Deuteronomy 15

A Pida Ni Vakalobo a Makoli

(Levi 25:1-7)

E Moses i ta tabu i ta maea, “Muri na maka pida i polorua naha ni luhoi tabu a maka makoli ne mua. A naro mu gu ratea ge maea. A bakovi i habi a moni ne turana, nahea ge takia e turana ge koli a makoli vona, a vuhuna e BAKOVI DAGI i taki si gi longokaburungi a makoli. A mosi i bole a maki ne mua, mu takia ge koli a makoli vona. Pali naha ni taki e huriki a tahotanga ri gi koli a makoli.

“E BAKOVI DAGI a Vure ne mua bara i rata kamumu mua vona a robo i ngarua ge habia ne mua. Bara i uka tara viri ge bala vona tara maki, na tahuna mu longototo a nitane BAKOVI DAGI mu ramai lobo a maka ngava ra i habi ne mua. E BAKOVI DAGI bara i rata kamumu mua, i manga a ngava i ta muholi vona hosi. E huriki ri ala kupo bara ri bole a makoli ne mua, pali mua naha ni bole a makoli ne ria. Bara mu matakari a maka tabeke i kupo, pali bara i uka tara tabeke ge matakari mua.

a “Na tahuna a turane mua tara i made vona a tanga na tabeke e BAKOVI DAGI a Vure ne mua ge habia ne mua, ge bala vona tara maki, naha ni ngalahere vona, mu tuhoria. Mu dodoa mu habi vona a maki i bala vona. Naha ni matai a pida ni koli a makoli i tabukoi, mu gu vakatoku a maki, i uka ma mu gu tuhori ria. Naha ni ramaia a niluhoi hale iea ge bele ne mua. Mua mu marikoi ni habi a moni vona, a bakovi iea bara i gale e BAKOVI DAGI i koli a maka naro hale ne mua. Muri bara mu tahoka a ngava na matana Vure. 10 Mu habi lobo vona a maka maki i nana vona, lakea e BAKOVI DAGI bara i rata a maka leho ne mua ri bele kamumu. 11  b Bara i tahoka ranga ne hita a Israel ri bala a maki vakaroro. A luhoi mavonga lakea a ta maea, mu dodo, mu kori, mu rata kamumu ria.”

E Huriki a Vorakato

(Nimariu 21:1-11)

12  c  “Na tahuna a viri tara ne hita a Hibru i habi mule ia ge leho manga a vorakato vomu, ge leho ne vomu na pida ge polotara kunana. Na poloruana pida o tonoa ge vano. 13 Na tahuna i pe puru a leho vomu, naha ni vakalaho pa ia ge hamule na tanga vona. 14 O habi vona a sipsip, a vit, a vain i manga kunana e BAKOVI DAGI i gamai ioe. 15 O luhoi mulea a tahuna mu made manga a vorakato o Egipto, lakea e BAKOVI DAGI, a Vure ne mua, i bole mule mua vonga. Na naro iea kunana, ngane a habia ne mua a vinara iea.

16 “Pali a vora ge ta maea, ‘A marikoi ni ha taro mua, a vuhuna a ngaru mua, a made kamumu turane mua.’ 17 Lakea mu tulia ge lakea na mataruma ne mua, mu bolea tara maki ge vere mu padi tala a talingana, bara i leho manga a vora ne mua, ge harena na tahuna ge mate vona. A vora ngatavine tara, mu rata mavongea. 18 Naha ni luhoi lege na tahuna mu tonoa a vora ne mua ge vano, a vuhuna a vora iea i rata a leho ne mua na pida i polotara pali, i uka ma mu kona hatekea. Na tahuna mu rata kamumua, e BAKOVI DAGI a Vure ne mua bara i rata a maka leho ne mua ri bele kamumu.

A Tuna Tabua na Bulmakau a Sipsip

19  d  “Mu vulaki a maka tuna tabua na bulmakau na sipsip ne mua, mu habi ne BAKOVI DAGI a Vure ne mua. Ra maka tuna bulmakau a sipsip nga ga toga, naha ni rata a tuna bulmakau ri gi leho, naha ni pali kudu a vuna tuna sipsip. 20 Na pida lobo mua turane huriki a kabu mua, mu bole a kania nga mu lakea na tabeke na murina ni vasileki na tabeke e BAKOVI DAGI a Vure ne mua i vulakia, mu kani vonga. 21 A maka bulmakau a sipsip ri gi tahoka a ngarava, ge marogo a maka vahane ria, ge kepa, ri nabatabuna, naha ni habi ne BAKOVI DAGI a Vure ne mua. 22 A maka sipsip a bulmakau nga mu kani na tanga mua, i manga kunana a hini mu kani a kania na robo. E huriki ri matapado, e huriki ri muto na matana Vure, ria lobo ri gi kani. 23  e Pali naha ni ninu a darana sipsip a bulmakau, mu guru vuroki puru na malala manga a naru.”

Copyright information for `BNP