Genesis 38

E Tamar i Tamia e Iuda

Na parava tara, e Iuda i pe e huriki e turana, i puru na tanga e Adulam, i made turana a bakovi a rana e Hira.

I matavisia vonga a ngatavine, e tune Sua, a bakovi o Kenan, I parangi vona. A ngatavine i singou, i podea a koma bakovi, i vunua e Er. I singou tabu, i poda tabua a koma bakovi, i vunua e Onan. Muri i poda tabua a koma bakovi tara, i vunua e Sela. Na tahuna e Iuda i made o Kesib, lakea e girihina i podea e Sela.

Muri e Iuda i vulakia e Tamar ge girihine Er, e tuna a tabua. A narone Er, i uka ma i kamumu na matane BAKOVI DAGI, lakea e BAKOVI DAGI i rabalakia.

Lakea e Iuda i takia e Onan, “O mahita turana e girihine tukamu, o vakabelea vona e tuna, ge muri mai a rabune hita.”

Pali e Onan i lohoka vona a koma bara i vakabelea, i uka ma ge tuna. Lakea na tahuna i mahita turana e girihine tukana, i guru tavulea a naruna na malala. I rata mavonga a vuhuna i koi ni vakabele a hamone tukana. 10 A naro i ratea i hale na matane BAKOVI DAGI, lakea i rabalaki tabua e Onan.

11 Lakea e Iuda i takia e kana, e Tamar, “I mate pali e girihimu, o hamule lakea na ruma e tamamu, o rukua e Sela ge koru rike taro.” E Iuda i luhoi maea, “E Sela bara i parangi vona a ngatavine iea, ia tara bara i mate manga e tukana rua.” Muri e Tamar i vano, i hamule lakea na ruma e tamana.

12 Muri na keva ranga, e girihine Iuda i mate, re tune Sua. E Iuda i kalo lobo vona, muri i sike o Timna, ge matai e huriki a bakovi ri pali a vuna sipsip vona. E turana, e Hira, na tanga e Adula, i sike turana.

13 Lakea tara viri i takia e Tamar, “E kamu ge lakea o Timna, ge pali a vuna sipsip vona.” 14 Lakea e Tamar i kali talea a mohu vona, i bolea a hineva, i kavitagua a matana, ge ratea i uka ma ni gi matakilala. I vano, i made na poridala na tanga e Enaim, na dala lakea o Timna. I rata mavonga, a vuhuna e Sela ngane i koru rike, pali e Iuda i uka ma i ratea tara ngava ne Tamar ge parangi vona.

15 Na tahuna e Iuda i masia, i pahaluhoi ta ia a ngoi, a vuhuna i kavitagua a matana. 16 I uka ma i matakilalea, ge kana. Lakea i lokovonga mai ia na dahana dala, i takia, “O valai ga mahita turamu.”

Lakea e Tamar i nanea, “Ga mahita turamu, a ra go habia nau?”

17 I koli mulea a nitana i ta maea, “Bara habia vomu tara meme karaba.”

Lakea e Tamar i nana tabu, “O habi taroa nau tara maki, muri bara habi mulea na tahuna o bole vilia a meme.”

18 E Iuda i nana maea, “A ra maki ga habi vomu?”

E Tamar i koli, i ta maea, “O habi nau a kodo vomu, turana a maki ni ru a kilakilamu vona, turana a motana.”

Lakea i habi ne Tamar a maki i ngaru, muri i mahita turana, i singou.
19 I mahita turana lobo, lakea e Tamar i hamule, i kali talea a hineva i kavitagu a matana, i rodo mulea a mohu vona.

20 Muri e Iuda i vakarua ne Hira a meme ge habia ne Tamar, ge bole mule a maki i habi vona. I vano, i uka ma i matavisia e Tamar. 21 Lakea i nana e huriki a bakovi, ra ri made vonga, “Avia ra ngoi i made bala na dala o Enaim?”

Lakea ri ta maea, “Ra hini ngi, i uka ngoi vona.”

22 Lakea e Hira i hamule lakea ne Iuda, i ta maea, “I uka ma a matavisia a ngatavine, pali e huriki a bakovi vonga ranga ri ta maea, ‘Ra hini ngi, i uka ngoi vona.’”

23 Lakea e Iuda i ta maea, “Ge a ra. Ge bole liu ra maki a habi vona, ma ga tu gu bole hamule bara ni nongovaki tarua. I uka maki. A vakarua pali vona a meme karaba, pali i uka ma o matavisia.”

24 A keva i tolu i lobo, ni vakalongo e Iuda, “E kamu e Tamar i ngoi viliha, ngane i singou.”

Lakea e Iuda i ta maea, “Mu bole talea, mu gutua na kanono ge mate.”

25 Na tahuna ni bole tala ni gi gutu, i rudu a ngava lakea ne lahuana i ta maea, “Iau a singou na bakovi i habi nau a maki nga. A maki ni ru a kilakilana a viri vona turana a motana, a kodo. Mu matakilala, a maki e rei?”

26 E Iuda i matakilala a maki nga, lakea i ta maea, “Ra ngatavine iea, i uka ngava. Iau a viri a tahoka a ngava, a vuhuna i uka ma a habia ge girihine tugu e Sela.” Muri e Iuda i uka ma i mahita turana tabu.

27 Na parava ta ge poda vona ri mata­kilalea i tahoka a boge na palona. 28 Na tahuna i popoda, a boge tara i toto tala muga a limana, lakea a ngatavine bolekori i bolea a hotu vururu, i kolo tatea na limana koma, i ta maea, “A koma iea ge pori taro.”

29 Pali a koma iea i turari mulea a limana, i pori muga a koma tara. Lakea i ta maea, “Ioe o rede, o pori muga.” Muri ni vunu e Peres.
(38:29)‘Peres’ na nita Hibru i manga e ‘pagitala.’
30 Muri e turana ra ni kolotata na hotu vururu a limana, i pori, ni vunu e Sera.
(38:30)‘Sera’ na nita Hibru e ‘vururu.’


Copyright information for `BNP