Deuteronomy 30

Mu Hamule Mai a Vure Bara Mu Made Kamumu

E Moses i ta tabu i ta maea, “Ngane mu lohoka vona a dala i rua mu gu ramai. A dala ni bolena a maki kamumu, a dala ni bolena a maki hale. Mu vulakia a dala mu gu ramaia. Na tahuna a maka maki hale ri bele ne mua, mu made na kurukurune huriki a kabu ranga, na tanga e BAKOVI DAGI a Vure ne mua i rudu lakea mua vona, mu luhoi ra dala nga a vakasiri mua. Na tahuna mua, turane huriki a hamone mua, mu pulo a vilone mua mu ramaia e BAKOVI DAGI na hatene mua, mu luhoi tora a maka vinara a habi ne mua ngane, e BAKOVI DAGI a Vure ne mua bara i dodo mua. Bara i bole mule mua vona a robo i rudu lakea mua vona, i tuli valai mua koea na robo ne mua. A maka maki ne mua bara i rata ri bele kamumu tabu. Naha ni loho paepae vona na tahuna mu made na robo i basi, a vuhuna e BAKOVI DAGI a Vure ne mua bara i vakalipopo mua i taparaki mule valai tabu mua. Bara mu made kamumu vona tabu a malala i made vona e huriki a gare ne mua hosi. Lakea e BAKOVI DAGI a Vure ne mua bara i rata mua mu bele kupo mu tahoka a mahala i kupo, mu rangi e huriki a gare ne mua. Bara i rata mua turane huriki a hamone mua, mu pulo a niluhoi ne mua, mu ramai a ngavana, bara mu ngaru hatekea, mu made vakaroro vona a malala iea. A maka maki hale a taki mua vona, e BAKOVI DAGI bara i rata i bele ne huriki a pile i uka ma ri ngaru mua, ri rata hale mua. Pali mua bara mu longo, mu ramai tabu a maka vinara vona ngane a habi ne mua. E BAKOVI DAGI bara i rata a maka leho ne mua ri bele kamumu. Bara mu tahoka e huriki e tune mua ri ala kupo, a maka bulmakau i kupo, a maka maki ni kani bara ri koru kamumu na hania. E BAKOVI DAGI bara i vivi ne mua, i habi a maka mahala i kupo ne mua, i manga a naro i rata ne huriki a gare ne mua. 10 Pali mua mu ramaia a nitane BAKOVI DAGI a Vure ne mua, turana a maka vinara vona ri tabuli na puhu iea. Mu hamule valai vona, mu ngaru hatekea na hatene mua, na niluhoi ne mua.

11 “A ngava ngane a habia ne mua mu gu lohoka vona mu gu ramai, i uka ma i tora hateka ne mua. 12  a Ra ngava iea i uka ma i tabuli polomeli na bubu. Naha ni nana, ‘E rei a viri ge sike ge bole puru valai a maka vinara, mi gi longo mi gi ramai?’ 13 Ra vinara nga i uka ma i tabuli na tabekena dari tara, lakea ma mu gu nana, ‘E rei a viri ge lakea lake ge bole valai a maka vinara mi gi longo mi gi ramai?’ 14 I uka, ra ngava nga i tabuli tabukoi hateka ne mua, pololilo na hatene mua, na ngutune mua. Ngane mu lohoka vona mu kara ni vakalongo, mu ramai vakaroroa a nita iea.

15 “Ngane a vakasiri mua vona a dala ni made kamumu, a dala bara mu bole a nimadihi a vuranga vona. 16 Mona a taki tora mua mu ngaru hatekea e BAKOVI DAGI a Vure ne mua, mu ramai a maka nitana, mu rata a maka naro i ngaru. Muri bara i rata kamumu mua mu bele kupo, mu made tabaka vona a malala bara mu dili mu bolea ngane.

17 “Pali mua bara mu longotaro a ngavana, mu longototo e huriki ranga ri luke mua mu kavurike a vure ne ria, 18 bara mu velu liu. Mu longo, iau a vakalongo kavakava mua. Mua bara mu longotaro a ngava, bara i ratapile mua, i uka ma mu gu made tabaka vona a malala bara mu bolea na tabeke ne Iordan mule lokovonga.

19 “Mu lohoka vona i tahoka a dala ni mahuri, a dala na matenga. Na dala tara a Vure bara i rata kamumu mua, na dala tara bara mu bole a vuranga vona. Ngane mu vulaki e rei a dala mu gu ramaia. Ga gale a hunu a malala ru gu matai mua, ru gu lohoka vona e rei a dala mu vulakia. Pali iau a ngaru mua mu gu ramaia a dala ni made kamumu, lakea mua turane huriki e tune mua mu gu made tabaka. 20  b I maea bara mu ngaru hatekea e BAKOVI DAGI a Vure ne mua, mu longototo a nitana na hatene mua vakaroro. Bara mu rata mavonga, e huriki a hamone mua bara ri made tabaka vona a robo e BAKOVI DAGI i ta muholi vona ge habia ne huriki a gare ne mua hosi e Abraham, e Isak, e Iakop.”

Copyright information for `BNP