Hebrews 10

E Kristo i Vakalobo a Maka Nihabi

A vinara ne Moses, ra i taki ni gi habi na Vure a nihabi na pida takutaku, i uka ma ri manga a maki muholi na hunu. Ri tebi. Ria a hanuna maka maki kamumu kunana ta ri gi valai a vuhuna ri keri ni korimule e huriki ri valai tabukoi na Vure. A nihabi bara i rata e huriki ri malamala, i uka ma ri gi habi vakaroro, a vuhuna bara i rata e huriki ri dili na roho na Vure ri malamala. Bara ri hataki na hatene ria ri uka rarenga na naro hale. A nihabi nga, ri rata e huriki ri longo visi tabu na pida vakaroro a naro hale ne ria, a a vuhuna a darana bulmakau, a darana meme, ru keri ni puga vuroki a naro hale ne huriki.

b I mavonga, na tahuna e Kristo i puru valai na malala, i ta maea,

“I uka ma o ngaru a nihabi, a nitabari.
Pali o kisi purua a kakaigu.
I uka ma o vivi vona a nihabi gutu-vuro,
a nihabi na naro hale.
Muri a ta maea, ‘O Vure, o longo! A valai ngane, ga ratea a ningaru vomu,
i manga a ngava ni here puru virihi mai iau na Hinere.’”
I muga i ta maea, “O uka ma o vivi vona a nihabi gutu-vuro, a nihabi na naro hale.” Pali a maka nihabi nga, a vinara i taki ni gi rata. Muri i ta maea, “O longo! A valai ngane, ga ratea a ningaru vomu.” Lakea a Vure i ravunu a ngava dagi hosi, i habi a ngava dagi karaba ge bole a murina. 10  c Na ningaru na Vure, e Isu Kristo i mate, i habi mulea na Vure a kakaina, i manga a nihabi. Na naro iea, i ru here here hita, hita ne vona Vure kunana.

11  d E huriki a prister ri leho na parava vakaroro. Ri habi vakaroro a nihabi. Pali a nihabi ne ria i uka ma ri ravunu vuroki a naro hale ne huriki. 12 Pali a nihabi ne Kristo, i habi balaka taku kunana. A nihabi vona i kara ni puga vuroki a naro hale ne huriki lobo na parava vakaroro. Muri i made puru na limana kanena Vure. 13  e Ngane i davea a parava a Vure ge ratapile e huriki a pile vona. 14 Ra ni habi i taku iea, i rata e huriki a bakovi a ngatavine, ra Vure i ru here here ria ne vona, ri malamala liu.

15 A Hanu Kiripiripi i pukatala a ngava ne hita, i ta maea,

16  f “E Bakovi Dagi i ta maea,
‘A ngava dagi ga ratea turane ria muri ma ge maea:
Ga ru a maka vinara nau na hatene ria.
Ga here na niluhoi ne ria.’”
17  g Muri i ta tabu, i ta maea,

“I uka ma ga luhoi tabu a naro hale ne ria,
ra ri putu puru a vinara nau.”
18 Na tahuna a Vure i puga vuroki a naro hale na viri, i uka tabu tara nihabi si gi habia ni puga vuroki a naro hale.

