgö dop. Sihimbölö mewö mötketmö, Anutunöŋ aŋgön köl eŋgiiga mem kömum eŋgimeaŋgö kukösumŋi mi gawöt yeŋön qahö memba öne eŋgöhöget. Ambazip eŋgöhögeri, yeŋön nalö miaŋgöreŋ kömumbingö jarumemö, kömup mi qahö miwikŋaiba kömumbingö osime. Kömumbingö möta qemjeŋ qememö, kömupkö kondotkondot Toŋan mönö kungen anma.

Gawöt eŋgekiga mieŋön hos yarögöra aködamunŋinambuk jöjörömakzei, mönö mieŋgö dop aket. Nöröpŋine yuai mundaŋi goul ewö kölgeri, mi ila jalö tandöktandök ahök. Jemesoholŋinan ambazip jemesohol tandök ewö aket. Gawöt mieŋgö nöröp jupŋini mi gwala ambi yeŋgö nöröp jup ewö aket. Gawöt jitŋinan laion sömbupkö jitŋi ewö aket. Göwaŋgöwaŋini (töptöp maluku) mi ain suman ewö tandök aket. Ginginŋini qegetka ötöŋ asuhui mörali, mi kewö: Hos sehisehiŋi yeŋön yarögö kareŋi kareŋi öröba luhuba bimnöŋ angetka giŋgururuŋ asuhumakzawi, mönö miaŋgö dop.

10 Dagiŋini mi skorpion (omeqaqa, aŋamumu) ewö jitŋinambuk aket. Mieŋön ambazip köiŋ 5:gö dop sihimbölö mötmegöra eŋgöhögeri, miaŋgö kukösumŋan mönö gawöt dagiŋine ahöm eŋgiyök. 11 Gawöt mieŋgö kiŋ kembuŋini mi ömewöröme yeŋgö löm dutŋi qahö miaŋgö garataŋi qetŋi Ayuayuhu Toŋi. Mi Hibru keunöŋ Abadon aka Grik keunöŋ Apolion.

12 Yei wölzik mutukŋi kanjamŋambuk mi mewö teköyök. Mötket, miaŋgö andöŋe yei wölzik yahöt kanjamŋirambuk mi mönö toroqeba könaŋgep asuhumahot. Mewö. a, b, c, d, e, f, g 

Suep garata 6:ŋan tömunŋi qainŋi kun uyök.

13 Suep garata 6:ŋi yaŋön tömunŋi qainŋi kun (biugel) uyök. Mi uiga Anutugö wösöŋe goul alta ahözawi, miaŋgö ilikŋi 4 mieŋgöreŋök kouruk kun kaiga möral. 14 Kouruk miaŋön Suep garata 6:ŋi tömunŋambuk yaŋgöra kewö jiyök, “Anutunöŋ garata 4 jöhöba gwaröhöm eŋgiba o töwatŋi ketaŋi qetŋi Yufreitis miaŋgö qöhöröŋe al eŋgiyöhi, mi mönö pösat eŋgiman.”

15 Anutunöŋ garata 4 mi jöhöm eŋgiba gwarönöŋ tatmegö (yara) yambuŋini, köiŋini, silimŋini aka auaŋini mi törörök areŋgöm eŋgiiga tatket. Yeŋön nalöŋini mi kam kuŋguiga miaŋgöreŋök ambazip kantriŋi kantriŋi mieŋgö bahöŋi karöbutŋi mi eŋgubingö jöjöröba tata nalöŋinaŋgöra mambötket. Miaŋgöra Suep garata 6:ŋan altanöhök kouruk möta miaŋgöreŋök anda garata 4 mi pösat eŋgiyök. 16 Pösat eŋgiiga yarö kambu keta bölökŋi mi hosŋinambuk asuhuba kaget. Nöŋön jaŋgöŋini mötpiga 200 milyön ahök.

17 Jemeleŋ miaŋgöreŋ azi hos qakŋe tata kageri, mieŋgö kaisoŋgolomŋini ekiga kewö tandök aket: Göwaŋgöwaŋini (töptöpkö ain sumanŋini) mi könöp jit pisikŋi, asoŋi injaŋkölkölŋambuk aka gohotŋi salfa könöp köt ewö. Hos mieŋgö kaisoŋgolomŋini eŋgekiga nöröpŋini laion sömbupkö nöröp ewö aketka numbuŋineyök könöp, köwak aka köt könöpŋambuk qetŋi salfa mi eta kayök. 18 Hos yeŋgö numbuŋineyök könöp, köwak aka könöp köt qetŋi salfa eröhi, miaŋön mönö ambazipŋi ambazipŋi eŋguyök. Hos mieŋgö kukösumŋini mi numbuŋine aka dagiŋine ahöyök. Dagiŋini mi mokoleŋ ewö aketka dagiŋinaŋgö kitipŋi mi jitŋinambuk. Kitipŋi jitŋinambuk mieŋön mönö ambazip ihilek ewö eŋgohotirimakze. Lömböt kanjamŋinambuk karöbut mi mönö gölmegö ambazip pakpak yeŋgö bahöŋini karöbutŋi mi eŋguiga kömuget.

20 Lömböt kanjamŋinambuk mieŋön ambazip tosatŋi qahö eŋguget kömumba toroqeba malgeri, yeŋön mönö töndup uruŋini qahö meleŋget. Nanŋini böröŋinan yuai memba waikŋini memba möpöseigeri, miaŋgöra qahö möt bölim aŋguget. Ömewöröme aka tandö lopioŋ waikŋini memba möpöseim eŋgieŋgi mi qahö mosötket. Tandö lopioŋ tosatŋi mi goul, silwö me brons ainöŋ memeŋa. Tosatŋi mi köt urasiba me ip söhöba memeŋa. Miaŋgöra tandö lopioŋ mieŋön yuai eka mötpingö me anda kabingö osimakze. Töndup ambazipnöŋ mi qahö mosötket.

21 Mewöyök ambazip eŋguget kömukömu me sait qarösoŋgo amötqeqe mi qahö mosötket. Mi toroqeba aka memba serowilin aket aka yuai laŋ yoŋgorö memba malget. Miaŋgöra uruŋini qahö meleŋget. Mewö. h, i 

Copyright information for `BMU