b28:56-572Ki 6:28-29; Kra 4:10

Deuteronomy 28

Mu Ramai a Vinara Bara Ni Rata Kamumu

(Levi 26:3-13; Vinara 7:12-26)

a E Moses i ta tabu i ta maea, “Na tahuna mu ramai a nitane BAKOVI DAGI a Vure ne mua, mu ramai kamumu a maka vinara vona a habi ne mua ngane, bara i vakadagi a rane mua, mu rangi a kabu lobo na malala. Mu ramai a maka nitane BAKOVI DAGI a Vure ne mua, bara i habi ne mua a maki kamumu nga:

  • “Bara i gamai a maka tanga, a hania ne mua.
  • “Bara i gamai e huriki e tune mua, i rata a maka maki ni kani ri bele kupo na hania. A maka bulmakau a sipsip ranga, bara i habi kupo ne mua.
  • “Bara i gamai a maka hania na vit turana a maki ranga mu varo na hania.
  • “A Vure bara i gamai a maka leho ne mua ri bele kamumu hateka.
“E BAKOVI DAGI bara i tuhori mua i ratapile e huriki a pile, i rata ria ri ha vapida na maka dala i kupo. E BAKOVI DAGI a Vure ne mua bara i rata a maka leho ne mua ri bele kamumu, bara i rata a maka vit ne mua ri bele kupo, bara mu vakavonu a maka roho ni ru palupu a maka maki ni kani. Bara i matakari mua vona a robo ge habia ne mua.

“Na tahuna mu ramai a maka ngava ne BAKOVI DAGI a Vure ne mua, mu rata a maka maki ge manga a hini i taki, bara i taba mua a kabu vona kunana, i manga a ngava i ta muholi vona hosi. 10 Muri e huriki na malala bara ri matakilaka vona e BAKOVI DAGI kunana i vulaki mua, ge mua e huriki a tara vona, lakea bara ri mangenge ne mua. 11 E BAKOVI DAGI bara i habi ne mua e huriki e tune mua ri ala kupo, a maka bulmakau ri kupo, a maka maki ni kani na hania bara ri bele kupo vona a robo i ta muholi vona ge habia ne mua.

12 “E BAKOVI DAGI i matakari a vala, bara i vakaboru na tahuna na vala. Bara i rata a maka leho ne mua ri bele kamumu hateka. Lakea e huriki ranga bara ri nana mua na maki mu habi, pali mua i uka ma mu gu ngaru ni nana ria. 13 Mua bara mu ramai kamumu a ngava lobo ne BAKOVI DAGI a Vure ne mua, bara i rata mua mu muga ne huriki, i uka ma mu gu muri ne ria. Bara mu tahoka vakaroro a maka maki i kupo, i uka ma mu gu bala vona tara maki. 14 Pali a ngaru mua mu gu ramai lobo a maka vinara, naha ni longotaro mu gu ramai a vure ranga, mu gu rata a leho ne ria.

E Huriki Ri Longotaro a Vinara Bara Ri Vurua

(Levi 26:14-46)

15 “Pali mua bara mu longotaro a nitane BAKOVI DAGI a Vure ne mua, i uka ma mu ramai kamumu a maka vinara vona ra a habi mua ngane, a maka vuranga bara ri bele ne mua ri vakahale mua.

16 
  • “Bara ri ratapile a maka tanga, a hania ne mua.
17 
  • “Bara ri ratapile a maka hania na vit turana a maki ranga mu varo na hania.
18 
  • “Bara ri ratapile e huriki e tune mua, ri rata a maka maki ni kani bara ri uka a kanena. A maka bulmakau a sipsip ranga, i uka ma ri gi poda kupo.
19 
  • “A maka leho mu rata bara ri bele hale kunana.
20 “Na tahuna mu ngalahere ne BAKOVI DAGI mu rata a naro hale, bara i rata a maka maki hale legelege ri bele ne mua. Bara i vakamanga mua, a maki lobo mu rata bara ri tabuli viliha ri hale. I uka ma ge tabaka bara mu bole a vuranga. 21 Bara i rudu a maka gilanga legelege i bele ne mua, i vakalobo liu mua vona a malala mu gu bolea. 22 E BAKOVI DAGI bara i vakamadihi mua na maka gilanga hale, a kuline mua bara i vaki i rongo, bara i ratea a haro i kara hateka, i rudua a vilu dagi i ratapile a maka maki ni kani na hania. Ra maka maki hale nga bara ri tabuli turane mua ge harena na tahuna mu mate vona. 23 A vala i uka ma ge boru, a malala bara i tora manga kedo. 24 E BAKOVI DAGI bara i kuloia a vala i rudua a vilu dagi i valai turana a habulo a hire, ge harena na tahuna mua lobo bara ni ratapile.

