1 Corinthians 16

A Nihabi ne Huriki a Tara ne Kristo

a Ngane ga taki tabu mua vona a naro na ni ru kadolu a moni ni kori e huriki a tara ne Kristo o Ierusalem. Mu rata manga a hini a taki e huriki a tara ne Kristo o Galesia. Na Sande lobo, mua takutaku mu ru kadolu ranga moni mu bole na parava takutaku. Mu rata mavonga, na tahuna a lakene i uka ma mu gu papahari ni matakana a moni ni vakaru lakea ne ria. Na tahuna a bele iene, mu vulaki ranga bakovi, ga rudu ria, ri gi taparakia o Ierusalem a kinori ne mua. Ga herea a raukea to go vakasiri o Ierusalem, ri gi matakilala tou, tou a bakovi kamumu. Pali iau ga masia ge kamumu ga vano, bara to laho turagu.

A Nihavai ne Paulus

b Iau bara lakea taro na tabeke ne Masedonia, ga laho taro vonga. Muri bara lakene, bara gosi mua. c A ngaru ni made tabaka turane mua. Bara made turane mua na tahuna na malangia. Muri, ga pe mua, ga lokovai, bara mu kori iau na nilaho nau. Iau bara lakene ngane, i uka ma ge kamumu, a vuhuna bara laho polopolo kunana. E Bakovi Dagi ge ngaru, a ngaru ga made tabaka turane mua. Pali ngane ga made taro o Epesus, ge lobo taro a habu na Pentekos, d a vuhuna a Vure i kado puru pali a dalagu ga rata a leho dagi vona, ga vakabele a kanena dagi. Ri ala kupo hateka ri gege iau koea.

10  e Na tahuna e Timoti i bele iene, mu rata kamumua, i uka ma ge mangenge. I rata a leho ne Bakovi Dagi manga iau. 11  f Nahea tara viri ge biu ia. Mu tuhoria na tahuna i ngaru ni hamule valai nau, ge pe mua na nivalemu. A pasimata vona e Timoti ge hamule valai turana e huriki e turane hita.

12  g E Apolos, e turane hita, a taki torea ge vano turana e huriki a turane hita, ri gi matai mua. Pali i uka ma i ngaru. Muri ma, ia ge malopi, bara i lakene, ge matai mua.

A Nilobona Ngava

13 Mu matadoko. Mu pesi tata na niluhoi tora. Naha ni mangenge, mu kinigao. 14 A maki lobo mu rata, mu rata na naro na nivangaru.

15  h Mu lohoka vona a kabu ne Stepanas. Ri pulo a narone ria muga ne huriki lobo na tabeke ne Akaia. Ri habi a hatene ria ni tuhori e huriki a tara ne Kristo. Mua e huriki a turagu, a ngaru mu gu 16 longototo e huriki a bakovi maea, turana e huriki ri rata a leho ne Bakovi Dagi. 17 A vivi vona e Stepanas, e Portunatus, e Akaikus to valai koea, to matai iau. To valai na murine mua, 18 to vakakamumu a hategu. Mua ranga, to vakakamumu a hatene mua. Mu togo e huriki a bakovi maea.

19  i E huriki a tara ne Kristo na tanga lobo na tabeke ne Asia ri talo rike a haro ne mua. E Akuila rua e Prisila, e huriki a tara ne Kristo ri vapopo na ruma ne rua, ri talo rike na rane Bakovi Dagi a haro kamumu ne mua. 20 E huriki e turane hita ri talo mua. Mu vatagui na naro kamumu.

21 Iau, e Paulus, a herea na limagu a nitalo nau i lakene mua.

22  j E rei a viri i uka ma i ngarua e Bakovi Dagi, a Vure ge rudurahea. O valai, Bakovi Dagi ne mia!
(16:22)A ngava e ‘Maranata’ na nita Aram i manga i maea, ‘O valai, Bakovi Dagi ne mia!’


23 E Isu, a Bakovi Dagi, ge rata kamumu mua.

24 A ngaru hateka mua, ra mu rihi e Isu Kristo. I muholi.

Copyright information for `BNP