Exodus 34

E Moses i Rata a Kedo Karaba

(Vinara 10:1-5)

E BAKOVI DAGI i takia e Moses, “O kau a tabekena kedo ge rua, ge manga ra kedo nga o bimomo kesikesi rira. Ga here tabu a ngava ge manga a ngava a here na kedo muga. Kuduvi na hatelanga o bole a tabekena nga, o sike na mapana lolo e Sinai, o tagui iau vonga. Nahea tara viri ge valai turamu. A koi vona tara viri ge valai ge made vona a lolo iea. E huriki lobo ri gi made na taruna. A maka sipsip, a bulmakau nahea ri gi valai ri gi kani tabukoi a varili na lolo.”

Lakea e Moses i kau a tabekena kedo i rua i manga a kedo muga, i bole sike na lolo, i ramai a ngava e BAKOVI DAGI i vakuku ia vona. E BAKOVI DAGI i puru valai turana a bubu, i pesi turane Moses na lolo, i vakalongo mulea a rana, e BAKOVI DAGI. a I polo na ngalane Moses, i vakalongo maea, “Iau e BAKOVI DAGI, iau e BAKOVI DAGI. Iau a Vure na nidodo na ni rata kamumu e huriki. Iau i uka ma a tahate malaviriri e huriki. A ngaru hateka e huriki a bakovi a ngatavine, a ramai lobo a ngava nau. A ngaru hateka e huriki ri ala ravulu rangale (1,000), i manga a ngava a ta muholi vona pali. A puga vuroki a naro hale ne huriki ri longotaro a nitagu, ri putu puru a vinara, ri rata a naro hale. Pali e huriki ri rata a naro hale, ri tahoka a ngava, ga vakamadihi ria turana e huriki a hamone ria, re huriki e tubune ria, e tamarane ria.”

Muri na Vure i ta lobo, e Moses i malaviriri kunana i lolu puru na malala, i kavurikea. Lakea e Moses i takia, “Bakovi Dagi, ioe bara o ngaru muholi iau, a ngaru ioe go vano turane mia. I muholi ngi, re huriki nga ri longotaro hateka a ngava, a ngaru go puga vuroki a naro hale ne ria, o bole mia, ge mia e huriki a viri vomu.”

A Ngava Dagi Ni Rata Tabu

(Nimariu 23:14-19; Vinara 7:1-5; 16:1-17)

10 E BAKOVI DAGI i takia e Moses, “Ngane a ta muholi, ga vakasiri na matane mua lobo a maka nivakasiri dagi, i uka ma a vakasiri ma ne huriki lobo na malala. A maka kabu ranga bara ri matai a maki legelege a rata ni tuhori mua, bara ri luhoi lege, ri mangenge. 11 Mu ramai a vinara nau a taki ioe vona mu gu ramai. Iau ga muga ga lili tala e huriki a Amor, a Kenan, a Hiti, a Peres, a Hivi, a Iebus na malala ne ria. 12 Mu matadoko, naha ni valongo mai a ngava dagi turane huriki na tanga mu gu lakea vona, ma ri gi turari mua, mu gu longotaro a ngava nau, mu gu velu. 13  b Mu ratapile a maki na nivasileki ne ria. Mu ubikeve a maka dede a butu ni rata na kedo, mu ubivila a kai ni kau a hanuna vure ngatavine, e Asera. 14 Mu kavurike kunana iau, e BAKOVI DAGI ne mua. Naha ni kavurike a vure ranga, a vuhuna i uka ma ga matataroa tara vure ge kuloi iau.

15 “Naha ni valongo mai na ngava turane huriki na tanga nga. Re huriki nga ri kavurike, ri habi a maka nihabi na maka vure ne ria. Mua bara mu valongo mai a ngava turane ria, bara ri taki mua mu vapopo turane ria, mu kani a kinani ri habi na maka vure ne ria. 16 Re huriki nga, bara ri taki e huriki a riau ne mua ri parangi a ngatavine ne ria. Mua bara mu rata mavonga, re huriki a ngatavine nga, bara ri turari e huriki e girihine ria, ri ha taro iau, ri kavurike a maka vure ne ria, manga a viri i rata a naro na molenga.

