Deuteronomy 19

A Tanga ne Vona ni Kapiloho

(Ni Gi 35:9-28; Iosua 20:1-9)

E Moses i ta tabu, i ta maea, “E BAKOVI DAGI a Vure ne mua bara i ratapile a maka kabu lobo na tabeke ta ge habia ne mua, bara mu bole lobo a tanga a ruma ne ria. Na tahuna mu made kamumu, mu nagia na tabeke ge tolu a robo iea e BAKOVI DAGI i habia ne mua. Na tabeke ge taku ge tahoka a tanga ge taku. A bakovi i uka ma ge malulu a tuhana ni ha lokovonga. A bakovi tara i rabalaki a viri i kara ni ha lokovonga, ge kapiloho vonga.

“A bakovi tara i rabalaki rurua tara turana, i uka ma ru varatatuhare muga, ra bakovi iea ge ha lakea vona tara tanga nga, ge made vonga. I manga i maea, a bakovi ala rua ru lakea na robo ru tolo a kai, lakea a bakovi i tolo a kai, i maparu a kira vona i rabalakia a turana, ra bakovi iea ge ha lakea vona tara tanga, ge vakakoria. A tanga i taku kunana bara i pesi, i uka ma ge kamumu hateka. A tanga bara i pesi basi hateka, lakea a bakovi ni koli a matenga na turana bara i madihi a hatena, i nugutatea, i rabalaki tavulea a bakovi iea. Pali ra bakovi i rabalaki ruru a turana, i uka ngava. A kira kunana i maparu i rabalakia a turana. Na naro iea kunana a taki tora mua mu ru here a tanga ge tolu, ge ne mua.

“Muri e BAKOVI DAGI bara i hudo tala a malala ne mua ge dagi, i manga a hini i ta muholi vona ne huriki a gare ne mua hosi. Bara i habi loboa ne mua a malala i ta muholi vona ne ria. Na tahuna iea mu vulaki tabu a tanga ge tolu. Na tahuna mu rata lobo a maka maki a vakuku mua vona, mu ngaru hatekea e BAKOVI DAGI a Vure ne mua, mu ramai vakaroroa a nitana, bara i habi loboa ne mua ra malala iea. 10 Mu vulaki tabu a tanga ge tolu ne vona ni kapiloho. Na tahuna mu made vona a malala iea, bara mu uka a ngava vona a bakovi mu rabalaki ruru.

11 “Bara bakovi tara i tepua a turana, i kapiloho i rabalakia, muri i ha lakea vona tara tanga nga, 12 e huriki a matakari na tanga vona ri gi nana e huriki a matakari na tanga ni kapiloho, ri gi rudu hamulea na tanga vona. Muri bara ni habi lakea na bakovi ge koli a vuranga ne turana, ge rabalakia. 13 Naha ni dodoa, a vuhuna i rabalaki tavulea a bakovi o Israel. A naro iea kunana bara i vakalobo a rarenga, mu made na nivalemu.

14  a  “Naha ni palele a nagi na malala mu ru vanagi vona a turamu, a vuhuna ra nagi iea ni ru hosi na malala iea, e BAKOVI DAGI a Vure ne mua ta ge habia ne mua mu gu made vona.

A Vinara na Viri i Matai a Vuranga

15  b  “Na tahuna a bakovi ala taku kunana i masia a bakovi i rata a naro hale, i vakalongo na nivapelekado, a mari ni longo a ngava nahea ge longo maia. A viri ge masia ge ala rua o ge ala tolu, bara i kara ni pelekado.

16 “A bakovi tara i toni ni habi a vuranga vona tara bakovi, i tatami ta i putu puru a vinara, 17 ra bakovi nga varago ru gu lakea ru gu pesi na matane BAKOVI DAGI, lakea a mari ni longo a ngava, a prister, ru gu kado a nitane rua na matane BAKOVI DAGI. 18 E huriki a mari ni longo a ngava ri gi kado kamumu a ngava. Na tahuna ri lohoka vona a bakovi i taki tala a turana i tatami, i kau virihi tavulea na ngava, 19 ra bakovi iea ge bole a nikoli ra ni taki ta ge bolea a bakovi ni pelekado. Mu rata mavonga, bara mu rata vurokia ra naro hale maea. 20 E huriki lobo bara ri longoa a velengana maki, bara ri mangenge, ri matadoko nahea tara bakovi ge rata tabua a naro maea. 21  c Naha ni dodo a bakovi na taminga. Ia ge ngaru a turana ge mate, ia kunana ge mate. Ia ge ngaru a matana, a ngina, a limana, a vahana turana ni gi ratapile, a naro iea kunana ni gi rata virihi ia vona.”

Copyright information for `BNP