Si Gi Luhoi Torea a Vure

19  h Mua o huriki a turagu. Ngane i uka ma si mangenge. Na darane Isu, si dili kunana, si bele na matana Vure, i manga e huriki a prister ri dili na tabeke ni taba. 20  i Si dili na dala karaba na nimahuri. A dala iea, e Isu i rata puru ne hita, i dili polo na lavalava, ra kakaine Isu. 21 Si tahoka a prister dagi i matakari e huriki a tara na Vure. 22  j A ngava nga i muholi, i mavonga, si gi lakea tabukoi na Vure. Si gi bele vona turana naro muholi, si gi lohoka vona a maki si luhoi torea i muholi. I guru langa na hatene hita a darana, i vakalobo a rarenga na naro hale si rata, ge vakasiri hita si matapado na matana Vure. I vahilolo a kakaine hita na naru i maga. 23 Nahea si gi loho ruarua. Si gi pesi tata na ni luhoi tora a maki si pasimata vona si gi bole, a vuhuna a Vure i keri ni tatami. I rata lobo a maki i taki ge rata. 24 Hita takutaku si gi matakana a dala ni vadorike hita na naro ni vangaru, ni rata a naro kamumu. 25  k Nahea si gi lohopile a naro na nivapopo, manga e huriki ranga ri koi ni vapopo. Hita lobo si gi vakatora a niluhoi ne huriki e turane hita, a vuhuna i tabukoi ge bele a parava e Bakovi Dagi ge hamule valai vona.

26  l E rei a viri i lohoka vona pali a nita muholi, pali i tabana i luhoi ge rata a naro hale, lakea i rata, i uka tabu a nihabi na naro hale vona. 27  m A viri i rata mavonga, ge mangenge. Ge dava kunanea a Vure, ra viri ge pelekado e huriki, ge ratapile na kanono dagi e huriki ri hehea. 28  n Si lohoka vona pali, a viri i putu puru a vinara ne Moses, lakea a viri ala rua o ala tolu to masia, bara to taki talea, ra bakovi iea i uka ma ni gi dodo. Bara ni rabalaki. 29  o Pali a viri i lohopilea a Tuna Vure bara i bole a nimadihi dagi hateka, a vuhuna i biua a darane Isu, ra i vakatorea a ngava dagi na Vure. A ngava dagi iea i ru here hita ne vona a Vure kunana. Pali a viri i lohopilea a Tuna Vure, i ratea a Hanuna Vure i madihi a hatena. Ra Hanuna Vure, a mari ni rata kamumu hita. 30  p Si lohoka vona a Vure i ta maea, “A ni koli a naro hale a leho nau. Iau kunana ga koli a naro hale ne huriki, ga vakamadihi ria.” Lakea i ta tabu i ta maea, “E Bakovi Dagi ge pelekado a narone huriki a ngate vona.” 31 A maki ni mangenge hateka vona, a Vure Mahuri ge lakavu ioe, ge vakamadihi ioe.

32 Mu luhoi mule tabu na tahuna hosi mu bole a ngava muholi na Vure. Na tahuna iea e huriki ri habi a maregoa dagi ne mua, mu bole a nimadihi i kupo. Pali mu pesi tora, mu rura kunana. 33 Na parava ranga ni vakapesi mua na matane huriki, lakea ri biu mua, ri vakamadihi mua. Na parava ranga mu pesi turana e huriki ranga ri bole a maka maregoa, mu tuhori ria. 34  q Mu dodo, mu kori e huriki ni ru dili na bavi. Na tahuna e huriki ri radi a maka maki ne mua, mu vivi kunana, a vuhuna mu lohoka vona, a maki muholi ne mua i tabuli na hunu, bara i tabuli vakaroro. 35 I mavonga, nahea mu gu loho ruarua, a vuhuna na tahuna mu pesi tata ni luhoi torea a Vure, bara mu bole a mapa dagi muri ma. 36 Mu pesi tora, mu muri mai a ningaru na Vure. Muri bara mu bole a maka maki a Vure i ta muholi vona hosi ge habi ne mua. 37  r A ta mavonga, a vuhuna a Hinere i ta maea,

“I uka ma ge tabaka a viri a ta muholi vona ge valai, bara i valai. I uka ma ge maradoi.
38 A viri malamala nau ge luhoi tora vakaroro iau.
Pali ia bara i pesi hoho mule,
i uka ma ga vivi vona.”
39 Pali i uka ma si pesi hoho mule ge ratapile hita a Vure. I uka. Hita si luhoi torea a Vure, lakea ge habi a nimahuri vakaroro ne hita.

Copyright information for `BNP