Deuteronomy 14

Naha Ni Taringi a Viri i Mate

a E Moses i ta tabu i ta maea, “Mua o huriki a Israel, mua e tune BAKOVI DAGI a Vure ne mua. Na tahuna mu taringi a viri i mate, naha ni pala viliha a kuline mua, naha ni ali a vune mua, mu gu gigi marina. b Ra mua a kabu ni taba lakea ne BAKOVI DAGI a Vure ne mua, a vuhuna i vulaki tala mua ne huriki a kabu lobo na malala, i ru mua ge mua a viri vona kikeri.

A Maki i Muto, a Maki i Kaba

(Levi 11:1-47)

“Naha ni kani a maka kania ri muto na matane BAKOVI DAGI. A maki mu kani: a bulmakau, a sipsip, a meme, a dia, a gesel, a dia mokumoku, a meme i tegi, a ibeks, a entelop, a sipsip na lolo, a maki a tagulana vahane ria ri mavida na tabeke i rua, ri kani a varili manga a bulmakau, mu kani. Pali ranga maki ri kani a varili manga a bulmakau, a tagulana vahane ria i mapida rua, naha ni kani. A maki ranga: a kamel, a rabit, a murongi na kedokedo; ri kani a varili manga a bulmakau, pali a tagulana vahane ria i uka ma i mapida rua, bara mu lohoka vona a kania maea i muto na matana Vure. Naha ni kani a boro. A boro i tahoka a tagulana a vahana, pali i uka ma i kani a varili manga a bulmakau, naha ni kani, naha ni padoi na tahuna i mate, a vuhuna ri muto ne mua.

“Na maki lobo ri tabuli na dari, mu kani a maka manu ri tahoka a honane ria a pelengane ria. 10 Pali naha ni kani a maka manu ri uka a honane ria, a pelengane ria. Mu luhoi kamumu, a maka manu nga ri muto ne mua.

11 “Mu kani a maka kadirovo ri matapado na matana Vure. 12 Pali naha ni kani a loha, a pangopango-kaba, a pangopango-kaba katokato, 13 a luama, a kinikinimanu legelege, 14 a maka kokoa legelege; 15 a pelenga-sike-o-bao, a haloho, a nae, a maka hani legelege; 16 a kuku kiroko, a kuku dagi, a kuku keakea, 17 a kuku na malala golea, a pangopango-kaba na dari, a pato na darilomu, 18 a ko, a luhou, a kopa, a kadirovo ni gale a hupoe. 19 A maka maki kiroko ri karaka ri tahoka a karapane ria, ri muto, naha ni kani. 20 A maka maki ranga ri tahoka a karapane ria ri matapado, mu kani ngi.

21  c  “Naha ni kani a maka sipsip a bulmakau ri mate tavula. Mu habi ne huriki a mosi ri made viliha na tanga ne mua ri gi kani, ge uka ri gi kona. Pali mua a kabu ni taba lakea ne BAKOVI DAGI a Vure ne mua.

“Naha ni guru dili na ulo a namona ruruna meme, go nono a tuna meme vona.

A Maki i Ravulu: Ge Taku Ge ne Vona Vure

22  d  “A maki ni kani mu bole na hania na pida lobo mu ru na naguna ge ravulu, a naguna ge taku mu ru hereherea. 23 Muri mu bole lakea na murina ni vasileki a maki mu ru herehere. Mu kani na matane BAKOVI DAGI a vit, a vain, a namona oliv, a tabua na bulmakau na sipsip. Mu rata mavonga bara mu tovo a naro ni togo e BAKOVI DAGI a Vure ne mua. 24 Na tahuna mu made basi, i uka ma mu kara ni bolena a maki ni kani kamumu a Vure i habi ne mua mu gu bole lakea na tanga ni vasileki e BAKOVI DAGI i vulakia, naha ni loho lege. 25 Mu habi ne huriki a bakovi ri gi kona, muri mu bole lakea na tanga ni vasileki a mapana. 26 Ra maka moni nga, bara mu kona a maka maki mu ngaru: a bulmakau, a sipsip, a vain a naru vagole, a maka maki ranga mu ngaru. Na tanga ni vasileki, na matane BAKOVI DAGI, mua turane huriki e tune mua, mu kani a maka maki nga, bara mu vivi hateka. 27 Pali naha ni longokaburungi e huriki a Levi. Mu tuhori ria. Re huriki nga ri uka a malala, a ruma, a mahala.

28 “Muri na maka pida i tolu lobo mu bole ra naguna i taku na maka naguna a maki i ravulu, mu ru kadolu na roho tara na tanga mua. 29 Ra maki ni kani nga ne vona e huriki a Levi, a vuhuna ri uka a malala, a ruma. Ra maki ni kani nga tabu, bara mu luhoi e huriki a mosi, e huriki a duku, e huriki a havuri ri made na tanga ne mua. Re huriki nga ri gi valai, ri gi bole na ningaru ne ria a maki ni kani. Mu rata mavonga, lakea e BAKOVI DAGI bara i gamai mua.”

Copyright information for `BNP