17  c “Naha ni rata a maka vure na aen mu gu kavurike ria.

18  d “Mu luhoi mulea a tahuna mu mariu tala o Egipto, mu ratea a Habu na Bret i Uka Is. Na keva e Abib na pida lobo, mu kani a bret i uka is na parava ge polorua, i manga a hini a taki.

19  e “E huriki a tabua a bakovi, a maka tabua na bulmakau a sipsip ne mua, ge nau kunana. 20  f Mu ngaru ni kona mule a maka tuna tabua na donki, mu habia a tuna sipsip ge a makulina. Mua i uka ma mu konamulea, mu hori a lohona a donki. E huriki a tabua bakovi ne mua, ria ranga mu kona mule.

21  g “Na vik lobo mu tahoka a parava na leho i polotara, pali na poloruana parava naha ni rata a leho. A poloruana parava ge bele na tahuna na nivaro o na nimirio, naha ni leho vona a parava iea.

22  h “Mu luhoia a Habu na Nimirio, ra habu ni bole kadolu a maka kanena vit ri moro muga. Na keva ni pasi a maka kanena kai ri rara, mu luhoia a Habu na Nimalo na Kape. 23 Ge balaka tolu na pida, e huriki a bakovi ne mua, ri gi kavurike e BAKOVI DAGI a Vure ne huriki a Israel. 24 Iau ga lili tala e huriki ri made ngane vona a malala, ga hudotalea a harena malala ne mua. Balaka tolu na pida i taku, mu valai mu kavurike iau e BAKOVI DAGI a Vure ne mua. I mavonga e huriki a pile i uka ma ri gi bolea a malala ne mua.

25  i “Naha ni habi nau a bret i tahoka a is, na tahuna mu habi a sipsip a bulmakau nau. Nahea ge tabuli ranga nihabi, mu kani kaleva na Habu na Nipagepolo ge palala taho a hini.

26  j “Na pida lobo, na tahuna mu mirio a maki ri moro muga na hania, mu bole valai nau, iau e BAKOVI DAGI a Vure ne mua.

“Naha ni guru puru na ulo a namona ruru na meme mu gu nono a tuna meme vona.”

27 E BAKOVI DAGI i takia e Moses, “O here puru a ngava nga na puhu, a vuhuna a burena a maka ngava dagi a rata turamu, a rata turane huriki a Israel.” 28 Lakea e Moses i made turane BAKOVI DAGI na lolo na parava i ravulu va, a rodo i ravulu va, i uka ma i kani, i uka ma i ninu. I here a nita na ngava dagi na tabekena kedo i bole sike e Moses.
(34:28)Na nita Hibru a viri i here na kedo, i uka ma ni lohoka vona e Bakovi Dagi o e Moses.
A ngava nga ra vinara na Vure i ravulu.

A Matane Moses i Parahidi

29  l Na tahuna e Moses i pe a lolo e Sinai i puru, i bole a tabekena kedo i rua ni here vona a Ngava Dagi. A matane Moses i parahidi, a vuhuna i ta turane Bakovi Dagi. Pali ia i uka ma i lohoka vona a matana i parahidi. 30 Na tahuna e Aron turane huriki a Israel ri masia a matane Moses i para hateka, ri mangenge, i uka ma ri valai tabukoi vona. 31 Pali e Moses i gale e Aron turane huriki a matakari ne Israel, ri valai vona, i ta turane ria. 32 Muri e huriki a Israel ri valai tabukoi ne Moses, i vara ria na maka vinara e BAKOVI DAGI i habi vona na lolo e Sinai.

33 Na tahuna e Moses i vara lobo ria, i bolea a kala i kavitagua a matana. 34 Pali na tahuna e Moses i dili na kape, bara i kali talea a kala, i ta turane BAKOVI DAGI. Na tahuna i pagitala, bara i vakalongo e huriki a Israel vona a ngava e BAKOVI DAGI i takia vona. 35 E huriki a Israel ri masia a matane Moses i parahidi. Na tahuna i vakalongo ria lobo na vinara, i kavitagu a matana na kala, i harena na tahuna i hamule dili tabu na kape i ta turane Bakovi Dagi.

Copyright information for `BNP