2 Corinthians 5

A Kakaine Hita na Hunu

a A kakaine hita i manga a kape kunana, i uka ma ge tabuli tabaka. Na tahuna si mate, a Vure bara i habi a kakaine hita karaba, ge tabuli vakaroro meli na hunu. b Na tahuna si made na kakaine hita na malala, si bole a nimadihi si dedo, si pasimata ni bole a kakaine hita na hunu. Na tahuna si bole a kakaine hita karaba, i uka ma si gi manga a hanu kunana. Na tahuna si tabana na kakaine hita, ra i manga a kape, si bole a nimadihi, si dedo. I uka ma i manga si ngaru ni mate, si gi pe a kakaine hita. Pali si ngaru ni bole a kakaine hita karaba meli na hunu. A kakaine hita karaba, ra ge mahuri vakaroro, bara i kuloi a kakaine hita ra bara i mate. A Vure kunana a viri i pelekado puru hita, ge bele ne hita a naro iea. I habi ne hita a Hanuna, ge a kilakila na hini a Vure i ta muholi ge habi ne hita a kakaine hita karaba.

c I mavonga, i uka ma a mangenge vona tara maki. A lohoka vona na tahuna a tabana ni made na kakaigu, a made basi ne Bakovi Dagi. I uka ma a masia e Bakovi Dagi a ramaia. A ramaia, a vuhuna a luhoi torea. d I uka ma a mangenge vona tara maki, a vuhuna i kamumu ga mate, ga pe a kakaigu, ga made turane Bakovi Dagi. e Iau ga made koea na malala, o iau ga made na hunu turane Bakovi Dagi, a ningaru dagi nau, ga vakavivia, 10  f a vuhuna hita lobo bara si pesi na matane Kristo, ge pelekado hita. Muri bara si bole a mapane hita takutaku na narone hita koea na malala. E huriki ri rata a naro kamumu bara ri bole a mapane ria. E huriki ri rata a naro hale, ria ranga bara ri bole a mapane ria.

A Leho ni Rata e Huriki Ge Ria a Taho na Vure

11 I mavonga, a ta tora hateka vakaroro ne huriki ranga ri gi luhoi torea e Kristo, a vuhuna a mangenge ne Bakovi Dagi. A Vure i lohoka vona, iau a bakovi navai. A luhoi mua ranga mu lohoka nau na hatene mua. 12 A ngava iea, i uka ma a bibi rike mule a ragu, mu gu ngaru iau. A taki, mu gu vivi nau, mu gu kara ni koli a ngava ne huriki ri bibi rike mule a rane ria. E huriki ri bibi rike mule ria na hini a leho ne ria i mata kamumu hateka, pali a hatene ria i uka ma i malamala. 13 E huriki ranga ri taki iau, ta a manga. I uka maki, a vuhuna a maki lobo a rata ne vona ni ramai a ningaru na Vure. O ri taki a niluhoi nau i kamumu, mu lohoka vona, iau a leho ni kori mua. 14 E Kristo i ngaru hateka hita. A ningaru vona i matakari iau. A matakilaka vona e Kristo i mate na murine hita lobo. I mavonga, hita lobo, i manga si mate pali. 15  g I mate na murine hita lobo. I mavonga a maki lobo si gi rata, i uka ma si gi ramai a ningaru ne hita. A maki lobo si gi rata, si gi ramai a ningaru na viri i mate na murine hita, muri ni vakamahuri mule na matenga.

16 I mavonga, i uka ma ga luhoi kado tabu e huriki na niluhoi na malala. Hosi a luhoi kadoa e Kristo na niluhoi na malala. Pali ngane i uka ma a luhoi mavonga tabu. 17  h Na tahuna a viri i rihi e Kristo, a Vure i ratarike karabea, i manga a viri karaba. A rabu hosi vona i lobo. Ngane i ramai a rabu karaba. 18  i A Vure kunana a viri i rata a maki nga. A Vure, na leho ne Kristo, i rata hita i uka ma hita a pile tabu na Vure. Hita a taho vona. I habi a leho ne hita, si gi rata e huriki ranga, ge ria a taho na Vure. 19  j Ra i maea, na leho ne Kristo, a Vure i uka ma i luhoi tabu a naro hale ne hita. I rata hita i uka ma hita a pile tabu. Si made turana na nivalemu ngane. I habi a leho nau, ga rata e huriki ranga ri gi made turana Vure na nivalemu. 20 Na naro iea, iau a vinuru ne Kristo. A vakalongo polo ne huriki a ngavana Vure i nana tora e huriki ri gi pulo a vilone ria. I mavonga, a nana tora mua na rane Kristo, mu lobo ni pilea a Vure, mu made turana na nivalemu. 21  k A Viri i uka liu a naro hale, a Vure i ratea i bole a mapana naro hale ne hita, ne vona ni korimule hita. Lakea e rei a viri i rihi ia, bara i malamala na matana Vure.

Copyright information for `BNP