Exodus 26

A Mailo na Vure

(Nimariu 36:8-38)

1“O kavitagua a mailo nau na kala kamumu ge ravulu. O vakabagetu na hotu gomagoma,
(26:1)Na nita Bola e gomagoma i manga e blu o grin na nita kadirovo. Na nita iea e ‘gomagoma’ i manga e blu.
na hotu vururu, na hotu kuakua. O rahi dili a hanuna a agelo na kala.
2O rata a maka kala nga ge palupulupu; a kala i taku a niolana ge 12 mita, a nibolana ge 2 mita. 3O rahi palupu a kala ge lima. A kala ge lima tabu ngi ranga o rahi palupu. 4O rata ranga halui na harena kala gomagoma ne vona ni varaki palupu a kala dagi nga i rua. O kolo dili na kala dagi nga a maka halui. 5O kolo dili na harena kala muga a halui ge ravulu lima, na kala tara ge ravulu lima. A maka halui nga ge tabuli vakanakana. 6O rata a kinau ge ravulu lima, mu varaki palupu a kala nga, ru gu mata manga a kala ge taku.

7“Muri o ratea tara kala dagi ge kavitagua a mailo nau. O rata a maka kala ge 11, ni rata na vuna meme. 8A maka kala ge palupulupu; a kala i taku a niolana ge 13 mita, a nibolana ge 2 mita. 9O rahi palupu taro ge lima, muri o rahi palupu ge polotara. O rata kamumua a polotarana kala ge kavitagua a matana kape. 10O rahi dili na harena kala muga a halui ge ravulu lima, na kala tara ge ravulu lima.

11“O rata na bras a kinau ge ravulu lima, o kolo na halui ne vona ni varaki palupu a kala nga i rua, ge manga a kala dagi i taku. 12Ra hini i tavore tala, ge tavore kunana na bitona mailo nau. 13A niolana kala i kavitagu a kape ge ola popote; a harena tara ge tabuli tavula ge 50 sentimita, na harena tara ge 50 sentimita. 14O rata tabu a kala ge rua ge kavitagu a kape, a kulina sipsip a toga ni kalu vururu, a kulina lui ge kavitagu a hini polomeli.

15“O rata a maka mito na mailo na Vure na kai a akas. 16A niolana a maka mito ge 4 mita, a nibolana ge 66 sentimita. 17A mito ge ola popote, bara ni ru dili na dupina vuhu-butu i tabuli polotano. A maka mito na mailo nau ni gi rata ge maea kunana. 18Na tabeke mule puru mu rata a mito na nure ge ravulu rua, 19a vuhu-butu ni rata na silva ge ravulu va, ri gi tahoka a dupi ni vakapesi a mito. A vuhu-butu ge rua ru gu tabuli polotano na mito i taku. 20A nure na tabeke mule sike, ia tara o rata mavongea, o rata a mito ge ravulu rua, 21a vuhu-butu ni rata na silva ge ravulu va. A vuhu-butu ge rua ru gu tabuli polotano na mito ge taku. 22O rata a mito ge polotara ri gi pesi na bitona mailo nau na nirolona haro. 23A mito ge rua ru gu tabuli na nimodo i rua na bitona kape. 24O lapi palupu a mito ge rua na nimodona kape i rua mu vakapesi. A nimodo i rua tabu mu rata mavonga. 25A bitona kape ge tahoka a mitona nure ge polotolu, a vuhu-butu ni rata na silva ge ravulu a polona i polotara. A vuhu-butu i rua ru gu tabuli polotano na mito i taku.

26“O bole a kai a akas ge lima, o lapi tavalavala na nure na gagana mailo na Vure. 27O rata ge lima na gagana mule puru, ge lima na gagana mule sike, ge lima na bitona mailo nau na gagana nirolona haro. 28Ra karona nure tavalavala na kurukuruna, ge tubu na harena iea ge lobo na harena tara. 29O kavitagu a maka mitona kape na gol. O ru dili ranga halui ni rata na gol, ge tangotata a maka karo ni ru tavalavala na nure. A maka karona, ngi ranga ni gi kavitagu na gol. 30Muri o vakapesia a mailo na Vure, ge ramaia a ngava a taki ioe vona na lolo.

31“O ratea tara kala o vakabagetua na hotu gomagoma, na hotu kuakua, na hotu vururu ni rata na vuna sipsip. O rahi dili vona a hanuna a agelo. 32O bole a kai a akas ge va o rata a butu, o naviri na gol turana a kinau ni rata na gol, o vakapesi na vuhu-butu i va ni rata na silva. 33 b  O vakatavorea a kala na maka kinau, muri o bolea a Tava na Ngava Dagi, o rua na bitona kala. Ra kala iea ge nagi mulea a Tabeke Nitaba Hateka na Tabeke Nitaba. 34O rua a Tava na Ngava Dagi na Tabeke Nitaba Hateka, o tukaria a matana. Ra matana tava, a murina nidodo. 35O rua a dede polovavo na Tabeke Nitaba, na tabeke mule sike na mailo na Vure; a butuna lam o vakapesia na tabeke tano.

36“O ratea a kala dagi ge a hinebi na kape. O vakabagetua na hotu gomagoma, na hotu vururu, na hotu kuakua ni rata na vuna sipsip. 37O rata na kai a akas a butu ge lima o naviri na gol. O bole a kinau ni rata na gol o kolo dili na maka butu ne vona ni vakatavore a kala. O rata na bras a vuhu-butu ge lima, ge tahoka a dupi ne vona ni vakapesi a maka butu.

Copyright information for `BNP