Genesis 2

A Vure i Malo na Poloruana Parava

Na naro iea kunana, a Vure i rata rike a hunu a malala, turana a maki lobo. a, b Na poloruana parava a Vure i malo, a vuhuna i vakalobo pali a leho vona. A Vure i gamaia a poloruana parava, i ru hereherea, a vuhuna na parava iea i lobo a leho vona ni rata rike a maki lobo, i malo.

Adam Rua e Eva

A ngava na hunu a malala ni rata rike i maea:

Na tahuna e BAKOVI DAGI a Vure i rata rike a hunu a malala,
a varili i uka ma i gaga ma na malala. A maka kai na robo ranga, i uka ma ri mapoda ma, a vuhuna e BAKOVI DAGI a Vure i uka ma i vakaboru a vala. A malala, i uka viri ge leho vona. Pali a maka naru ri tua rike kunana na malala, ri vakamea a hini polomeli na malala. c Muri e BAKOVI DAGI a Vure i pipia na habulo a bakovi, i vaki dilia na ruperena a bangona nimahuri, i bele a bakovi mahuri.

Muri, e BAKOVI DAGI a Vure i varoa a hania o Iden na nirikena haro. I rua vonga a bakovi i rata rikea. d E BAKOVI DAGI a Vure i rata rike a maka kai legelege ri mapoda na malala, a maka kai mata kamumu, i kamumu a kanena ni kanina. Na kurukuruna hania a kai i rua ru pesi: a kai i habi a nimahuri, turana a kai i habi a lohokanga na naro kamumu na naro hale.

10 A naru dagi i tua tala vonga o Iden i bako va, ne vona ni vakamea a hania. 11 A bakona muga ni gale e Pison, i tua marogo lae na robo e Havila, a robo na gol. 12 A robo iea i vona a kai manginoro, a gol kamumu turana a maka kedo na mahala ranga. 13 A ruana bakona naru dagi ni gale e Gihon, i tua marogo lae na robo e Kus. 14 A rana toluna bakona naru dagi tara e Tigris. I tua na tabeke na nirikena haro na robo e Asiria. A vana bakona naru dagi ni gale e Iupretis.

15 E BAKOVI DAGI a Vure i bolea a bakovi i vakamadea na hania o Iden ge leho vona ge matakaria. 16 E BAKOVI DAGI a Vure i vakukua a bakovi, i ta maea, “A maka kanena kai lobo o kani, 17 pali a kai i habi a lohokanga na naro kamumu na naro hale, naha ni kania a kanena. Muholi hateka, na tahuna o kania bara o mate.”

18 E BAKOVI DAGI a Vure i ta maea, “I uka ma i kamumu a bakovi ge ia kikeri. Ga ratea tara turana ge tuhoria.”

19 E BAKOVI DAGI a Vure i rata rike pali na malala a maka livoa na robo turana a maka kadirovo. I bole lakea na bakovi ge matai ria ge vunu a rane ria takutaku. E rei a rana i vunu ria vona takutaku bara i tabuli liu a rana. 20 A bakovi i vunu a rana a maka sipsip a bulmakau, a kadirovo, a livoa na robo, pali i uka tara ge mata manga e Adam ga rihina. 21 Lakea e BAKOVI DAGI a Vure i ratea e Adam i mahita mate. Na tahuna i mahita mate i paru talea a karona, muri i kavitagu mulea na bobona. 22 Muri i pipia a ngatavine na karo i paru talea na bakovi, muri i tuli lakea vona a ngatavine.

23 E Adam i masia, i ta maea,

“Iea ngane a turagu
a vuhuna ni bole tala na tuhagu,
na bobogu,
ga galea a ‘ngatavine’.”
24  e I mavonga, a bakovi bara i pe e tamana e kinana i madoko turana e girihina, a kakaine rua ge taku.

25 A bakovi rua e girihina ru bobo, i uka ma ru maruhu.

Copyright information for `BNP