d17:141Sam 8:5
e17:161Ki 10:28; 2Sto 1:16; 9:28
f17:171Ki 10:14-22,27; 11:1-8; 2Sto 1:15; 9:27

Deuteronomy 17

E Moses i ta tabu i ta maea, “Naha ni bolea a bulmakau a toga a sipsip i nabatabuna, mu gu habi ne BAKOVI DAGI a Vure ne mua. A naro iea i muma hateka na matane BAKOVI DAGI.

“Na tahuna ranga bakovi a ngatavine ri made na tanga tara e BAKOVI DAGI i habia ne mua, bara ri ratapilea a ngava dagi ne BAKOVI DAGI a Vure ne mua, ra naro iea kunana bara ri rata a naro hale. a Re huriki nga bara ri putu puru a vinara na Vure, ri kavurike a vure ranga, ri kavurike a haro, a keva, a hada, a taki ria nahea ri gi rata. Mua bara mu longo a viri i rata maea, mu kasisi kamumua, a ra vuhuna a maki i ratea. Na tahuna a maki i muma hateka iea ge bele muholi ne mua e huriki a Israel, mu bole talea na tanga a viri i ratea a naro iea, mu padia na kedo ge mate. b Ge tahoka a viri ge ala rua o ge ala tolu to go masia ra viri i rata a naro hale iea, mu rabalakia. A viri ge ala taku ge masia, naha ni rabalakia. c E huriki ri masia a viri iea i rata a naro hale, ri gi voro muga a kedo ri gi padia, muri i ranga e huriki ri gi padia na kedo. Mu padia ge mate bara mu bole vurokia a maki hale i bele na kurukurune mua.

“Na tahuna ranga maregoa i dagi hateka, lakea e huriki a mari ni pelekado a maregoa ri made na maka tanga ne mua bara ri keri ni pelekado ra maregoa maea: a viri i rabalaki a pile vona, a maregoa na viri i vatahate na malala, a maregoa na viri i vaubi i rabalakia a turana. Na tahuna a maka maregoa nga i taga hateka ne huriki a mari ni longona a ngava ri gi pelekado, mu lakea na tabeke e BAKOVI DAGI a Vure ne mua ge vakasiri mua vona. Mu vakalongo e huriki a prister na kabu ne Levi, a mari ni longo a ngava, ri gi pelekado ri gi vakaloboa. 10 Ria kunana ri gi pukatala a ngava na tahuna na nivapelekado, mu ramai a maki ri taki mua vona. Mu bolea ne ria a ngava, mu ramai muholi a maka ngava ri taki mua vona. 12 A bakovi tara i uka ma i longo mai a nitana mari ni longona a maregoa o a ngava na prister i rata a leho na matane BAKOVI DAGI, mu rabalakia a bakovi iea ge mate. I mavonga kunana bara mu bole vurokia a naro hale iea ne huriki a Israel. 13 E huriki bara ri longoa a velengana maki iea, ri mangenge, bara i uka tara viri ge tagege tabu.

A Ngava na Narona Hariki

14  d “Na tahuna mu bolea a malala e BAKOVI DAGI a Vure ne hita i ngaru ge habia ne mua, mu made vona, mu ngaru ge matakari mua tara hariki i manga e huriki na tabeke ranga. 15 Na tahuna iea, mu ule lakea ne BAKOVI DAGI ge vulakia a bakovi ge ia a hariki. Naha ni vulakia na ningaru ne mua. A hariki mu vulakia ge ia a tahotanga, nahea ge ia a mosi. 16  e A hariki, nahea ge bole a maka hos vona ge kupo. Nahea ge rudu e huriki a bakovi ri gi puru o Egipto, ri gi kona a maka hos. A vuhuna, e BAKOVI DAGI i taki e huriki a tara vona nahea ri gi hamule puru o Egipto tabu. 17  f A hariki, nahea ge parangi a ngatavine ge ala kupo, a vuhuna bara ri rata ia i ngalahere ne BAKOVI DAGI, i uka ma ge bole a maka gol a silva ge kupo.

18 “Na tahuna a bakovi ge bele manga a hariki, ge bolea na kabu ne Levi a puhu ni here a vinara na Vure vona, ge here poloa. 19 Na parava vakaroro a hariki ge bolea a puhu ge gia a vinara ne BAKOVI DAGI a Vure vona, ge ramai muholi a maka vinara vona. 20 Lakea i uka ma ge bibi rike mule a rana, ge vakakiroko e huriki a viri vona a Israel. Nahea tabu ge matataro a maka vinara ne BAKOVI DAGI. Ge ramai a maka naro nga, bara i leho manga a hariki na pida i kupo. Muri ma e huriki a hariki bara ri bele na kabu vona.”

Copyright information for `BNP