Deuteronomy 27

A Dede na Lolo e Ebal

E Moses i pesi turane huriki a gare ne huriki a Israel, i vakuku e huriki i ta maea, “Mu ramai a maka vinara a habi ne mua mona. a Na parava mu tulu poloa a naru e Iordan, mu gu lakea vona a malala e BAKOVI DAGI a Vure ne mua ge habia ne mua, mu bole a maka kedo dagi mu kavitagu na simen. Muri na tahuna mu bele vona a malala kamumu iea e BAKOVI DAGI a Vure ne huriki a gare ne hita hosi i ta muholi vona ge habia, mu here langa na kedo a maka ngava na vinara. Na tahuna mu bele pali na tabeke mule lokovonga ne Iordan, mu vakapesi a maka kedo nga na lolo e Ebal, mu kavitagu na simen i manga ngane a taki mua. b Mu bole ranga kedo mu ratea a dede. E huriki ri hae a dede nahea ri gi ubikeve a kedo ri gi haea vona a dede. Mu bole a maka kedo i uka ma ni ubikeve, mu haea vona a dede ne BAKOVI DAGI a Vure ne mua. A maka nihabi ni gutu-vuro mu rata langa na dede lakea ne BAKOVI DAGI a Vure ne hita, turana a nihabi na nivalemu turana Vure. Mu kani mu vivi vona a bobona sipsip a bulmakau na nihabi, ne vona ni rata a nivalemu na matane BAKOVI DAGI a Vure ne hita. Na maka kedo mu kavitagu na simen, mu here langa kamumu ne ria a maka vinara.”

Muri e Moses turane huriki a prister na kabu ne Levi, ri gi taki e huriki a Israel ri gi ta maea, “Mua lobo mu vulai, mu longo valai. Mua ngane mua e huriki a tara ne BAKOVI DAGI a Vure ne hita. 10 Mu longototo a maka nitana, mu ramai a maka vinara vona a habi ne mua mona.”

11 E Moses i vakuku tabu e huriki a Israel i ta maea, 12  c  “Na tahuna mu tulu poloa pali a naru e Iordan, a kabu ne Simion, ne Levi, ne Iuda, ne Isikar, ne Iosep, ne Bensamin ri gi lakea na lolo e Gerisim, ri gi habi a ngava kamumu ne huriki. 13 A kabu ne Reuben, ne Gad, ne Aser, ne Sebulun, ne Dan, ne Naptali ri gi pesi na lolo e Ebal ri gi taki ne huriki a maka niruduraha.

14 “E huriki a Levi ri gi ta tora lakea ne huriki a Israel ri gi ta maea: 15  d  ‘A viri ge kau a vure taminga na kai o na kedo o na aen i kavurike kapilohoa, a Vure bara i habi a vuranga vona a bakovi iea. Ra maka maki nga ri kau, a Vure i marikoi hateka ri gi kavurike.’ E huriki lobo ri gi koli ri gi ta maea, ‘A ngava i muholi hateka.’

16  e  “‘A bakovi i rata hale e tamana e kinana, a Vure bara i habi a vuranga vona a bakovi iea.’ E huriki lobo ri gi koli ri gi ta maea, ‘A ngava i muholi hateka.’

17  f  “‘A bakovi ge palele a nagi na malala na turana, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’

18  g  “‘A bakovi i tamia na dala a kepa i uka ma i ramai a dala vona, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’

19  h  “‘A Bakovi i rata hale e huriki a mosi, e huriki a tuna duku, e huriki a havuri, a Vure bara i habi a vuranga vona.’ Muri e huriki lobo ri gi koli ri gi ta maea, ‘A ngava i muholi hateka.’

20  i  “‘A bakovi i mahita turane girihine tamana, a Vure bara i habi a vuranga vona a bakovi iea. Ra naro i ratea i vakamaruhu e tamana.’ E huriki lobo ri gi koli ri gi ta maea, ‘A ngava i muholi hateka.’

21  j  “‘A bakovi tara i tari a ligo o a boro o a maki tara, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’

22  k  “‘A bakovi i mahita turane kurabana, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’

23  l  “‘A bakovi i mahita turane lahuana ngatavine, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’

24 “‘A Bakovi i kapiloho i rabalakia a turana, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’

25 “‘A bakovi ni kona i rabalaki tavulea a viri tara, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’

26  m  “‘A bakovi i uka ma i nugutata tora a vinara ge ramai, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’”

Copyright information for `BNP