Deuteronomy 9

E Huriki a Israel Ri Longotaro a Nitane BAKOVI DAGI

E Moses i ta tabu i ta maea, “Mua o huriki a Israel mu longo. I tabukoi ngane mu gu tulu poloa a naru e Iordan, bara mu vano mu lili tala e huriki ri gao hateka ne mua, mu bolea a malala ne ria. Ri tahoka a maka tanga, ni tura halui na nure-kedo i padoi a bubu. Re huriki nga ri gao ri ola hateka, re huriki a Anak. Mu longo pali a velengane ria re huriki nga, i uka tara viri ge rangi ria ma na vabinga. Pali ngane mu lohoka kamumu maea, e BAKOVI DAGI a Vure ne hita, ge muga ne mua, ge manga a kanono i hube i kara hateka. Na tahuna mu laho lokovonga bara i ratapile a maka nitora ne ria. I mavonga bara mu vaubi turane ria, mu lili tala ria, mu ratapile ria malaviriri, i manga a ngava i ta muholi vona ge rata.

“Muri ne BAKOVI DAGI a Vure ne hita i lili tala ria pali, ma mu gu taki mule mua, mu gu ta maea, ‘A BAKOVI DAGI i habia ne hita a malala iea, a vuhuna i matai hita, hita e huriki a bakovi a ngatavine malamala.’ Ra niluhoi maea i uka ma i muholi. E BAKOVI DAGI i matai re huriki a bakovi a ngatavine ra ri made vona ngane a malala iea, ri rata a maka naro hale hateka, ge lili tala ria. Naha ni luhoi mu kamumu mu lohoka ni rata a maka naro kamumu, lakea mu gu bolea a malala iea. E BAKOVI DAGI a Vure ne mua bara i lili tala ria, a vuhuna ria e huriki a bakovi hale hateka. Lakea tabu i ngaru ge bele muholi a nita muholi i kaba lakea ne huriki a gare hosi ne Abraham, ne Isak, ne Iakop. Muholi hateka ra malala iea i rike kamumu hateka vona a maki, pali e BAKOVI DAGI i uka ma i habia mua ge a mapana a naro kamumu ne mua. Ra mua, mua a bakovi a ngatavine na tagenga.

“Naha ni longokaburungi, na tahuna mu made na malala golea mu ratea e BAKOVI DAGI a Vure ne mua i madihi a hatena. Na tahuna mu pe e Egipto i valai i harena mona, mu longotaro a nitane BAKOVI DAGI. Na lolo e Sinai mu ratea e BAKOVI DAGI i madihi a hatena, i tabukoi ge ratapile mua. a Iau a sike na lolo ta ga bole a tabekena kedo i rua, e BAKOVI DAGI i here puru a maka nita muholi i rata turane mua. Iau a made vonga na parava i ravulu va, a rodo i ravulu va, i uka ma a kania tara maki, i uka ma a ninu. 10 Lakea e BAKOVI DAGI i habi nau a tabekena kedo i rua, i here vona a ngava i habi mua na tahuna mu vapopo na dahana lolo, i made pololilo na kanono ia.

11 “Muri na parava i ravulu va, a Vure i habi nau a tabekena kedo nga i rua, i here a ngava dagi vona. 12 Lakea i taki iau i ta maea, ‘O pe a lolo o puru malaviriri kunana, a vuhuna e huriki a tara vomu, ra o bole ria o Egipto o taparaki valai ria koea, ri rata a naro hale. Ri malaviriri kunana ri ngalahere vona a maka vinara nau, ri ratea a vure ne ria na gol.’

13 “Lakea e BAKOVI DAGI i taki tabu iau i ta maea, ‘Iau a lohoka pali ne huriki nga, ri tagege hateka. 14 Ngane a ngaru ni ratapile lobo ria, i uka ma ni gi luhoi tabu. Naha ni hatekakari iau. Ga rata maea, muri ga rata mua a kabu dagi i gao hateka, i rangi e huriki nga.’

15 “Lakea a bole a tabekena kedo nga i rua, a Vure i here puru vona a nita muholi, a pe a mapana lolo, a raga puru. Na tahuna iea a kanono dagi i hube na lolo, a niparana i parai rikea a hunu. 16 Iau a puru valai pali, i muholi hateka, a matai mua mu ngalahere na maka vinara ne BAKOVI DAGI a Vure ne hita. Mu ratea a hanuna bulmakau na gol, ge a vure ne mua. Na naro iea kunana mu rata a naro hale na Vure. 17 Na matane mua, a voro puru a tabekena kedo nga i rua, ru makeve liu.

18 “Muri a hamule sike tabu ne BAKOVI DAGI a mahita ngalabarara puru na malala na haro, na rodo, i harena na parava i ravulu va. I uka ma a kani, i uka ma a ninu. A rata mavonga, a vuhuna mu rata a naro hale ne BAKOVI DAGI, mu ratea i madihi a hatena. 19  b E BAKOVI DAGI i madihi hateka a hatena, i luhoi ni vakalobo liu mua, lakea a mangenge hateka. Pali e BAKOVI DAGI i longo mai iau tabu. 20 E BAKOVI DAGI i tahate hateka ne Aron, i ngaru ni ratapilea. Lakea a vasileki ga tuhoria e Aron, ga tuhori mua. 21 A bulmakau mu ratea i vakabele a naro hale ne mua. Lakea a bolea a bulmakau, a voro rikea na kanono. Muri a ubimomoa i momo kesikesi i manga a habulo tavula, lakea a guru purua na naru i tua raga valai na lolo, i tua pasi vurokia.

22  c “Na tahuna mu made na tanga e Tabera, e Masa, e Kibrot-Hatava mu ratea e BAKOVI DAGI i madihi a hatena. 23  d Hosi mu made o Kades-Barnea i taki mua mu gu vano mu gu made vona a malala i ngaru ge habia ne mua. Pali mu longotaro a nitana, i uka ma mu luhoi tora ia, i uka ma mu ramai a nitana. 24 Na tahuna a vakatubu ni leho turane mua i valai i harena mona, mu tagege hateka ne BAKOVI DAGI.

25 “Na tahuna mu tababana mu made na dahana lolo, a sike na lolo a mahita ngalabarara puru na malala na matane BAKOVI DAGI, na haro na rodo i harena na parava i ravulu va. A rata mavonga, a vuhuna e BAKOVI DAGI i taki ge ratapile mua lobo. 26 Lakea a vasileki maea, ‘O Bakovi Dagi, ioe a Vure, naha ni ratapile huriki a bakovi a ngatavine vomu. Ioe kunana o bole tala ria o Egipto na nitora dagi vomu, o taparaki valai ria koea. 27 O luhoia e Abraham, e Isak, e Iakop tou a vora vomu, naha ni luhoi a maka tagenga, a maregoa, a naro hale ne huriki nga. 28 E huriki a Egipto ma ri gi taki ioe, ‘I uka ma o kara ni taparaki lakea na malala o ta muholi vona ta go habia ne ria.’ Ma ri gi ta maea, ‘Ioe i uka ma o ngaru e huriki a tara vomu, i mavonga o bole lakea ria na malala golea o rabalaki ria.’ 29 O BAKOVI DAGI, re huriki nga, o vulaki ria ge ria a tara vomu. Na nitora dagi vomu, o bole tala ria o Egipto, o taparaki valai ria koea.”

Copyright information for `BNP