a7Eks 20.17, Dut 5.21;
b11Jen 3.13
c15Gal 5.17

Romans 7

Boŋ 7

Awanöm malmalgö söpsöp keu

O urumeleŋ alaurupni, iŋini Köna keu mötzeaŋgö dop eŋgöra kewö jimam: Köna keunöŋ ambazip jöhöm neŋgiza. Gölmenöŋ mal öŋgöbinaŋgö dop mönö miaŋgö bapŋe malbin, iŋini mi mötze me qahö? Miaŋgö söpsöpŋi kun kewö: Köna keunöŋ ambi apŋambuk jöhöiga azinöŋ malmawaŋgö dop awanöm malmahotmö, apŋan kömuma ewö, anömŋan mönö awanöm malmalgö Köna keunöhök lolohoma.

Miaŋgöra apŋan jebuk maliga azi kungöra Oŋ! jiiga mema ewö, yaŋgö qetŋi mönö qesabulum ambia jimakzin. Mewö jimakzinmö, apŋan kömuma ewö, Köna keu miaŋön qahö toroqeba jöhöi malma. Mewö mala azi kun memawi, yaŋön mönö qesabulum ambia qahö akŋa.

Miaŋgöra urumeleŋ alaurupni, eŋgö könaŋamŋinan mönö mewöŋanök ahöza. Iŋini mewöyök azi kungö buŋaŋi akŋegöra Kraistpuk qekötahöget. Anutunöŋ i mem gulii kömupnöhök wahöriga malmalninan ölŋi Anutugöra miwikŋaii asuhumapköra mörakza. Kraistnöŋ kömuiga uruŋini walŋan yambuk kömuiga qamöt ewö aka Köna keugö buŋaŋi qahö malje. Mutuk urusilegö sihim kömbönaŋi bölöŋan galöm köl neŋgiiga laŋ malin. Nalö miaŋgöreŋ Köna keunöŋ sölölöhöba kuŋgum neŋgiiga siŋgisöndok akingö sihim kömbönaŋnini bölöŋan asuhum tiŋgita galöm köl neŋgiget. Miaŋgöra urusileninan wahöriga malmalninan kömup köhöikŋaŋgö ölŋi miwikŋaiba laŋ malin.

Mewö malinmö, mutuk keu miaŋön jöhöm neŋgiiga gwaröŋe mala köna keugö bohonŋi mohot mohot wuataŋgöbingö kapaŋ köla nupŋi memba malin. Kraistpuk qekötahöba kininga urunini walŋan yambuk kömuiga nalö kewöŋe köna keugö buŋa ahinaŋgöreŋök lolohoba kunbuk welenŋi qahö qemakzin. Nalö kewöŋe könaŋamninan kölöŋaiiga Uŋa Töröŋan inahöm neŋgiiga amqeba Anutugö nupŋi memakzin. Mewö.

Siŋgisöndok akinbukö kapaŋ köla aum-mörimakzin.

Miaŋgöra denöwö jibinak? Köna keu nanŋak siŋgisöndok-ŋambuk akza me qahö? Mi yapmakek! Köna keunöŋ mönö siŋgisöndokö könaŋi kondel niŋgiiga möral. Köna keu kun kewö ahöza, “Kungöreŋ yuaigöra kude köpösöŋgöman.” Mewö qahö jibawak ewö, nöŋön yuaigö köpösöŋgömakzali, miaŋgö könaŋi qahö möt kutubileŋak. Miaŋgöra Köna keu qahö möt kutubileŋak, mewö siŋgisöndok qahö möt yaköbileŋak.

Köna keu qahö ahöbawak, siŋgisöndoknöŋ mönö keu omaŋi aka köhömuŋi akawak. Mewö akawakmö, jöjöpaŋ keu mötpiga sel jöhöm niŋgiiga mi walöŋmamaŋgö könaŋi ahuiga siŋgisöndok aki asuhuyök. Jöjöpaŋ keunöŋ mönö kuŋgum niŋgiiga urunan wahöriga sihim kömbönaŋni bölöŋi könaŋi könaŋi asuhum tiŋgitketka bölöŋaŋgöra laŋ köpösöŋgömakzal. Mutuk Köna keu qahö möta tönpin malalmö, jöjöpaŋ keu mötpiga miaŋön aŋgön köl niŋgiyöhaŋgöra siŋgisöndokö sihimnan guliiga urunan wahöri mi ahal. Siŋgisöndok akiga mem kömum niŋgiiga köhömuŋi ahal.

10 Anutunöŋ jöjöpaŋ keu mi wuataŋgöba mal köhöimamgöra aka al niŋgiyökmö, keu mi wuataŋgömamgö esapköbiga mem kömum niŋgiiga köhömuŋi ahal. Köhömuŋi ahali, miaŋön mönö aukŋe asuhui miwikŋaial. 11 Jöjöpaŋ keu möt kutubiga sel jöhöm niŋgiiga mi walöŋmamaŋgö könaŋi ahui jöjöpaŋ keunöŋ kuŋgum niŋgiiga siŋgisöndoknöŋ tilipköm niŋgiiga mi ahal. Siŋgisöndok aka keunambuk ahal. Mewö miaŋön Anutugö jöjöpaŋ keu miaŋön siŋgisöndok bohon köliga aki mem kömum niŋgiiga köhömuŋi ahal.

