Exodus 24

A Vinara ni Vakatora

Muri e BAKOVI DAGI i takia e Moses, “A ngaru ioe, e Aron, e Nadap, e Abihu turane huriki a gare ne Israel ri ala ravulu polorua, mu sike valai na lolo, mu pesi basi, mu kavurike iau. Ioe kikeri o valai tabukoi nau. E huriki a matakari nahea ri gi valai tabukoi; e huriki a bakovi a ngatavine ria ranga nahea ri gi valai tabukoi.”

E Moses i vano i vakalongo e huriki na maka vinara ne BAKOVI DAGI, lakea ri ta taku ri ta maea, “Mi gi ramai a ngava lobo e BAKOVI DAGI i taki.” Lakea e Moses i here puru na puhu a ngava lobo e BAKOVI DAGI i taki.

Na parava muri e Moses i hadongo na hatelanga pokopoko i haea a dede na gagana lolo. I ru tabukoi na dede a kedo i ravulu a polona i rua, ga kilakila na kabu ne Israel.
Muri i rudu ranga koma tamuhane ne Israel, ri habi a nihabi gutu-vuro ne BAKOVI DAGI. Ri rabalaki a bulmakau karaba ne vona a nihabi na nivalemu turana Vure. Muri na nihabi, e Moses i bole a darana bulmakau i guru puru na tavila ranga, i voro tamali langa na dede ranga. Muri i bolea a Puhu na Ngava Dagi, i gi poloa ne huriki. Ri longoa ri ta maea, “Mi gi ramai kunanea a nitane BAKOVI DAGI.”

a Muri e Moses i bolea a dara i tabuli na tavila i voro tamali langa ne huriki. Lakea i ta maea, “Ra dara iea i vakatorea a ngava dagi e BAKOVI DAGI i ratea ne mua na tahuna i habi a nitana ne mua.”

Muri e Moses, e Aron, e Nadap, e Abihu turane huriki a gare ne Israel ri ala ravulu polorua ri sike na lolo, 10 ri masia a Vure ne huriki a Israel. Ri masia i pesi langa na maki i mata manga a dala ni rata na kedo tara parahidi gomagoma ni gale a sapira. I gomagoma i manga a hunu. 11 Muholi ri masia a Vure, pali i uka ma i ratapile e huriki a gare ne Israel. Muri ri kani ri ninu vonga.

E Moses i Sike na Lolo e Sinai

12 E BAKOVI DAGI i takia e Moses, “O sike valai na lolo, o pesi tabukoi nau. A here pali na kedo i rua a vinara nau. Ga habi vomu a kedo nga i rua, o tovo e huriki vona.” 13 Muri e Moses i longo maia a nitana, i bolea a vora vona e Iosua ru sike na lolo na Vure. 14 E Moses i taki e huriki a gare, “Mu dava koea miri gi sike taro na lolo, muri miri gi hamule valai. E Aron e Hur ru gu made turane mua. E rei i tahoka a maregoa, ge lakea ne rua ru gu pelekadoa.”

15 Muri e Moses i sike na lolo, a bubu i kavitagua a lolo. 16 A nipara na Vure i paraia a lolo. Na parava i polotara a bubu i kavitagua a lolo. Na poloruana parava e BAKOVI DAGI i ta tala na bubu, i galea e Moses. 17 E huriki a Israel ri masia a nipara ne BAKOVI DAGI i manga a kanono na mapana lolo. 18  b E Moses i dili na bubu i laho sike na lolo, i made vonga na parava i ravulu va.

Copyright information for `BNP