Genesis 17

A Ngava Dagi ni Vapala a Kuli

Na tahuna e Abram i tahoka a pida i 99, i bele vona e BAKOVI DAGI i takia, “Iau a Vure Tuhaka,
(17:1)‘Iau a Vure Tuhaka’ na nita Hibru e ‘El-Shaddai.’
o laho na matagu, o rata a naro malamala.
Ga vakatorea a ngava dagi ne tarua, e huriki a hamomu ri gi bele kupo.”

Muri e Abram i turume i lolu puru na matana Vure, lakea a Vure i takia, “Iau ga ratea vomu tara ngava dagi, ioe ga vuhuna e huriki a kabu ge ala kupo. b Ioe i uka ma ni gi gale tabu ge Abram,
(17:5)‘Abram’ na nita Hibru i manga e ‘huriki e tuna ri gi kavurikea.’
ngane a ramu e Abraham,
(17:5)‘Abraham’ na nita Hibru i manga ‘i kupo e tuna’.
a vuhuna a rata ioe ge ioe e tamane huriki a kabu ge kupo.
Ga ratea a kabu vomu ge vakabele e huriki a kabu i ala kupo, i ranga bara ria a hariki. e Iau ga vakatorea vomu a ngava dagi. Ra ngava dagi iea ge tabuli vakaroro vomu, ne huriki a hamomu ri gi bele muri ma. A ngava dagi i maea: Iau a Vure Muholi vomu, a Vure ne huriki a hamomu. f Ra malala e Kenan, ngane o made manga a mosi vona, ga habia vomu, ge vomu liu. Muri ga habi poloa ne huriki a hamomu. Pali iau, ge iau a Vure ne ria.”

Muri a Vure i takia e Abraham, i ta maea, “Ioe turana e huriki a hamomu mu longototo a ngavagu. 10  g Ra ngava dagi i lakea vomu, i lakea ne huriki a hamomu mu gu longototo kamumua: e huriki a bakovi lobo na kabu vomu ni gi pala a kuline ria. 11 Ra naro ni vapala a kuli, ne vona ni vakasiri a ngava dagi a habia vomu. 12 E huriki a hamomu ri gi muri mai a naro iea, ri gi pala a kulina koma bakovi, ri tahoka a parava i polotolu. E huriki a koma bakovi, i uka ma a hamomu, ni poda na tabeke vomu, a tuna vora ni kona na tanga basi, ngi ranga ni gi pala kuline ria. 13 E huriki a koma ni poda na tabeke vomu o ni kona na moni, ni gi pala a kuline ria. Ra ngava dagi nau i lakea na kuline mua ni pala ge tabuli vakaroro. 14 A bakovi i uka ma ni pala a kulina, ni gi tonotala na kabu vona, a vuhuna i uka ma i ramai a ngava dagi nau.”

15 A Vure i taki tabua e Abraham, “E girihimu i uka ma ni gi gale tabu ge Sarai, ngane ni gi gale ge Sara.
(17:15)‘Sara’ na nita Hibru i manga e ‘tuna hariki ngatavine.’
16 Iau ga gamaia e Sara ge podea tara e tumu a bakovi. Ga gamaia e Sara ge ia e kinana e huriki a kabu i kupo, e huriki a hariki bara ri bele vona.”

17 Muri e Abraham i lolu puru liu na malala, i nongo, i taki mulea, “Iau a gare, a tahoka a pida i 100 pali, pali ga vakaluve navia a koma bakovi? Pali e Sara tara i gare, i tahoka a pida i ravulu polo va (90). Pali ge poda navia a koma?” 18 Lakea e Abraham i takia a Vure, “O gamaia e Ismael, ge manga ra koma o takia.”

19 Lakea a Vure i ta maea, “Muholi, pali e girihimu e Sara ge podea a koma bakovi, o vunua a rana e Isak.
(17:19)‘Isak’ na nita Hibru i manga e ‘nongo.’
Ga vakatora a ngava dagi nau vona, turana e huriki a hamona.
20 A nitamu i lakea ne Ismael a longoa pali. Muholi hateka ia tara ga gamaia, ga ratea ge tahoka, ge bele kupo e huriki a hamona. Ge ia e tamane huriki a matakari i ala ravulu a polona i rua (12), ga ratea a kabu vona ge dagi. 21 Pali a ngava dagi nau ga habi kunanea ne Isak. E Sara ge poda na parava maea na pida muri.” 22 Na tahuna a Vure i ta lobo i pea e Abraham, i sike.

23 Muri e Abraham i ramaia a nitana Vure, i bole e tuna e Ismael turana e huriki ni poda na tabeke vona, a vora ni kona, e huriki a bakovi lobo na tabeke vona, ni pala ria. 24 E Abraham i tahoka a pida i ravulu polova a polona i polova (99), ni pala a kulina. 25 E tuna, e Ismael, i tahoka a pida i ravulu a polona i tolu (13), ni pala a kulina. 26 Na parava iea kunana e Abraham rua e tuna e Ismael ni pala a kuline rua, 27 turane huriki a bakovi ri made turana e Abraham, e huriki ni poda na tabeke vona, e huriki a vora ni kona na mosi, ni pala a kuline ria.

Copyright information for `BNP