Exodus 31

E Besalel e Oholiap

(Vinara 35:30–36:1)

E BAKOVI DAGI i takia e Moses, “O longo, a vulakia pali e Besalel e tune Uri bakovi, e tubune Hur na kabu ne Iuda. A habia vona a Hanuna Vure, turana a nitora, a lohokanga, a niluhoi ni ratana a maki legelege. Ge rata a maka maki kamumu na gol, na silva, na bras. Ge rata a maki na kedo parahidi, na maka kai, na maki legelege ranga, ge vakabagetu a kape nau. A vulaki tabua e Oholiap, e tune Ahisimak na kabu ne Dan, ge leho turana e Besalel. A habi tabu a lohokanga ne huriki ranga, ri gi rata a maki a ngaru ri gi rata. Ri gi rata a Kape na Vaponga, a Tava na Ngava Dagi turana a murina nidodo, a maka mahalana kape. Ri gi rata a dede turana a maka mahalana, a butuna lam ni rata na gol kamumu turana a maka mahalana dede na havu mangisipa. Ri gi haea a dede na nihabi gutu-vuro turana mahalana, a tavila ni vahilolo a lima a vaha turana a dedena. 10 Ri gi rahi a maka bagetua kamumu ne Aron, ne huriki e tuna, ri gi rodo ri gi rata a leho na prister. 11 Ri gi rata a nibiri ne vona ni gamai a maki nau, a havu mangisipa ni gi rungani na Tabeke Nitaba. Ri gi rata a maki nga, ge manga kunana a ngava a taki ioe vona na lolo.”

A Vinara na Parava Nimalo

12 E BAKOVI DAGI i takia e Moses, 13 “O vano o taki e huriki a Israel, ‘A parava polorua, ia a Parava Nimalo nau. Na vik vakaroro mu malo vona a parava iea, ra a habia mua mu gu ramaia ngane, e huriki a hamone mua ri gi ramai vakaroroa, ge ia a kilakila ne mua muri ma. A rata mavonga, a vuhuna bara mu lohoka vona iau e BAKOVI DAGI, a vulaki mua ge mua a viri nau. 14 Ra Parava Nimalo a parava nau, a malo vona. A viri i longotaro a vinara nau, i leho vona a parava iea, ni gi rabalaki. 15  a Na maka vik lobo mu tahoka a parava i polotara mu leho vona, pali a parava polorua, a parava nau, a Parava Nimalo. E rei a viri i rata a leho vona a parava iea, ni gi rabalaki. 16 E huriki a Israel, ri gi malo vona a parava iea, e huriki a hamone ria ri gi ramai vakaroroa a ngava dagi iea na maka pida ge valai. 17  b Ra parava iea a kilakila na ngava dagi a ratea turane huriki a Israel, ri gi luhoi vakaroroa. Na parava i polotara a rata rike a hunu a malala, pali na poloruana parava a taparaki a maka leho lobo, a malo.”

18 Na tahuna e Bakovi Dagi i ta lobo turane Moses na lolo e Sinai, i habi ne Moses a tabekena kedo i rua na Ngava Dagi, ra ia a Vure i here na limana.

Copyright information for `BNP