Deuteronomy 18

A Nihabi Ge ne Vona e Huriki a Prister a Levi

E Moses i ta tabu i ta maea, “E huriki a prister na kabu ne Levi, i uka ma ri gi bole a malala ge manga a maka kabu ranga ne hita a Israel. A maki ni kani ne ria, ri gi bole na nihabi e huriki ri habi ne BAKOVI DAGI. a A kabu ne Levi i uka ma ge bole a malala ge manga a maka kabu ranga. A maki kamumu ri bolea, ra leho manga a prister ne BAKOVI DAGI, i manga a ngava i ta muholi vona hosi.

“Na tahuna a bakovi tara i rabalakia tara bulmakau a toga, a sipsip i habi na Vure ge a nihabi ge bole a bobona na gepena, a bobona na dumena, a bobona na garena, a maka mahalana ge habi ne huriki a prister. Mu bole a maka vit ri moro muga, a vain ni bebe muga, a naruna oliv ni rata muga, a vuna sipsip ni pali muga, mu habi ne huriki a prister. E BAKOVI DAGI a Vure ne mua i uka ma i vulaki na kabu ranga ne Israel e huriki a prister, ri gi rata a leho vakaroro na rana. I vulaki kunana ria na kabu ne Levi.

“A bakovi na kabu ne Levi tara ge ngaru, bara i pe a tanga vona, i lakea na tabeke ni vasileki. Lakea bara i rata a leho na prister ne BAKOVI DAGI a Vure ne hita, turana e huriki a kabu vona ranga, ra ri leho na tanga iea. E huriki a prister ri gi bole a maki ni kani ge palupulupu. Pali a maki ranga tabu i habi a kabu ne ria, ri gi bole.

A Maka Naro i Muma Hateka

“Na tahuna mu bele vona a tanga e BAKOVI DAGI a Vure i habia ne mua, naha ni ramai a naro i muma hateka na maka kabu ri made muga vonga pali. 10  b Naha ni rabalaki e huriki e tune mua ge a nihabi na kanono. Naha ni nana a vure ranga, ri gi vakasiri mua na maki. Naha ni matataro e huriki, ri gi rata a naro na malulu, a naro na hanitu, a naro ni rata a muto, a naro ni rata a maguli. Naha ni ta turana a hanuna a viri i mate. 12 E BAKOVI DAGI a Vure ne hita i marikoi hateka ne huriki ri gi rata a maka naro i muma hateka maea. Na naro iea kunana bara i lili tala e huriki a tahotanga vona a maka tabeke na tahuna mu lokovonga tabukoi. 13  c A niluhoi ne mua ge lakea kunana ne BAKOVI DAGI a Vure ne mua. 14 E huriki a viri nga mu ngaru ni lokovonga, mu gu bole a malala ne ria ri ramai a nitane huriki a bakovi na malulu, ri ngaru ni longo a ra maki a vure ranga ri taki. Pali e BAKOVI DAGI a Vure ne mua, i marikoi hateka mu gu ramai a narone ria.

A Vure i Rudua a Propet Karaba

15  d  “Pali e BAKOVI DAGI, a Vure ne mua, bara i vulakia tara turane mua ge ia a propet manga iau, mu ramaia a nitana. 16 Na tahuna mu vapopo tabukoi na lolo e Sinai, mu nanea e BAKOVI DAGI nahea ge ta tabu. Mu marikoi ni masina a kanono dagi a Vure i made pololilo vona, a vuhuna mu mangenge hateka, mu luhoi bara mu longoa i ta, mu masia, ma mu gu mate.

17 “I mavonga, e BAKOVI DAGI i taki iau i ta maea, ‘A ninana ne ria i kamumu. 18 Ga vulakia na kurukurune ria tara bakovi ge ia a propet, ge manga ioe. Ga habi vona a maka ngava nau, ra a vakuku ia vona, ge vakalongo e huriki vona. 19  e Na ragu kunana a propet ge vakalongo a ngava. I ranga ge longotaro, bara i tahoka a ngava. 20 Pali na tahuna a propet tara i taki tavula a ngava na ragu, bara i mate. A propet tara i vakalongo a ngava na rana maka vure taminga, bara i mate.’

21 “Mu gu lohoka navai vona a nita na propet i valai ne BAKOVI DAGI o i uka? 22 Mu lohoka vona na tahuna a propet i vakalongo a ngava na rane BAKOVI DAGI, pali a maki i taki i uka ma i bele, ra propet iea i uka ma i bole a ngava ne BAKOVI DAGI. I vakalongo a ngava na ningaru vona kunana, naha ni mangenge vona.”

Copyright information for `BNP