Genesis 22

A Vure i Toni e Abraham

a Muri na parava ranga i polo, a Vure i ngaru ni tonia e Abraham. Lakea i galea, “Abraham!” E Abraham i longo, i ta maea, “Iau ieni.”

b Lakea a Vure i takia, “O bolea e tumu e Isak, re tumu a hatemu, i ala taku kunana. O havai maia a robo e Moria. Na tahuna o bele vonga, ga vakasiria vomu tara lolo. O sike maia, o rabalakia vonga e tumu, o habia nau, ge manga a nihabi gutu-vuro.”

Na hatelanga pokopoko na parava muri e Abraham i hadongo i kisia a donki vona. Muri i vakarike na bitona donki a kai i popo puru ne vona ni gutu a nihabi vona. Muri i tuli e Isak turana a vora vona ala rua, ri havai maia a robo i takia vona a Vure. Na toluna parava i tuva e Abraham i masia a lolo. Muri i taki a vora vona ala rua i ta maea, “Muru dava koea turana a donki. Miri gi sike taro maria, miri gi kavurike a Vure, muri miri gi puru valai. Muri e Abraham i vakakaloho e Isak vona a galesi na kai, ne vona a nihabi gutu-vuro. I pi a kanono, i bole a vito ia. Na tahuna ru laho sike, lakea e Isak i galea e Abraham, “O tata?”

E Abraham i koli mule, i ta maea, “O tugu, i navai?”

Lakea e Isak i nanea, “A kanono a kai koea, pali i vai a tuna sipsip ne vona a nihabi gutu-vuro?”

E Abraham i koli, i ta maea, “O tugu, a Vure bara i habia ne tarua a tuna sipsip ne vona a nihabi gutu-vuro.” E Isak i nana lobo e tamana, muri ru laho sike.

c Na tahuna ru bele na mapana lolo, na hini a Vure i taki e Abraham vona, lakea e Abraham i ratea vonga a dede-kedo. I ru vapopo langa vona a kai. Muri i kolotatea e tuna, i bolea i vakatabuli langea na kai. 10 Muri i bole rikea a vito, ta ge rabalakia e tuna. 11 Pali a agelo ne BAKOVI DAGI i gale valai na hunu i ta maea, “Abraham, Abraham!”

E Abraham i ta maea, “Iau ieni.”

12 Lakea a agelo i takia, i ta maea, “Naha ni padoia a koma, naha ni ratea vona tara maki. Ngane a lohoka vomu o mangenge a Vure, a vuhuna i uka ma o vakatokua vona e tumu, re tumu i ala taku kunana.”

13 Muri e Abraham i taratavaga rike, i masia a sipsip a toga i koro na kai kiroko a pelengana. Lakea i bolea, i rabalakia, i habia, i bole a murine tuna. 14 Lakea e Abraham i vunua a lolo iea, “E BAKOVI DAGI i habi.” Pali i vakatubu vonga i valai mona, e huriki ri ta maea, “Na lolo ne BAKOVI DAGI i habi.”

15 A agelo ne BAKOVI DAGI i gale valai tabu na hunu i takia e Abraham, 16  d i ta maea, “E BAKOVI DAGI i kaba mule na rana, i vakalongo maea: ‘A vuhuna o ratea a naro i kamumu hateka i uka ma o vakatokua nau e tumu, re tumu i ala taku kunana, 17  e ngane ga gamai ioe, ga rata e huriki a hamomu ri gi ala kupo manga a hada na hunu, a hire na lavu. E huriki a hamomu ri gi vadede langa vona e huriki a pile ne ria, ri gi bole a vuhutanga ne ria. 18  f I kamumu o longototo a ngavagu. Ngane ga rata e huriki a hamomu ri gi rata kamumu e huriki lobo na malala.” 19 Muri e Abraham rua e Isak ru hamule mai a vora ra ru dava tano, to hamule lakea o Bersiba. Lakea e Abraham i made vonga.

E Huriki e Tune Nahor

20 Muri, e Abraham ni vakalongo maea, “E Milka, e girihine Nahor, i poda e huriki a koma bakovi. 21 A tabua e Us. E tarina e Bus, e Kemuel re tamane Aram, 22 e Kesed, e Haso, e Pildas, e Idlap, e Betuel.” 23 E Betuel e tamane Rebeka. E Milka i poda e huriki a koma a bakovi i polotolu ne Nahor, re turane Abraham. 24 E girihina tara, a rana e Reuma. Ia tara i poda e huriki e tuna a bakovi. A rane ria ra nga: e Teba, e Gaham, e Tahas, e Maka.

Copyright information for `BNP