25 “E BAKOVI DAGI bara i matataro e huriki a pile ri ratapile mua. Bara mu laho na dala i taku mu vano mai ria na vabinga, pali bara ri pahalili mua, mu ha vapida na maka dala i kupo. E huriki lobo na malala bara ri matai a maki nga ri bele ne mua, bara ri mangenge hateka. 26 A maka kadirovo a livoa bara ri valai ri kani a maka podane mua, bara i uka viri ge lili tala ria. 27 E BAKOVI DAGI bara i rata a maka loto ri tuvu ne mua, i manga a hini i rata virihi e huriki a Egipto. Bara i rata a maka ngarava dagi ri tuvu viliha na kuline mua. A maka buhira bara ri tuvu lae na kuline mua, ri makali hateka, pali mua mu uka dala mu gu ratea a gilanga iea ge lobo. 28 E BAKOVI DAGI bara i vakaviliha a maka niluhoi ne mua, i vakakepa mua bara mu vuru viliha lae. 29 Na haro bara mu laho manga a viri i kepa mu matakanea a dala, pali i uka ma mu gu matavisia. A maka maki mu rata i uka ma ri gi bele kamumu. Vakaroro bara ri vakahale mua ri panaho a maka maki ne mua, bara i uka viri ge tuhori mua.

30 “Na tahuna mu habikaria a ngatavine ge parangi na bakovi, a bakovi iea i uka ma ge parangi vona. A bakovi tara bara i parangi vona. Bara mu hae a ruma, pali i uka ma mu gu made vona. Bara mu varo a hania na vain, pali i uka ma mu gu kani a kanena. 31 E huriki a pile bara ri rabalaki a maka bulmakau ne mua na matane mua, pali i uka ma mu gu kani ranga. Bara mu matanono kunana, ni turari tala a maka donki ne mua, i uka ma mu gu bole mule. Bara ri valai ri bole a maka sipsip ne mua, bara i uka viri ge kori mua ni bole mule. 32 Bara mu matanono kunana e huriki a bakovi na tanga basi ri boko e huriki e tune mua, ri vano turana. Na parava vakaroro bara mu pasimata ne huriki e tune mua ri gi hamule. Bara mu matanonoa a dala, pali bara mu mata mata bara i madihi tavula a matane mua. Bara i uka tara maki mu gu ratea mu gu bole mule e huriki e tune mua. 33 E huriki a bakovi na robo basi i uka ma mu lohoka vona, bara ri valai ri bole lobo a maka maki ni kani mu leho hateka ni varo. Vakaroro bara ri rata hale mua, ri vakamadihi mua. 34 Bara mu matai a maka maki hale nga, a niluhoi ne mua bara ri viliha lae. 35 E BAKOVI DAGI bara i rata a maka ngarava hale ri bele na maka vahane mua, a maka loto bara ri tuvu viliha na kakaine mua. Bara mu uka a dala mu gu rata ge kere a maka ngarava, ge lobo a maka loto.

36 “E BAKOVI DAGI bara i bole mua turana a hariki ne mua mu lakea vona tara robo, hosi mua turane huriki e tubune mua i uka ma mu lokovonga vona. Bara mu made vona a tanga iea, mu kavurike a vure taminga ne ria, ra ni kau na kai, na kedo. 37 E BAKOVI DAGI bara i lili tala mua vona a tanga iea, mu laho viliha. E huriki bara ri matai a maki hale ri bele ne mua, bara ri turutu, ri nongo vaki ri padikede mua.

38 “Bara mu varo a maka maki ni kani i kupo, pali a maka koa bara ri ratapile ria, mu bole a maki popote kunana. 39 Bara mu varo a vain na hania mu matakari, pali a maka mata kiroko bara ri ratapile ria. Lakea i uka ma mu gu pasi a kanena vain mu gu rata a vain. 40 A maka kai a oliv ri koru kamumu na malala ne mua, pali na tahuna a maka kanena oliv i uka ma ri rara ma, bara ri mapasi tavula puru na malala, i uka ma mu gu bole a namone ria. 41 Bara mu tahoka e huriki e tune mua, pali i uka ma ri gi made tata turane mua. E huriki a pile bara ri valai, ri bole lakea ria na tanga ne ria. 42 A maka koa bara ri ratapile a maka kai, a maki ni kani na hania ne mua.

43 “E huriki a mosi ri made na robo ne mua bara ri gao hateka ne mua, pali mua bara mu tuha malulu. 44 Bara ri tahoka a maka maki i kupo, i kara mu gu nana mu gu bole ne ria, pali i uka ma ri gi nana ri gi bole ne mua.

45 “Ra ni ruduraha nga bara ri bele ne mua ge harena na tahuna bara mu lobo liu, a vuhuna i uka ma mu ramaia a nitane BAKOVI DAGI a Vure ne mua, i uka ma mu ramai a maka vinara vona i habi ne mua. 46 Bara ri manga a nivakasiri ri tabuli vakaroro ne mua turane huriki a hamone mua. 47 E BAKOVI DAGI a Vure ne mua i habi ne mua a maka maki i kupo, pali mua i uka ma mu vivi, mu gu hate taku mu gu rata a leho vona. 48 I mavonga e BAKOVI DAGI bara i rudu e huriki a pile ri valai ri vaubi ne mua, bara mu rata a leho ne ria. Bara mu vitolo, mu marohu, mu bala a varakia turana a maka maki ranga. E huriki a pile ne mua bara ri vadede langa ne mua ge harena na tahuna ri pahabebe mua.

