a7:1 Ion 5:18
e7:16 Ion 12:49; 14:10
f7:18 Ion 8:50
h7:20 Ion 8:48; 10:20
j7:23 Ion 5:8-10,16
k7:27 Ion 7:41; 9:29
m7:30 Ion 7:44
n7:34 Ion 8:21; 13:36
o7:37 Levi 23:36; Ais 55:1; Ion 4:14
p7:38 Ais 58:11
q7:39 Ion 16:7; 20:22; Apo 2:4
r7:40 Ion 6:14
s7:41 Ion 1:46
t7:42 Sng 89:3-4; Mai 5:2
v7:48 Ion 12:42
w7:50 Ion 3:1‑2
x7:52 Ion 7:41-42

John 7

A Habu na Kape

a Muri e Isu i laho lae pololilo na tabeke ne Galili. I koi ni lakea tabu na tabeke ne Iudea, a vuhuna e huriki a Iuda ri ngaru ni rabalakia. b Pali na tahuna a habu tara ne huriki a Iuda i tabukoi, a Habu na Kape, e huriki e tarina ri takia, ri ta maea, “O lakea taro o Iudea, e huriki a murimuri vomu ri gi matai a maka nivakasiri o rata. A viri i ngaru e huriki ri gi lohoka vona i uka ma ge rata kapiloho a maki. O vano, o vakasiri ioe ne huriki lobo, a vuhuna ioe o rata a maka naro nga.” c E huriki e tarina ri ta maea, a vuhuna i uka ma ri luhoi torea.

Lakea e Isu i taki ria, i ta maea, “A parava nau i uka ma i valai ma. Pali mua, a parava lobo i kamumu. E huriki a bakovi a ngatavine na malala ri ngaru mua, pali ri marikoi iau a vuhuna a taki tala a rabu hale ne ria. Mu vano mu lakea na habu. Iau i uka ma ga vano ma, a vuhuna a parava nau i uka ma i valai ma.” Lakea i made vonga o Galili.

10 Pali na tahuna e huriki e tarina ri vano pali, i muri kikeri ia, i uka tara viri ge masia.

11 E huriki a Iuda ri davea e Isu na habu, ri virokanea, ri vanana lae vona i lokovai. 12 E huriki ri vareme na ngava, i viliha lae a nitane ria. I ranga ne ria ri ta maea, “E Isu ia a bakovi kamumu.”

I ranga e huriki ri koli ri ta maea, “I uka, e Isu i tami e huriki.”
13 Pali i uka tara viri ge pukatala a ngava ne huriki, a vuhuna ri mangenge ne huriki a Iuda.

E Isu i Vara

14 A habu i popote ge lobo, lakea e Isu i sike na roho na Vure, i vakatubu ni vara. 15  d A nivara ne Isu i rata e huriki a Iuda ri ngapa, lakea ri vanana, “Ra bakovi iea, i bole vai a lohokanga? I uka tara viri ge tovoa.”

16  e Lakea e Isu i koli ria, i ta maea, “A vinara nau i uka ma ne nau. I valai na viri i rudu iau a valai. 17 E huriki ri ngaru ni muri mai a ningaru na Vure bara ri mata­kilaka vona a vinara nau i valai na Vure, i uka ma a ngavagu kunana. 18  f A viri i ta na ngavana kunana i ngaru ni vakadagi a rana. Pali a viri i leho ni vakadagi a rana a viri i rudua i valai, i uka ma ge tatami, ia a bakovi ni ta muholi. 19  g Hosi e Moses i habi a vinara ne mua. Pali i uka ma mu longototo a vinara. Pali i navai a hini mu ngaru ni rabalaki iau?”

20  h E huriki ri koli, ri ta maea, “A hanitu i dili vomu! E rei a viri ge rabalaki ioe?”

21 Lakea e Isu i taki ria, “A ratea a nivakasiri i taku kunana, lakea mua lobo mu turutu vona. 22  i Pali e Moses i habia ne mua a vinara ni pala a kulina bakovi, lakea mu pala a kulina koma na Parava Nimalo. I muholi ngi, a vinara iea i uka ma i valai ne Moses, i valai ne huriki a gare hosi. 23  j Mu pala a kulina koma na Parava Nimalo ne vona ni muri mai a vinara ne Moses. Pali i navai mu tahate vona a hini iau a vakamahuri a kakaina bakovi na Parava Nimalo? 24 Naha ni pelekado a maki na matane mua kunana. Mu pelekado kamumu a maki.”

E Isu Ia e Kristo

25 Muri i ranga e huriki o Ierusalem ri vakatubu ni vanana maea, “Ra bakovi iea, ia kunana ni matakana ta ga ni gi rabalaki? 26 Pali ngane i vara na matane huriki, e huriki a matakari i uka ma ri tahatea. I mata manga ri matakilalea e Isu ia e Kristo. 27  k Si lohoka vona a tanga vona, pali na tahuna e Kristo bara i valai, i uka tara viri ge lohoka vona a hini i valai vona.”

