Genesis 9

A Vure i Rata a Ngava Dagi Turana e Noa

a Muri a Vure i gamai e Noa turana e tuna mai i taki ria, “Mu bele kupo, mu vakavonu a malala. A kanirau lobo na malala, a kadirovo lobo, a maki lobo ri karaka na malala, a manu lobo, bara ri mangenge ne mua. Ngane a ru na limane mua. A maka maki mahuri ri laho ga maki ni kani ne mua, i manga a hini muga a habi ne mua a kobo mu kani. Pali ngane a habi a maki lobo ga maki ni kani ne mua. b Pali a bobona maki i vona a dara, naha ni kani, a vuhuna a dara i habi a nimahuri. Pali e rei a bakovi, a kanirau, a livoa hateka i rabalakia tara viri, i muholi hateka bara kolia. E rei i rabalaki a viri tara, iau bara kolia vona a naro i ratea.

c E rei a bakovi i rabalakia a viri tara,
ia kunana bara i mate na limana bakovi,
a vuhuna iau a Vure
a rata rikea a bakovi i manga iau.
d Pali mua, mu bele kupo mu vakavonua a malala.”

Muri a Vure i takia e Noa turana e tuna mai, “Ngane ga vakatubua a ngava dagi turamu, turana e huriki a hamomu ri gi bele muri ma, 10 turana a maki mahuri ra ri turane mua: a maka kadirovo, a sipsip a bulmakau, a kanirau, turana a maki lobo ri pagitala turane mua na agarungu, ra maka maki mahuri lobo na malala. 11 Iau a rua a ngava dagi nau turane mua. A ta muholi, a marungulolo i uka ma ge ratapile tabu a maka maki mahuri. Muholi hateka a marungulolo i uka ma ge ratapile tabu a malala.”

12 Muri, a Vure i ta maea, “Iau a rua a kuriki na bubu, ge a nivakasiri na ngava dagi nau na maka maki mahuri na malala. Ra kuriki iea a nivakasiri na ngava dagi a rata turane mua, turana a maka maki mahuri ri turane mua na agarungu. Ra ngava iea i lakea tabu ne huriki a hamomu bara ri bele muri ma. 14 Na tahuna iau a ru a bubu polomeli na hunu, a kuriki bara i pesi vona. 15 Iau bara luhoi mule a ngava dagi a ratea turana a maka maki mahuri na malala. Nahea tabu a marungulolo ge ratapile lobo a maka maki mahuri. 16 Na tahuna a kuriki i pesi na bubu, bara masia, a luhoi mule a ngava dagi i tabuli vakaroro turagu, turana a kabu na maki mahuri na malala.” 17 Muri a Vure i takia e Noa, “A kuriki a nivakasiri na ngava dagi, a habia na maka maki mahuri na malala.”

E Tune Noa ala Tolu

18 E tune Noa to pagitala na agarungu ra nga: e Sem, e Ham, e Iapet. (E Ham e tamana e Kenan). 19 re tune Noa nga, tou a vuhuna e huriki lobo. To vakabele e huriki, muri ri mariu viliha lae na malala.

20 E Noa a bakovi ni leho na hania, i vakatubu ni varo a vain na hania vona. 21 Na parava tara, i ninu ranga vain vona, i manga, i mahita bobo pololilo na kape vona. 22 E Ham e tamane Kenan, i masia e tamana i mahita bobo, lakea i pagitala, i vakalongo e turana rua polovavo. 23 Lakea e Sem rua e Iapet ru nugu gaviri na bitone rua a varakia, ru laho bitona ru kavitagua e tamane rua, ra i mahita bobo. Ru matahere, a vuhuna ru koi ni masia e tamane rua i bobo. 24 Na tahuna e Noa i hadongo, i palala a gina, ni vakalongo vona a naro i ratea vona e tuna, ra kabina ruru. 25 Lakea e Noa i tahatea i ta maea,

“E Kenan ni gi ruduraha!
Bara ia a vorakato ne turana rua.”
26 Muri i ta maea tabu,

“Ni gi kavurike e BAKOVI DAGI, a Vure ne Sem,
pali e Kenan bara ia a vorakato ne Sem kunana.
27 A Vure ge hudo talea a hamone Iapet,
e huriki a hamona ri gi made turana a hamone Sem,
pali e Kenan ge ia a vorakato ne Iapet.”
28 Muri na marungulolo, e Noa i made tabu na pida i 350. 29 A pida vona ni gi palupu lobo i 950, muri i mate.

Copyright information for `BNP