12 Mewö ahalmö, töndup Köna keu miaŋön mönö kömbukŋi aka sarakŋi akza. Miaŋgö jöjöpaŋ keuŋan mönö diŋdiŋi aka ölöpŋi akza. 13 Mewö aiga jöjöpaŋ keu ölöpŋi miaŋön mem kömum niŋgiiga köhömuŋi ahal me qahö? Mi yapmakek! Keu ölöpŋan qahöpmö, Köna keunöŋ mönö nani siŋgisöndoknaŋgö könaŋi indeli möt kutuyal. Siŋgisöndokö gamuŋi aukŋe asuhui kanjamŋambuk mötmamgöra aka jöjöpaŋ keu miaŋön siŋgisöndokö selŋi jöhöiga urunan wahöri walöŋda siŋgisöndok ahal. Nani siŋgisöndokni miaŋön mönö mem kömum niŋgiiga köhömuŋi ahal. Mewö. a, b 

Urune siŋgisöndokö yarö ahöi maljal.

14 Uŋa Töröŋan Köna keu neŋgiiga diŋdiŋi akzawi, mi mötzinmö, nöŋön siŋgisöndok azia aka sihim kömbönaŋni bölöŋambuk akzal. Eta kölbiga siŋgisöndoknöŋ galöm köl niŋgiiga tem köla welenŋi qeba siŋgisöndok ahakzal.

15 Miaŋgöra yuai ölöpŋi akŋamgö mörakzali, mi qahö ahakzal. Mimö, yuai bölöŋi akŋamgö tököba sisitŋi memakzali, mönö mia ahakzal. Miaŋgöra yuai ahakzali, nöŋön miaŋgö könaŋi ölöp qahö möt kutumakzal. 16 Miaŋgöra yuai bölöŋi akŋamgö ölan aka mia ahakzal ewö, Köna keunöŋ mönö töndup ölöpŋi akza. Köna keugöra mönö urumohot akzal.

17 Mewö aiga nöŋön nanak mi qahö toroqeba ahakzalmö, siŋgisöndok urune ahözawaŋön mönö kuŋgum niŋgiiga mi ahakzal. 18 Ahakmeme ölöpŋi akŋamgö sihimŋi ölŋa mörakzalmö, mi akŋamgö ösumnan qahö asuhum niŋgimakza. Miaŋgöra nöŋgö urune yuai ölöpŋi kun qahö ahözapmö, urusilenan mönö siŋgisöndok akŋamgö kuŋgum niŋgimakza, mewö mötzal. 19 Miaŋgöra yuai ölöpŋi akŋamgö sihimŋi mörakzali, mia qahö ahakzalmö, yuai bölöŋi qahö akŋamgö mörakzali, mönö mia ahakzal. 20 Mewö aiga yuai akŋamgö tökömakzali, mia töndup ahakzal ewö, mi nanak qahö toroqeba ahakzalmö, siŋgisöndok urune ahözawaŋön mönö kuŋgum niŋgiiga mia ahakzal.

21 Miaŋgöra nani könani kewö ahöi miwikŋaimakzal: Yuai ölöpŋi akŋamgö sihimŋi mötpiga bölöŋaŋgö sihimŋan mönö uruni jöhöiga qakömakzal. 22 Miaŋgö könaŋi kewö: Uruneyök göröken Anutugöreŋ Köna keugöra urumohot aka tem kölmamgö mörakzal.

23 Mewö mörakzalmö, sileneyök göröken nani könaŋamni kewö ahöi miwikŋaimakzal: Silenaŋgö kitipŋi mieŋön siŋgisöndokö bohonŋi aketka akŋamgö mörakzal. Siŋgisöndok akŋamgö sihimnan mönö urusihimni ölöpŋi mi memba et almapköra möri auba yarö qemakzahot. Siŋgisöndok akŋamgö sihim kömbönaŋnan mönö silenaŋgö kitipŋi kitipŋi sölölöhöm eŋgiba jöhöm niŋgiiga kösö gwarönöŋ maljal. 24 O nöŋön bölim teköba aŋgöjöraknambuk akzal. Urusilenaŋgö sihimŋi bölöŋan noaŋgiri kömup köhöikŋi kömumbileŋbuköra mönö daŋön sohopni memba amöt qem niŋgibawak?

25 O Jisös Kraist Kembuni, mönö yambuk nam köla “Anutu saiwap!” jizal. Könaŋamnan mewö aiga nanak urunanöhök Anutugöreŋ Köna keugö bapŋe anda welenŋi qemakzalmö, sileni siŋgisöndokŋambuk miaŋgöreŋ göröken siŋgisöndok akŋamgö sihim kömbönaŋnan jöhöm niŋgiiga miaŋgö kösö gwarönöŋ maljal. Mewö. c 

Copyright information for `BMU