d1:5 1Sto 17:13; Sng 2:7; Apo 13:33
f1:7 Sng 104:4
g1:8-9 Sng 45:6-7
h1:10-12 Sng 102:25-27
i1:13 Sng 110:1
j1:14 Sng 34:7; 91:11

Hebrews 1

A Tuna Vure i Rangi e Huriki a Agelo

Hosi a Vure i habi a ngava ne huriki a propet, muri ri taki polo ne huriki a gare ne hita hosi. I rata mavonga balaka kupo, na naro legelege. a Pali ngane, na tahuna a nilobona parava i tubu, a Vure i habi a ngava ne Tuna, lakea e Tuna i taki polo ne hita. Ne Tuna kunana, a Vure i ratarike a hunu, a malala, a maki lobo. A Vure i rata a maki lobo nga ge ne vona e Isu. b E Tuna i vakasiri a bagetuanga na Vure. I manga muholi a Vure. A nitana i tahoka a nitora. Na nitana kunana i rata a maki lobo ri tabuli tora. I vakaloboa a leho vona ni bole a nimadhi na naro hale ne huriki, ge rata ria ri gi malamala na matana Vure. Muri i made na limana kanena Vure, ra Viri Dagi na hunu, a rana i dagi hateka, i tahoka a nitora dagi. c I rata mavonga, i vakasiri manga i rangi liu e huriki a agelo. I manga a rana Tuna Vure i rangi a rane huriki a agelo.

d Hosi a Vure i uka ma i takia tara agelo ge ta maea,

“Ioe e tugu.
Ngane Iau e Tamamu.”
O ge ta maea,

“Iau ge Iau e Tamana,
Ia ge Ia e Tugu.”
e Na tahuna a Vure i rudu vilia na malala e Tuna a tabua, i ta maea,

“E huriki a agelo lobo ri gi kavurike ia.”
f A Vure i luhoi e huriki a agelo, lakea i ta maea,

“A Vure i rata e huriki a agelo vona ri manga vilu.
I rata e huriki a vora vona ri manga hubena kanono.”
g Pali a Vure i luhoia e Tuna, lakea i ta maea,

“Ioe, a Vure, go matakari vakaroro,
o matakari e huriki na naro kiripiripi.
O ngaru a naro kamumu. O marikoi a naro hale.
I mavonga a Vure, a Vure vomu, i rata ioe o vivi,
a nivivi vomu i rangi a nivivi ne huriki e turamu.”
10  h A Vure i taki tabu e Tuna, i ta maea,

“Ioe, o Bakovi Dagi, o ratarike a malala hosi na nitubuna maki lobo.
A hunu tara, o ratarikea.
11 A malala a hunu bara ru lobo, pali ioe bara o made vakaroro.
A malala a hunu bara ru ropo manga a varakia.
12 Go pilu rua i manga a varakia, o vuroki rua.
Bara o kuloi rua, i manga a viri i kuloi a varakia vona.
Pali ioe bara o made mavonga kunana.
O uka ma go mapulo. Go made vakaroro.”
13  i A Vure i uka ma i takia tara agelo ge ta maea,

“O valai o made na limagu a kanegu,
ge harena na tahuna ga ru na tarumu e huriki a pile vomu.”
14  j E huriki a agelo a hanu kunana. A Vure i rudu ria ri gi tuhori e huriki a bakovi a ngatavine a Vure i korimule ria.

Copyright information for `BNP