Exodus 13

A Tabua Ni Gi Habi ne Bakovi Dagi

1E BAKOVI DAGI i takia e Moses, 2 a  “E huriki a Israel ri gi habi lobo nau e huriki a tabua bakovi, turana a tabua toga na maka sipsip a bulmakau.”

3Muri e Moses i taki e huriki, “Na pida lobo mu luhoi mule vakaroroa a parava iea, naha ni kani a bret i vona is. Ra parava iea e BAKOVI DAGI i tuli tala mua o Egipto, a tanga na nivakavora. Na nitora vona kunana i vakamariu tala mua. 4Mona na keva e Abib mu malaga koea. Ra keva iea a mugana keva na pida. 5E BAKOVI DAGI i ta tora pali ge habia ne mua a malala ne huriki a Kenan, a Hiti, a Amor, a Hivi, a Iebus. Ra malala iea i kamumu, i vona a maki ni kani. Na tahuna e BAKOVI DAGI ge taparaki lakea mua vona a malala iea, mu ratea a habu iea, na keva iea, na pida lobo.

6“Mu kani a bret i uka is na parava ge polorua. Na poloruana parava mu rata a habu ne BAKOVI DAGI. 7Na maka parava nga, e huriki ri gi kani kunana a bret i uka is. Nahea tara maki ge tahoka a is ni gi matai ge tabuli tabukoi o ge tabuli na tabeke ne mua. 8Na tahuna a habu iea ge bele, mu vakalongo e huriki e tune mua mu ta maea, ‘A habu iea si ratea, si luhoi mulea a tahuna e BAKOVI DAGI i vakamariu tala mia o Egipto mi valai.’ 9Ra habu iea i manga a kilakila na limane mua, na dumene mua. Bara i rata mua mu luhoi, mu vata vona a vinara ne BAKOVI DAGI, a vuhuna na nitora dagi vona i vakamariu tala hita o Egipto. 10Na pida lobo mu ratea a habu iea na parava iea.

11“Na tahuna e BAKOVI DAGI ge taparaki mua na malala e Kenan i habia ne mua, ra i ta muholi vona hosi ne huriki a gare ne mua, 12 b  mu habi vona e huriki e tune mua a tabua bakovi, a tabua toga na sipsip a bulmakau. 13Na tahuna mu ngaru ni konamulea tara tuna tabua na donki a toga, mu kuloia vona tara tuna sipsip. Ge uka, mu horia a lohona donki. Pali e huriki a tabua bakovi ne mua mu kona mule.

14“Muri ma, e huriki e tune mua bara ri nana, ‘I navai a vuhuna a naro iea?’ Mu koli mu ta maea, ‘E huriki a Egipto ri vakavora hateka mia na robo ne ria, pali e BAKOVI DAGI, na nitora dagi vona, i tuli tala mia mi valai. 15Na tahuna e Parao i hehe i uka ma i ngaru mia mi gi vano, e BAKOVI DAGI i rabalaki e huriki a tabua bakovi, a maka tabua na sipsip a bulmakau, a toga ne huriki a Egipto. Ngane si luhoi mulea a naro i ratea ne mia, si habi e huriki a tabua bakovi turana a maka tabua toga na sipsip a bulmakau ne BAKOVI DAGI. Na naro iea kunana mi korimule e huriki e tune mia a tabua bakovi. 16Si ratea a naro iea si gi luhoi tabua e BAKOVI DAGI i bole tala mia o Egipto i vakamariu valai mia koea na nitora vona. Ra nita iea i manga a kilakila ni topi na limane hita na dumene hita.’”

A Bubu, a Kanono i Muga ne Huriki a Israel

17Na tahuna e Parao i longo vona e huriki a Israel ri gi vano, a Vure i uka ma i vakasiri ria vona a dala kapo tabukoi na dari i sike na robo e Palestina. I rata mavonga a vuhuna i luhoi maea, “Ma ri gi vakorokoro e huriki a kabu ranga, ri gi vaubi turane ria, bara ri mangenge, ri hamule tabu o Egipto.” 18Lakea a Vure i bole ria, ri laho halui a tabeke i ngeki, ri vano ri bele na Dari Vururu. Na tahuna ri mariu tala o Egipto, ri bole a maki na vabinga ri vano.

19 c  E Moses i bole a tuhane Iosep i vano turana, a vuhuna hosi e Iosep i taki e huriki a Israel i ta maea, “Muholi hateka, muri ma na tahuna a Vure ge vakamariu tala mua o Egipto, mu bole a tuhagu mu vano turana.”

20Muri ri malaga tala na tanga e Sukot ri vano ri bele na tanga e Etam na harena tabeke i ngeki. 21Na haro e BAKOVI DAGI i made pololilo na bubu, i muga ria i vakasiri ria na dala. Na rodo i made pololilo na kanono, i muga ria ge habi a nipara. 22Na haro a bubu i muga ria, na rodo a kanono i muga ria.

Copyright information for `BNP