Genesis 40

E Iosep i Vakalohoka a Vurena Bakovi ala Rua

Na parava ranga muri, a vora ni ninu kilehi a vain ne Parao turana a vora ni gutu a bret vona, ru rata a naro e Parao i uka ma i ngaru. E Parao i madihi a hatena vona a vora vona nga, ra matakari na vain, a matakari na bret. Lakea i ru dili rua na roho na ubu ne huriki a tagari, ra na bavi ni ru dili e Iosep vona. A ubu na tagari i habi rua ne Iosep ge matakari. Ru made tabaka popote na bavi, lakea na rodo tara ru vurena varago, pali a vurene rua i uka ma i palupulupu. A nituveve na vurene rua ranga, i uka ma i palupulupu.

Na hatelanga e Iosep i valai mai rua, i matai rua ru loholege vona a vurene rua. Lakea i nana ra bakovi nga, ra ru made turana na ruma na matakari vona, “I navai muru mata matasia mavonga mona?”

Ru koli, ru ta maea, “Maria miri vurena, pali i uka tara viri koea ge tuveve polo a ngava kapiloho na vurene maria.”

Lakea e Iosep i ta maea, “A Vure kunana i kara ni tuveve a nita kapiloho na vurene marua. Muru tuverei a vurena marua, ga longo.”

Lakea a matakari na vain i tuvereia ne Iosep a vurena, “Iau a vurena vona a kai a vain, 10 i tahoka a rahana i tolu. Muri kunana na pagana i koru rike, i pura, i rara liu a kanena. 11 A bolea a kikei ne Parao, a bebe purua vona a naruna vain, muri a habia vona.”

12 Muri e Iosep i tuvevea vona a vurena, “A rahana i tolu i manga a parava i tolu. 13 A parava i tolu ge lobo, e Parao bara i bole mule ioe, o leho tabu vona, o habi tabu a kikei na vain vona, i manga hosi o leho vona. 14 Na tahuna o pagitala o made kamumu o luhoi iau, o rata a naro kamumu nau. O takia e Parao ge bole tala iau na bavi. 15 Ra iau, hosi ni turari na robo ne huriki a Hibru, ni bole valai koea. Na tahuna a made koea i uka ma ratea tara naro hale, pali ni vakamadihi tavula a kuligu, ni ru dili na bavi.”

16 Na tahuna a matakari na roho na bret i longoa e Iosep i tuveve kamumu a vurena bakovi i matakari a vain, lakea i takia, “Iau tara a tahoka a vuregu: a vurena a kube a kulopi na bret i tolu. 17 A kulopi polo meli liu, i vonu vona a maka bret legelege ne Parao. Pali a maka kadirovo ri valai ri karapasi tala a bret a kube na kulopi.”

18 E Iosep i tuvevea a vurena, “A nita kapiloho na vuremu i maea: a kulopi i tolu i manga a parava i tolu. 19 Ge lobo a parava i tolu, e Parao bara i vakatavore ioe na kai. Muri, a maka kadirovo bara ri valai ri kania a bobomu.”

20 Muri na parava i tolu, e Parao i rata a habu na parava ni poda vona, i kani turana e huriki a bolekori. I bole valai a matakari na vain, a matakari na bret, i vakapesi rua na matane huriki a bolekori vona. 21 Lakea i takia a bakovi i matakari a vain ge hamule lakea na leho vona, ge habi tabu a kikei na vain ne Parao. 22 Pali a bakovi i matakari na bret, ni bole ni vakatavore na kai, i manga a ngava e Iosep i tuveve polo vona. 23 Na tahuna a matakari na vain i pagitala, i uka ma i luhoi tabua e Iosep, i longokaburungia.

Copyright information for `BNP