Deuteronomy 10

E Moses i Bole Tabu a Vinara ne BAKOVI DAGI

(Nimariu 34:1-10)

E Moses i ta tabu i ta maea, “Na tahuna iea e BAKOVI DAGI i taki iau i ta maea, ‘O kau a tabekena kedo ge rua ge manga a tabekena a habi vomu muga, o kau ranga kai o ratea tara tava. O bole valai nau na mapana lolo. Ga here tabu na tabekena kedo nga a maka vinara, ra maka vinara nga muga a here na tabekena kedo i rua o ubikeve. O bole, o ru dili na tava.’

“Lakea a ratea a tava na mavilana kai a akas, a ubikeve a tabekena kedo i rua ru manga a viri muga, a bole sike na lolo. Lakea e BAKOVI DAGI i here puru tabu na tabekena kedo nga i rua, a nita i manga kunana a nita muga. E BAKOVI DAGI i here puru a vinara i ravulu, ra i taki mua vona na tahuna i made pololilo na kanono ia, mu made na dahana lolo mua. I here puru lobo, i habi nau a tabekena kedo nga i rua. A ngalakapulo, a raga puru na lolo. A ru dili na tava ra tabekena kedo nga i rua, i ramaia a ngava e BAKOVI DAGI i taki iau vona pali. Ra kedo nga i rua, ru tababana pololilo na tava.

a  “Muri e huriki a Israel ri pea a lomu ne huriki a Iakan, ri lakea na tanga e Moserot. E Aron i mate na tanga iea, ni tanu vonga. E tuna, e Eleasar, i bole a murina, i ratea a leho na prister. Ri malaga vonga ri lakea na tanga e Gudgoda, muri ri lokovonga tabu o Iotbata, ra tanga i kupo vona a maka naru.

b  “Hosi e huriki a Israel ri made na lolo e Sinai, lakea e BAKOVI DAGI i vulaki e huriki a bakovi na kabune Levi ri gi kaloho a Tava na Ngava Dagi. Re huriki a bakovi nga ri gi leho manga a prister, ri gi taki e huriki a bakovi a ngatavine ne BAKOVI DAGI ge rata kamumu ria. Ra leho iea ri ratea i valai i harena mona. I mavonga, a kabune Levi i uka ma ri bolea tara tabekena malala ge manga maka kabu ne Israel ranga. A maki kamumu ri bole poloa, ra leho na prister ne BAKOVI DAGI, i manga a hini e BAKOVI DAGI a Vure ne hita i taki pali.

10  c  “Iau a made na mapana lolo na haro, na rodo i harena na parava i ravulu va, i manga a hini muga. E BAKOVI DAGI i longo a nivasileki nau, lakea i uka ma i ratapile mua. 11 Muri i taki iau i ta maea, ‘O lakea mai e huriki nga, o taparaki ria vona a malala a ta muholi vona ne huriki a gare ne mua hosi ga habia ne ria.’”

A Naro i Ngaru e BAKOVI DAGI

12 E Moses i vara tabu i ta maea, “Mua o huriki a Israel mu longo, a ra maki e BAKOVI DAGI, a Vure ne hita, i taki mua mu gu rata? Mu togoa e BAKOVI DAGI a Vure ne mua, mu laho na dalana, mu ngarua, mu ramai lobo a nitana na hatene mua, na niluhoi ne mua. 13 Mu ramai lobo a vinara vona, ra ngane a habi ne mua. Mua bara mu ramai lobo, bara mu made kamumu.

14 “A hunu i tabuli polomeli liu, ne vona e BAKOVI DAGI a Vure ne mua. A malala turana a maka maki ri tabuli vona, ria ranga ne vona e BAKOVI DAGI. 15 E BAKOVI DAGI i ngaru hateka e huriki a gare ne mua, lakea i uka ma i vulakia tara kabu. I vulaki mua kunana, ge mua a viri vona, ra ngane mua a viri vona. 16 I mavonga mu vorotaparaki a naro na tagenga, mu ramai kamumu a maka nitane BAKOVI DAGI, 17  d a vuhuna e BAKOVI DAGI a Vure ne hita i rangi a maka vure ranga, a maka maki ri tahoka a nitora ne ria. I dagi hateka, i gao hateka, a maka maki lobo ri gi mangenge vona, ri gi togoa. I uka ma i ngaru a viri i ta rularula ge vokoa na ngava. 18 I rata a naro malamala ne huriki a bakovi a ngatavine, e girihine ria ri mate pali, ne huriki a duku. I ngaru e huriki a mosi ri made turane hita i habi a maki ni kani, a varakia ne ria. 19 Mua ranga mu ngaru e huriki a mosi nga, a vuhuna mua ranga hosi mu made o Egipto manga a mosi. 20 Mu togoa e BAKOVI DAGI a Vure ne hita, mu kavurike ia kunana. Mu nugutata tora ia, mu kaba na rana kunana. 21 Mu kavurikea a rana, ia kunana a Vure ne hita. Mua lobo mu matai a maka maki legelege i rata ge tuhori mua. 22  e Na tahuna e huriki a gare ne mua ri lakea o Egipto ri ala ravulu polorua kunana. Pali ngane, e BAKOVI DAGI a Vure ne hita, i rata mua mu ala kupo hateka.”

Copyright information for `BNP