28  l Muri, e Isu i tabana ni vara pololilo na roho na Vure, i ta rike, i ta maea, “I muholi ngi, mu lohoka nau, mu lohoka vona a tanga a valai vona. Iau i uka ma valai koea na ni ngaru nau. E Tata i rudu iau a valai. Ia a bakovi ni ta muholi. Mua i uka ma mu lohoka vona. 29 Pali iau a lohoka vona, a vuhuna iau a made turana, i rudu iau a valai.”

30  m Na tahuna ri longoa a ngava iea, ri toni ni lakavua, pali i uka tara viri ge nugutatea, a vuhuna a parava vona i uka ma i valai ma. 31 Pali i ranga e huriki ri luhoi tora ia, ri ta maea, “Ra bakovi iea e Kristo. I rata a nivakasiri i kupo hateka.”

32 E huriki a Pariseo ri longo e huriki ri vareme vona a maka ngava e Isu i taki. Muri ri rudu e huriki a prister dagi, e huriki a Pariseo, e huriki a tagari na roho na Vure ri gi lakavua e Isu.

33 Lakea e Isu i ta maea, “Iau ga made turane mua popote kunana, muri bara hamule lakea na viri i rudu iau a valai. 34  n Bara mu matakana iau, pali i uka ma mu gu matavisi iau. A hini ga made vona, bara mu keri ni valai vona.”

35 Lakea e huriki a Iuda ri vanana, ri ta maea, “Ra bakovi iea i ngaru ni lokovai i uka ma si gi masia? Ge lakea mai e huriki ne hita ri made viliha iea o Gris, ge vara ria vonga? 36 Pali na tahuna i ta maea, ‘Bara mu matakana iau, pali i uka ma mu gu matavisi iau,’ i navai a pelegona ngava iea? Pali a nita tara vona i ta maea, ‘A hini a made vona, bara mu keri ni valai vona’, i navai a pelegona?”

A Naru na Nimahuri

37  o A nilobona parava na habu, a parava dagi hateka. Lakea na parava iea, e Isu i pesi i gale dagi, i ta maea, “E rei a viri i marohu, ge valai nau, ge ninu. 38  p E rei a viri i luhoi tora iau, a naru na nimahuri bara i tua pololilo vona, i manga a hini ni here puru na Hinere.” 39  q E Isu i taki e huriki ri luhoi tora ia bara ri bole a nitora na Hanu Kiripiripi. Na tahuna iea a Vure i uka ma i rudua ma a Hanuna, a vuhuna e Isu i uka ma ni vakabagetu ma.

40  r I ranga e huriki ri longoa a nitana ri ta maea, “Muholi hateka ra bakovi iea a propet.”

41  s Pali i ranga e huriki ri ta maea, “A bakovi iea e Kristo.”

Pali i ranga e huriki ri nana rovi tabu ri ta maea, “Re Kristo, ge valai navai o Galili?
42  t A Hinere i taki e Kristo ge valai na kabu ne Davit, na tanga ne Davit, e Betlehem.” 43 Pali e huriki ri tahoka a niluhoi takutaku ne ria ne Isu, i vaperesi lae a niluhoi ne ria. 44 I ranga e huriki ri ngaru ni lakavua, pali i uka ma ri ratea.

E Huriki a Gare i Uka Ma Ri Luhoi Torea e Isu

45 Muri e huriki a tagari na roho na Vure ri hamule. Lakea e huriki a prister dagi, a Pariseo ri nana ria, “I navai i uka ma mu turari vilia?”

46  u Lakea e huriki a tagari ri vakalongo, ri ta maea, “I uka tara viri ge ta manga a bakovi iea.”

47 E huriki a Pariseo ri ta puhaki, ri ta maea, “Mua ranga, a bakovi iea i tami mua. 48  v Mu matai mia e huriki a Pariseo, e huriki a matakari. E rei tara ne mia ge luhoi tora ia? 49 I uka liu! Pali re huriki a manga nga, ri luhoi torea, i uka ma ri lohoka na vinara. A Vure ge ratapile ria.”

50  w E Nikodemus, a turane ria, hosi i vano i masia e Isu, i taki ria, i ta maea, 51 “A vinara ne hita i taki bara si longoa a bakovi ge ta taro, si gi matakilaka vona a narona, muri ni gi pelekado.”

52  x Pali ri ratapilea na ngava, ri ta maea, “Ioe tara a bakovi o Galili. O gi kamumua a Nita na Vure, bara o masia i uka tara propet ge valai o Galili.”

53 Muri ri hamule mai a tanga takutaku ne ria.

Copyright information for `BNP