1 Peter 1

A Nita Muga

Iau e Petrus, a apostolo ne Isu Kristo.

A here lakene mua e huriki a Vure i vulaki mua, mu made manga mosi na provins e Pontus, e Galesia, e Kapadosia, e Asia, e Bitinia.
a A Vure, e Tamane Hita, i lohoka muga pali ge vulaki mua. A Hanuna Vure i vulaki mua, ge mua ne vona kunana, mu gu longototo e Isu Kristo, a darana ge vahilolo mua, mu gu malamala.

A Vure ge rata kamumu mua, ge habi ne mua a nivalemu, ge uka harena.

Si Pasimata Vona a Nimahuri Vakaroro

Si gi kavurikea a Vure, e Tamane Isu Kristo, a Bakovi Dagi ne hita! I dodo hateka hita, lakea i habi ne hita a nimahuri karaba. Ngane si pasimata muholi, a vuhuna e Isu Kristo i mahuri mule na matenga. b Si pasimata vona a maki ni kado puru ne hita meli na hunu. A maki nga, ri gi tabuli vakaroro. I uka ma ri gi hale, i uka ma ri gi lobo. c Mu luhoi torea pali e Kristo, lakea a nitora na Vure i matakari mua. Ge matakari mua ge vano ge harena na nilobona parava na tahuna ge vakasiri kavakava ne huriki a naro i korimule mua vona.

d I mavonga, mu vivi hateka. Pali i muholi, ngane bara mu bole a nimadihi na nitoni legelege na parava popote kunana. e Mu gu bole taro a nimadihi na nitoni legelege, ge vakasiri mu luhoi tora muholi. A gol a maki i uka ma ge tabuli vakaroro. Pali ia tara, ni toni na kanono. I mavonga, a niluhoi ne mua, ra i dagi hateka na gol, ni gi toni taro, ge tabuli tabaka. Na tahuna mu bole a nitoni, pali mu pesi tata ni luhoi tora, bara ni kavurike mua, bara ni vakabagetu mua, bara ni togo mua na tahuna e Isu Kristo i bele kavakava. f I uka ma mu masia hosi, pali mu ngaru hatekea. I uka ma mu masia ngane, pali mu luhoi tora ia, mu vivi hateka. A nivivi ne mua i rangi a nivivi lobo na malala, i uka ngava ge tuvevea a nivivi ne mua, a vuhuna a mapane mua mu luhoi torea e Kristo, bara i korimule mua.

10  g E huriki a propet ri ta muga vona a naro a Vure ta ge rata kamumu mua vona. Ri ngaru hateka ni lohoka vona a Vure ge korimule navai hita. 11  h A Hanune Kristo i leho pololilo ne ria, ri ta muga na nimadihi ta ge bolea e Kristo, a bagetuanga ta ge bolea muri, lakea ri ngaru ni lohoka vona ia e rei, pali garika ge valai? 12 Ni vakalongo ria vona a nita propet ri rata i uka ma ne vona ni korimule ria. A nita propet ri ratea ne vona ni kori mua. A nita propet ne ria i bele muholi na ngava ni vakalongo ne mua pali, na tahuna e huriki ri vara ne mua a Velenga Kamumu na nitora na Hanu Kiripiripi, ra i valai na hunu. E huriki a agelo ranga, ri ngaru ni lohoka vona a ngava nga.

Si Gi Made Malamala

13 I mavonga, mu luhoi kamumu, mu matakari a nilaho ne mua. Mu pasimata vona a naro kamumu a Vure ge rata virihi mua vona na tahuna e Isu Kristo ge hamule valai, ge bele kavakava ne huriki lobo. 14  i Naha ni longototo a ningaru hosi na kakaine mua, ra mu ramai hosi na tahuna i uka ma mu lohoka, a vuhuna ngane mua e huriki a tuna Vure, mu longototoa. 15 A Viri i gale mua i malamala. I mavonga, mua ranga, mu laho malamala na maki lobo mu rata, 16  j a vuhuna ni here hosi i maea, “Mu ramai a naro ge kiripiripi, a vuhuna iau a kiripiripi.”

17  k A Viri mu vasileki vona, e Tamane hita, i pelekado e huriki lobo na naro i taku kunana, i pelekado ria i ramai a narone ria. I mavonga, mu mangenge na Vure, mu laho kamumu manga a mosi koea na malala. 18 A Vure i konamule mua na maka naro tavulavula mu bole ne huriki a gare ne mua. I uka ma i konamule mua na mahala ge lobo, manga a silva o a gol. 19  l I konamule mua na mapana i dagi hateka, ra darane Kristo. I manga a darana tuna sipsip gavutuvutu. 20  m A Vure i vulaki mugea na malala ni ratarike. Pali i bele kavakava ne mua ngane, na nilobona parava. 21  n I rata mua mu luhoi torea a Vure. Mu luhoi tora ia, mu lohoka vona ge korimule mua, a vuhuna i vakamahuri mulea na matenga e Kristo, i vakabagetua.

22  o Naha ni tamilalu. Mu vangaru muholi na naro kiripiripi, i manga mua a maki tari, a vuhuna mu longo pali a ngava muholi, i rata a hanune mua i malamala pali. 23 Mu vangaru a vuhuna mu bole pali a nimahuri karaba. A nimahuri karaba iea i uka ma ge lobo. Bara i tabuli vakaroro. I valai na nita mahuri na Vure. A nita iea bara i tabuli vakaroro. 24  p I manga a ngava ni here na Hinere, i maea,

“E huriki a bakovi a ngatavine ri manga a varili kunana.
A bagetua ne ria i manga a bagetua na keke.
A varili bara i malai, a keke bara i mapasi.
25 Pali a Nitane Bakovi Dagi bara i tabuli vakaroro.”
A nita iea, a Velenga Kamumu ni vara mua vona.

Copyright information for `BNP