Exodus 11

A Harena Vuranga

E huriki a Tabua Ri Mate

E BAKOVI DAGI i takia e Moses, “Ga habi tabua ne Parao turane huriki a Egipto tara vuranga. Muri bara i longo ne mua mu vano. Na tahuna i longo ne mua mu vano, bara i turahari mua, i lili tala mua. O taki e huriki a Israel ri gi lakea ne huriki a Egipto ri made tabukoi ne ria, ri gi nongi ne ria a mahala na gol a silva.” E BAKOVI DAGI i rata e huriki a Egipto ri togo e huriki a Israel. Pali na matane huriki a bolekori ne Parao turane huriki a Egipto, ri masia e Moses ia a bakovi dagi hateka.

Lakea e Moses i takia e Parao, “E BAKOVI DAGI i ta maea, ‘Na kururodo ga laho lobo na robo e Egipto. E huriki a tabua bakovi o Egipto ri gi mate. Ga tubu na tabua bakovi vomu, ra viri ge bole a murimu, ge matakari o Egipto, ge harena na tabua ne huriki a vora ngatavine ri leho ni vila a vit ni rata a bret. A tabua na maka bulmakau a sipsip, ngi ranga ri gi mate. A halohoa dagi bara ni longo na tabeke lobo ne Egipto. Ra runga maea i uka ma ni longo hosi, i uka ma ni gi longo tabu muri ma. Pali iau i uka ma ga ratea tara maki hale ge bele ne huriki a Israel o na sipsip a bulmakau ne ria.’ Muri bara o matakilaka vona ra naro e BAKOVI DAGI i ratea ne huriki a Egipto, i uka ma ge ratea ne huriki a Israel. E huriki a bolekori vomu bara ri valai, ri lolu na matagu ri ta maea, o vano ngane! Ioe turane huriki a viri vomu, mu vano malaviriri! Ra vuranga nga ge bele taro, muri iau ga pea e Egipto.” E Moses i madihi hateka a hatena, i pea e Parao, i pagitala.

Muri e BAKOVI DAGI i takia e Moses, “E Parao i uka ma ge longo mai ioe, ga rata tabu ranga nivakasiri na robo e Egipto.” 10 A maka nivakasiri nga, e Moses e Aron ru rata na matane Parao. Pali e BAKOVI DAGI i ratea i gigitora, i uka ma i ngaru e huriki a Israel ri gi vano.

Copyright information for `BNP