Exodus 4

A Vure i Habi a Nitora ne Moses

E Moses i koli, i ta maea, “Pali e huriki a Israel ri gi koi ni luhoi a nitagu ri gi koi ni ramai a ngavagu, ri gi ta maea, ‘O tatami! E BAKOVI DAGI i uka ma i luve taho ioe.’”

Lakea e BAKOVI DAGI i nanea, “A ra o bolea na limamu?”

E Moses i koli, i ta maea, “A kodo na nilaho.”

I takia e Moses, “O voro purua na malala a kodo!” Lakea e Moses i voro purua na malala a kodo vona, i vulo a mata. Na tahuna i masia, lakea ta ge ha. Pali e BAKOVI DAGI i takia, “Naha ni ha! O tangotatea na kuna.” Lakea e Moses i tangotatea a kuna, i mareli hamule i manga kodo tabu. Muri e BAKOVI DAGI i takia, “Na tahuna o lakea ne huriki a Israel, o ratea a nivakasiri iea, bara ri matakilaka vona, iau e BAKOVI DAGI a bele vomu. Ra iau a Vure na gare ne ria e Abraham, e Isak, e Iakop.”

E BAKOVI DAGI i taki tabua e Moses, “O ru dilia na nirodo vomu a limamu!” Lakea e Moses i ru dilia na nirodo vona a limana. Na tahuna i turari talea, i masia a limana i tuvu vona a patala, i kea manga a kamagi.

“I taki tabua, “O ru dili tabua na nirodo vomu a limamu!” Lakea e Moses i ru dilia na nirodo vona a limana. Muri i turari talea, i matapado a limana.

Lakea e Bakovi Dagi i takia, “E huriki nga, i uka ma ri gi longo mai a nitamu, i uka ma ri gi luhoi a nivakasiri ni rata muga, a ruana nivakasiri bara i rata ria ri luhoi tora. Pali ra nivakasiri nga i rua ri matai, i uka ma ri luhoi ge muholi o ri gi longo mai ioe. O kirua a naru e Nail o gurua na malala bara i mapulo i manga a dara.”

10 Lakea e Moses i takia, “BAKOVI DAGI, ra iau, i uka ma iau a bakovi ni ta na matane huriki ala kupo. Ngane o ta turagu, pali iau i uka ma iau a bakovi ni ta hateka. A ngavagu i mava na nita, i uka ma a ta kamumu.”

11 Lakea e BAKOVI DAGI i koli, i ta maea, “E rei i rata a viri i ta? E rei i rata a viri i ngava rubu, i kepa? Iau kunana a rata ria. 12 O vano ngane, bara tovo ioe, a tuhori ioe na ngava go taki.”

13 Pali e Moses i ta maea, “Bakovi Dagi, iau a vilikoma. O rudua tara viri.”

14 Lakea e BAKOVI DAGI i madihi a hatena, i tahatea e Moses, “I navai o vilikoma? E tukamu e Aron i made, a hamone Levi, bara i tuhori ioe. A lohoka vona i ta pagapaga. Ngane i laho valai ge tagui ioe, bara i vivi ni matai ioe. 15 O taki polo vona a ngava ge taki. Iau ga tuhori marua, bara muru ta kamumu. Ga taki marua vona a ra maki muru gu rata. 16 Ioe o taki polo ne Aron a ngava ge taki ge vakalongo ne huriki. Na matane Aron, ioe o manga a Vure, o habi a ngava vona ge vakalongo e huriki. 17 Ngane o bolea a kodo vomu o vano, o rata a maka nivakasiri vona.”

E Moses i Hamule Lakea o Egipto

18 E Moses i ta turana lobo e Bakovi Dagi, muri i hamule mai e lahuana e Ietro, i takia, “Iau a ngaru ga hamule lakea o Egipto, ga kasisi e huriki a viri nau, ri mate pali o i uka.”

E Ietro i longo maia a nitana, lakea i takia, “I kamumu. O vano na nivalemu.”

19 Pali e Moses i uka ma i pea ma e Midian, lakea e BAKOVI DAGI i takia, “Ngane o puru o Egipto. Hosi, re huriki ta ri gi rabalaki ioe, ri mate pali.” 20 Lakea e Moses i vakarike na donki e girihina, e tuna bakovi ala rua, i bolea a kodo na Vure i puru turane tou o Egipto.

21 Muri e BAKOVI DAGI i takia, “Na tahuna o bele o Egipto o rata a maka nivakasiri na matane Parao. Iau a habia vomu a nitora ni ratana a nivakasiri. Pali iau bara ratea e Parao i gigitora i uka ma ge longo vona e huriki a Israel ri gi vano. 22 Muri o takia e Parao o ta maea, ‘A kabu ne Israel i manga a koma bakovi a tabua ne BAKOVI DAGI. 23  a A taki ioe, “O longo ne ria e huriki e tugu, ri gi vano ri gi vasileki nau.” Ioe bara o koi, e Bakovi Dagi bara i rabalakia e tumu bakovi, a tabua.’”

24 Na tahuna e Moses i laho puru o Egipto, i rodo a hini i mahitatutu na dala. Na tahuna i mahita e BAKOVI DAGI i valai ta ge rabalakia. 25 Lakea e Sipora i bole rikea a voko, i palea a kulina kapune tuna i vakapadoi a vahane Moses vona, i ta maea, “Muholi, ioe e girihigu, pali ioe a bakovi o mahuri na dara.” 26 Lakea e Bakovi Dagi i uka ma i rabalakia e Moses. E Sipora i luhoi a naro ni vapala a kuli, lakea i ta maea, “Ioe a bakovi o mahuri na dara.”

27 E BAKOVI DAGI i takia e Aron, i ta maea, “O lakea na tabeke i ngeki o taguia vonga e Moses.” Muri i vano i taguia, i ngurua e Moses na lolo na Vure. 28 Lakea e Moses i taki e Aron vona a nita lobo e BAKOVI DAGI i taki vona ge vakalongo, i tuverei vona a maka nivakasiri e BAKOVI DAGI i taki vona ge rata.

29 Muri e Moses e Aron ru gale palupu e huriki a gare ne Israel. 30 Lakea e Aron i vakalongo ria vona a maka ngava e BAKOVI DAGI i taki ne Moses. Muri i rata tabu ranga nivakasiri na matane ria. 31 E huriki ri longoa a nitane Moses ri lohoka vona i muholi. Na tahuna ri longoa e BAKOVI DAGI i tagui ria, ri matai e huriki a Egipto ri vakavora hateka ria, ri lolu ri kavurikea a Vure.

Copyright information for `BNP