Deuteronomy 4

E Huriki a Israel Ri Gi Longototoa a Vure

E Moses i tababana ni vara, i ta maea, “O huriki a Israel, mu ramai a maka vinara a tovo mua vona, bara mu made kamumu, mu dili mu made vona a malala e BAKOVI DAGI a Vure ne huriki a gare ne mua i habia ne mua ngane. a Naha ni hudo talea na vinara tara ngava karaba, ra maka vinara ne BAKOVI DAGI a Vure ne hita a habi ne mua. Naha ni vurokia tara ne ria. Mu ramai lobo a vinara nga. b Mua lobo mu masia pali a maki e BAKOVI DAGI i rata o Bal-Peor. I kupo e huriki ri kavurike a vure e Bal na tanga iea, lakea e BAKOVI DAGI a Vure ne hita i ratapile ria. Pali mua e huriki mu pesi tora ni ramai e BAKOVI DAGI a Vure ne hita, mu tababana ni mahuri.

“A tovo mua lobo pali na maka vinara, i manga a hini e BAKOVI DAGI a Vure ne hita i taki iau vona. Ngane bara mu dili mu bolea a robo iea mu gu made vona. Na tahuna mu made vona, mu ramai a maka vinara. Mu ramai muholi a maka vinara nga, lakea e huriki na kabu ranga bara ri lohoka vona mua mu tahoka a niluhoi kamumu, mu tahoka a maka lohokanga dagi. Na tahuna ri longoa a maka vinara nga bara ri ta maea, ‘Re huriki a bakovi a ngatavine nga, ri tahoka a niluhoi kamumu, ri rangi hita.’

“Mu luhoi e huriki a tara ranga. I uka maki vona ri tahoka a nitora dagi, i uka tara vure ge matakari ria ge tuhori ria, ge manga e BAKOVI DAGI a Vure ne hita i rata ne hita. E BAKOVI DAGI i made vakaroro tabukoi ne hita, na tahuna si galea, i tuhori hita. E huriki ranga, ri uka a vinara ge malamala ge manga a maka vinara a tovo mua vona.

“Mu matadoko kamumu. Na tahuna mu made na malala iea, naha ni longokaburungi a maka maki mu matai pali. Mu vakalongo e huriki e tune mua, e tubune mua 10 na parava mu pesi tabukoi ne BAKOVI DAGI a Vure ne hita na lolo e Sinai. Na tahuna iea a Vure i taki iau i ta maea, ‘Moses, o gale palupu e huriki ri gi vapopo, ri gi longo a maka ngava ga taki. A ngaru ria ri gi togo ri gi ramai iau kunana na tahuna ri made na malala. Ri gi tovo e huriki e tune ria, lakea e huriki e tune ria ri gi ramai iau.’

11  c  “A Vure i ta lobo, muri mua lobo mu valai mu pesi tabukoi na lolo, mu matai a uvo a havu ru kavitagua a lolo, a kanono i hube rike na hunu. 12 Pali re BAKOVI DAGI i made pololilo vona a kanono iea i ta, mu longoa a nitana, pali i uka ma mu masia a kakaina, mu longo kunanea a lohona. 13  d Na tahuna iea a Vure i habia ne mua a vinara vona i ravulu, i here na tabekena kedo i rua. Ra vinara nga, ri manga a maka ngava dagi i rata turane mua. I taki mua mu gu ramai a maka vinara nga. 14  e E BAKOVI DAGI i taki iau ga tovo mua vona a maka vinara ranga, mu gu ramai na tahuna mu made vona a maka tabekena malala, ra a taki mua vona mu gu bole, mu gu made vona.

Naha Ni Ramai a Vure Ranga

15 “Na tahuna e BAKOVI DAGI i made na kanono na lolo e Sinai i ta lakea ne mua, i uka ma mu masia tara maki ge a kilakilana, mu longo kunanea a lohona. Ngane mu matadoko kamumu, 16  f naha ni kau a maki ni kavurike. Mua bara mu rata mavonga, bara mu rata a naro hale. Naha ni rata a hanuna bakovi, a hanuna ngatavine, a hanuna livoa, a hanuna kadirovo, a hanuna mata, a hanuna manu, ge a vure ne mua. 19 Naha ni kavurike a maka maki mu matai na hunu, ra haro, a keva, a maka hada. E BAKOVI DAGI a Vure ne hita, i ru a maki nga ne vona e huriki lobo. 20  g Pali mua, e BAKOVI DAGI i bole tala mua o Egipto i taparaki valai mua koea, i manga kunana a hini i bole tala mua na kanono i kara hateka. I bole valai mua koea ge rata mua ge mua e huriki a tara vona, i manga mua mona.

21  h  “A maregoa ne mua, e BAKOVI DAGI a Vure ne mua i madihi a hatena nau. I kaba, i taki iau nahea ga tulu poloa a naru e Iordan, ga lakea vona a robo iea i tahoka a malala kamumu hateka, ta ge habi poloa ne mua. 22 Iau i uka ma ga tulu poloa a naru e Iordan, bara mate koea kunana. Pali mua bara mu tulu poloa a naru, mu made na tabeke lake na malala kamumu hateka. 23 Mu matakari kamumu mua, naha ni vurokia a ngava dagi ne BAKOVI DAGI a Vure ne hita i ratea ne mua. Mu ramaia a nitana, i uka ma mu gu rata a hanuna maki legelege, mu gu kavurike. 24  i Naha ni rata mavonga, a vuhuna e BAKOVI DAGI a Vure ne hita i bage, maea naha ni kavurike a vure ranga. A Vure i manga a kanono i kara hateka, bara i gutu parina e huriki a pile vona.