49 “E BAKOVI DAGI bara i bole valai e huriki na tanga basi, i uka ma mu lohoka na nitane ria. Bara ri valai vakaturutu manga a loha i lakavu a manu. 50 Na tahuna ri valai i uka ma ri gi dodoa tara viri. A koma a gare ranga i uka ma ri gi dodo. 51 Bara ri bole lobo a maka bulmakau, a sipsip, a maki ni kani na hania, a vit, a vain, a naruna oliv, muri bara mu vitolo mu mate.

52 “E huriki a pile bara ri pesi halui a maka tanga ne mua, i harena na maka nure dagi na tanga ne mua ri mapuka, muri bara ri ratapile a maka tanga na robo e BAKOVI DAGI a Vure ne mua i habia ne mua. 53 Na tahuna e huriki a pile bara ri valai ri pesi haluia a tanga ne mua, bara mu bala a maki ni kani, mu rabalaki e huriki e tune mua, e BAKOVI DAGI a Vure ne mua i habi ne mua. 54 Na tahuna iea e huriki a bakovi i uka ma ri kara ni rabalaki e tune ria, ria ranga bara ri rabalaki e huriki e tune ria ri kani. Pali i uka ma ri gi habi ne turane ria, ne girihine ria, ne tune ria ri mahuri ranga balena koma, a vuhuna i uka ranga maki ni kani ge tababana. 56  b A ngatavine na tagenga na kurukurune mua, ia tara, a naro bara ri ratea i maea kunana. Ia ge poda a koma na tahuna e huriki a pile ri pesi haluia a tanga, bara i kani kapilohoa turana a kirina e tuna, i uka ma ge habi a kalavana ne girihina o ne huriki e tuna ri mahuri, a vuhuna na maregoa dagi e huriki a pile ri rata na maka tanga.

58 “Mua i uka ma mu ramai kamumu a maka nita na vinara i tabuli vona a puhu iea, i uka ma mu togo a rane BAKOVI DAGI a Vure ne mua ra i polomeli hateka, 59 e BAKOVI DAGI bara i rudu a maka gilanga hale legelege, ri rike ri madoko tata ne mua vakaroro turane huriki a hamone mua. 60 A maka gilanga hale ri madoko ne mua, ri manga a maka gilanga mu matai o Egipto, ra mu mangenge hateka ne ria. 61 E BAKOVI DAGI bara i rudu valai ne mua tabu a maka gilanga hale, a rane ria i uka ma ri tabuli na puhu iea, ri vakalobo liu mua. 62 Hosi mu ala kupo manga a hada na hunu. Pali ngane i uka ma ge kupo ne mua mu gu mahuri, a vuhuna i uka ma mu ramai a nitane BAKOVI DAGI a Vure ne mua. 63 Muga e BAKOVI DAGI i ngaru hateka ge rata mua mu gu bele kupo mu gu tahoka a maki. Pali ngane e BAKOVI DAGI i ngaru hateka ge ratapile, ge vakalobo liu mua vona a malala mu ngaru ni vano ni made vona.

64 “E BAKOVI DAGI bara i vakalipida mua mu made turana a maka kabu lobo na malala, mu kavurike a maka vure ne ria ni kau na kedo, na kai, hosi mua turane huriki a gare ne mua i uka ma mu lohoka vona. 65 Na tahuna mu made turana a maka kabu nga, i uka ma mu gu matavisi a nimade kamumu. Bara mu bala a tanga na tabeke mu taki ta a malala ne mua. E BAKOVI DAGI bara i rata mua mu luhoi viliha, i madihi a hatene mua, bara mu luhoi mu velu pali. 66 Na parava vakaroro bara mu luhoi ni bole a vuranga. Na haro, na rodo bara mu mangenge hateka na matenga. 67 A maka maki mu matai bara ri rata mua mu mangenge hateka. Lakea mu ngarua a parava ge lobo malaviriri. Na maka hatelanga lobo bara mu ta maea, ‘Ge malunga malaviriri a hini, bara i kamumu.’ Na maka malunga lobo bara mu ta maea, ‘Ge hatelanga malaviriri a hini, bara i kamumu.’ 68 E BAKOVI DAGI i taki i uka ma mu gu hamule lakea tabu o Egipto. Pali i uka maki, bara i vakarike mua na aga mu puru o Egipto, mu ngaru e huriki a pile ri gi kona mua ge mua a vorakato ne ria, pali bara i uka viri ge kona mua.”

Copyright information for `BNP