1 Timothy 5

A Rabu na Nivalemu

Na tahuna a gare bakovi i varoru, naha ni tahatea. O ta kamumu maia, ge manga a hini o ta turana e tamamu. O rata kamumu e huriki a riau, ge manga a hini o rata kamumu e huriki a turamu. O rata kamumu e huriki a gare ngatavine ge manga a hini o rata kamumu e kinamu. E huriki a sirula ranga o rata kamumu ria, ge manga a hini o rata kamumu e kurabamu.

A Havuri a Ngatavine

O togo e huriki a havuri ngatavine ri uka e tune ria, e tubune ria. Ria a havuri muholi. O taki e huriki e tuna, e huriki e tubuna havuri, ri gi matakari kamumu e kinane ria, e tubune ria. Ri gi vakasiri taro ri ramai a narona Vure, ri gi koli a naro kamumu ni rata virihi ria vona hosi. Ra naro iea, a Vure i ngarua. A havuri muholi, ra viri i made kikeri, i luhoi torea a Vure, lakea i vasileki vakaroro, i nanea a Vure ge tuhori ia. Pali a havuri i tero, i laho viliha lae, i manga i mate pali a hanuna, i laho a kakaona. O vakuku maea e huriki a tara na Vure, lakea bara ri muri mai a naro malamala kunana, i uka tara viri ge kau ria na ngava. A viri i uka ma i matakari a viri vona, ra kabu vona muholi, i pea pali a Vure. Ra bakovi maea, a narona i hale hateka ne huriki i uka ma ri luhoi torea a Vure.

A havuri, e girihina i taku kunana, i tahoka a pida i langui i ravulu polotara, o here purua a rana, ge bole a kinori. 10 O here kunana a rana e huriki a havuri ni matakilaka vona ri rata a naro kamumu, ri matakari kamumu e tune ria, ri matakari a mosi, ri vahilolo a vahane huriki a tara na Vure, ri tuhori e huriki ri marego, ri habi a hatene ria na maka naro kamumu ranga.

11 Pali naha ni here a rane huriki a havuri sirula, a vuhuna na tahuna ri hataki a kuline ria i milamila, bara ri lohopilea e Kristo, ri ngaru ni parangi tabu. 12 Re huriki nga, a Vure bara i pelekado ria, a vuhuna i uka ma ri muri mai a ngava ri ta muholi vona ta ri gi muri mai. 13  a A naro tara ri ratea, ri rakoli tavula, ri laho polovano na maka ruma. Muri ri vakatubu ni padimomo, ri rahi dili ria na maki na viri tara, ri taki a maka ngava hale. 14  b I mavonga, a ngaru e huriki a havuri sirula ri gi parangi, ri gi tahoka a koma, ri gi matakari a ruma ne ria. Bara ri rata mavonga, a pile ne hita bara i keri ni biu hita. 15 I ranga e huriki a havuri karaba ri ruru pali na dala muholi, ri muri mai e Satan.

16 E huriki a ngatavine ri luhoi torea e Kristo, ri gi matakari e huriki a havuri na kabune ria. I mavonga e huriki a tara na Vure i uka ma ri gi marego ni mata­kari ria. Bara ri matakari kunana e huriki a havuri ranga, ri uka liu a viri ge matakari ria.

A Matakari na Lotu

17 A ngaru mu gu togo, mu gu kona kamumu e huriki a matakari na lotu ri leho kamumu, re huriki ri tovo e huriki na nitana Vure, e huriki ri habi a ngava. 18  c Mu rata mavonga, a vuhuna a Hinere i ta maea, “Naha ni kolotatea a ngavana bulmakau ge keri ni kani na tahuna i leho, i paha pasi
(5:18)I muga e huriki a vora bara ri vali kadolu a vit. Muri ri ru dili na roho, ge laho langa vona a bulmakau. Na tahuna a bulmakau i laho langa, a kanena vit bara i mapasi tala na paruna.
a kanena vit.” I ta maea tabu, “A vora ge bole a mapana leho vona.”
19  e Naha ni talangaki a bakovi ala taku kunana ge padi virihi na ngava a matakari na lotu. Pali a bakovi ala rua o ala tolu to takia ra ngava iea, ngane o talangaki. 20  f E rei a viri i rata bala a naro hale, o tahatea na matane huriki. Lakea e huriki ranga bara ri mangenge ni rata a naro hale.

21 Iau a vakuku ioe na matana Vure, e Isu Kristo, e huriki a agelo a Vure i vulaki ria, a taki ioe go ramai kamumu a maka ngava nga. A maka naro o rata ge palupulupu kunana ne huriki lobo. 22 Naha ni ru langa a limamu malaviriri na viri, ge ratea a leho na Vure. Naha ni dili na naro hale na viri. O matakari kamumu ioe, go malamala na matana Vure.

23 Naha ni ninu a naru kunana. O ninu ranga vain ge kori a tamudimu na gilanga i rata bala ioe.

24 A naro hale ne huriki ranga i kava­kava. I uka ma ni pelekado ma, si matakilaka vona a naro hale ne ria. Pali a naro hale ne huriki ranga i kapiloho. Bara ni matakilala muri ma. 25 I mavonga, a naro kamumu ranga, ni mata­kilala. Pali a viri ge rata kapiloho a naro kamumu, i uka ma ge tabaka, bara i bele kavakava.

Copyright information for `BNP