Genesis 13

E Abram e Lot Ru Vapida

Lakea e Abram rua e girihina ru pea e Egipto ru hamule sike o Negev, turana a maki lobo ne rua. E Lot tara i turane rua. E Abram i tahoka a mahala i kupo: a maka sipsip a bulmakau, a silva, a gol.

I pea e Negev i laho tope dili tope tala na maka tanga. Muri i vano i bele o Betel, na hini i vakapesi muga a kape vona na kurukuruna e Betel, e Ai, ra hini i kisi a dede-kedo muga vona. I vasileki tabu vonga ne BAKOVI DAGI.

Ngane e Lot, ra i laho turana e Abram, ia tara i tahoka a mahala i kupo. I tahoka a kabuna sipsip, a kabuna bulmakau. E huriki a vora vona ranga, ri ala kupo. Lakea i uka ma i kupo a malala ge vona a varili ne vone rua ru gu made palupu vona, a vuhuna i kupo a kabuna sipsip a bulmakau ne rua. Lakea e huriki a vora ne Abram ri vagege turana e huriki a vora ne Lot. Na tahuna iea e huriki a Kenan a Peres ria ranga ri made vona a malala iea. Pali e Abram i takia e Lot, “Nahea tu gu vata puhaki. E huriki a vora ne tarua ranga, nahea ri gi vata puhaki, a vuhuna tarua a viri ala taku. Masia, a malala dagi i tabana, pali ngane tu gu vapida. Ioe bara o ngaru ni lakea na nirikena haro, iau bara lakea na nirolona haro. Pali ioe bara o lakea na nirolona haro, iau bara lakea na nirikena haro.”

10  a Lakea e Lot i mata rike i masia a bila ne Iordan, i vano i harena o Soar i vona a maka naru. I mata manga a hania ne BAKOVI DAGI, i manga a malala ne huriki a Egipto, tabukoi o Soar. Ra hini nga i muga ne BAKOVI DAGI i ratapile e Sodoma e Gomora. 11 Lakea e Lot i bolea a bila ne Iordan na tabeke na nirikena haro. 12 Ru vapida, lakea e Abram i vano i made na malala ne huriki a Kenan. Pali e Lot i made na kurukuruna maka tanga dagi na bilane Iordan. I ratea a tanga vona tabukoi ne Sodoma. 13 Re huriki a bakovi o Sodoma ria a viri hale, ri rata vakaroro a naro hale hateka na matane BAKOVI DAGI.

14 E Lot i vano pali, lakea e BAKOVI DAGI i takia e Abram, i ta maea, “O pesi vonga o mata sike, o mata puru, o mata lakea na nirikena haro, o mata lakea na nirolona haro. 15  b Ra maka robo o matai, ga habi vomu turane huriki a hamomu, ge ne mua vakaroro. 16 Iau ga rata e huriki a hamomu ri gi ala kupo manga a habulo na malala, pali e rei i kara ni gi a habulo, ia kunana bara i gi e huriki a hamomu. 17 O vano, o laho vona a niolana, a nibolana a malala, a vuhuna iau ga habia vomu.”

18 Lakea e Abram i pukea a kape vona, i mariu lakea o Hebron. I ratea a tanga vona tabukoi na kai dagi ne Mamare, na hini i kisi muga a dede-kedo ne BAKOVI DAGI vona.

Copyright information for `BNP