25 “Muri na tahuna mu made tabaka pali vona a malala iea mu tahoka e huriki e tune mua e tubune mua, naha ni ratea tara hanuna maki. Mua bara mu rata a maki maea, mu rata a naro hale hateka na matana Vure, bara i ratea i tahate hateka. 26 Mu longo ngane a gale a hunu a malala, ru gu longoa a nita tora nau a ratea ne mua. Mua bara mu longotaro a nitana Vure, mu matadoko! A Vure bara i malaviriri kunana i bole vuroki mua na malala na tabeke lake ne Iordan, ra ta mu gu bolea ngane, bara mu lobo liu. 27  j E BAKOVI DAGI bara i lili tala mua, mu made viliha turana a maka kabu ranga, pali a tara popote kunana bara ri mahuri. 28 Na robo nga, bara mu kavurike a maka vure ni rata na kai, na kedo. Ra vure nga, i uka ma ri matai a maki, i uka ma ri longo a nita, i uka ma ri kani a maki, i uka ma ri burongi a maki. 29  k Na tahuna iea bara mu kilu, mu ngaru ni hamule valai ne BAKOVI DAGI a Vure ne hita. A ningaru ne mua, a niluhoi ne mua, bara i tora hateka ni matakanea, muri bara mu valai tabukoi vona. 30 Pali na tahuna mu tahoka a maregoa dagi, a maka maki hale ri bele ne mua, bara mu pulo a hatene mua, mu ramai a nitane BAKOVI DAGI a Vure ne mua. 31 Ia a Vure na nidodo. I uka ma ge pe mua, o ge rata hale mua, o ge longokaburungia a nita na ngava dagi i ratea ne huriki a gare ne mua hosi.

E BAKOVI DAGI Kikeri Ia a Vure

32 “Mu luhoi mulea a tahuna hosi, na tahuna i uka ma mu bele ma, na tahuna a Vure i rata rike a bakovi na malala. I tahoka tara maki dagi maea ge bele, o a maki dagi maea ni gi longo? 33 I tahoka ranga kabu hosi ri longoa a Vure i ta tala na kanono i mahuri? 34 E BAKOVI DAGI a Vure ne hita i bole tala hita o Egipto, i taparaki valai hita koea, i rata hita, hita e huriki a tara vona. Na matane mua i rata a maka leho i kupo na nitora vona. I rata a maka gilanga dagi ri bele ne huriki a Egipto, i vaubi hateka ne ria. I rata a maka nivakasiri, i rata a maka maki dagi i rata ria ri mangenge hateka. I tahoka tabu tara vure i kara ni ratana a maka maki nga? I uka liu.

35  l  “E BAKOVI DAGI i vakasiri mua vona a maki nga, mu gu lohoka vona ia kikeri ia a Vure, i uka tabu tara vure. 36 I ngaru ni tovo mua, i ngaru mu gu longoa a ngavana ra i ta valai na hunu. Na malala mu masia a kanono dagi vona, i made pololilo vona, i ta lakea ne mua. 37 E BAKOVI DAGI i ngaru hateka e huriki a gare ne mua, i vulaki mua, ge mua e huriki a tara vona. Na nitora dagi vona i bole tala mua o Egipto, i taparaki valai mua koea. 38 Na tahuna mu laho valai i ratapile a maka kabu hateka. A nigao ne ria i dagi hateka na nigao ne mua. I rata mavonga, i ngaru ni bole valai mua, ge habia ne mua a malala ne ria, ra mu made vona ngane.

39 “Ngane naha ni longokaburungi a maki nga. E BAKOVI DAGI, a Vure na hunu, na malala. I uka tabu tara vure. 40 Mu ramai lobo a maka vinara vona i habi ne mua ngane. Mua, turane huriki a hamone mua, bara mu made kamumu. Bara mu made tabaka vona a malala e BAKOVI DAGI a Vure ne hita, i habia ne mua.”

A Tanga Dagi ne Vona ni Kapiloho

41  m Muri e Moses i ru herehere a tanga i tolu na tabeke na nirikena haro na naru e Iordan. 42 Ra tanga nga ge tabuli manga a tanga na nikapiloho ne huriki ri rabalaki ruru a turane ria. Re huriki a bakovi maea ri gi ha lakea vona tara tanga nga, ge vakakori ia. 43 Ra tanga nga, e Beser, e Ramot, e Golan. E Beser a tanga ni kapiloho na kabu ne Reuben, i pesi na lolo. E Ramot a tanga ni kapiloho na kabu ne Gad, i pesi na malala ne huriki a Gilead. E Golan a tanga ni kapiloho na kabu ne Manase, i pesi na malala e Basan.

E Huriki a Israel Ri Bolea a Malala

44 E Moses i habi a maka vinara na Vure ne huriki a Israel. 45 I habi a vinara nga muri ne ria ri pea e Egipto ri valai ri made tabukoi na naru e Iordan na maloku, tabukoi na tanga ne Bet-Peor. Ra tabeke iea i tabuli na malala ne Sihon, a hariki ne huriki a Amor. Hosi i made na tanga e Hesbon i matakaria a malala iea. Lakea e Moses turane huriki a Israel ri ratapile ria na vabinga na tahuna ri pea e Egipto. 47 Ri made na malala vona, na malala ne Og, a hariki ne Basan. Ra hariki ne huriki a Amor nga, ru made na tabeke na nirikena haro na naru e Iordan. 48 Ra malala e huriki a Israel ri bole pali, a nagina i tubu na tanga e Aroer, tabukoi na naru e Arnon, i vano i harena na lolo e Sion re Hermon. 49 Ri bole turana a maka malala lobo na tabeke na nirikena haro na naru e Iordan, i vano i harena na Dari Mate na niragana lolo e Pisga.

Copyright information for `BNP