Joshua 12

E Huriki a Hariki Ni Rangi

1 a  E huriki a Israel ri mulangi na vabinga, ri bole lobo a maka malala na tabeke na nirikena haro ne Iordan. A harena malala iea i tubu na maloku na naru e Arnon, i lakea na maloku ne Iordan i harena na lolo e Hermon. Muga e huriki a Israel ri rangi a hariki ala rua na vabinga. Ra hariki nga e Sihon e Og. 2E Sihon a hariki o Amor i made na tanga e Hesbon. A harena robo vona i tubu na tanga e Aroer na harena na maloku ne Arnon, i polo na kurukuruna maloku iea i harena na naru e Iabok. A naru e Iabok i nagi e huriki a Arnon a Amon. Ra malala iea a tabekena robo e Gilead. 3Na tabeke na nirikena haro na maloku ne Iordan, a nagi i vakatubu na darilomu e Galili, i lakea na tanga e Bet-Iesimot tabukoi na Dari Mate, i puru lakea i harena na taruna lolo e Pisga.

4E huriki a Israel ri vaubi ne Og a hariki na robo e Basan, ri ratapilea. E Hok a hamone Repaim. Hosi e huriki a Repaim ri ala kupo, pali ngane ri ala popote kunana. E Og i matakari a tanga e Astarot e Edrei, 5a tabekena lolo e Hermon, a tanga e Saleka a maka tabeke lobo na robo e Basan i harena na nagi ne huriki a Gesur a Makat. I matakari tabu a tabekena robo e Gilead, i harena na nagi na robo ne Sihon a hariki o Hesbon. 6 b  E Moses turane huriki a Israel ri ratapile a hariki nga ala rua na vabinga. Lakea e Moses a vora ne BAKOVI DAGI i habia a malala iea na kabu ne Reuben, na kabu ne Gad, na kalavana kabu ne Manase.

7E Iosua turane huriki a Israel ri ratapile lobo e huriki a hariki na maka tanga na tabeke na nirolona haro ne Iordan, i tubu na tanga e Bal-Gad na maloku ne Lebanon, i harena na lolo e Halak tabukoi na robo e Idom. 8Ri bole a maka tanga na lolo, a tanga na kupona na tabeke na nirolona haro, a maloku ne Iordan, a maka kupona tabukoi o Iordan, a tabeke i ngeki, a robo e Negev na tabeke mule puru. Hosi e huriki a Hiti, a Amor, a Kenan, a Peres, a Hivi, a Iebus ri made vona a malala iea. E huriki a Israel ri rangi e huriki a hariki na tanga nga: 9e Ieriko, e Ai tabukoi o Betel, 10e Ierusalem, e Hebron, 11e Iarmut, e Lakis, 12e Eklon, e Geser, 13e Debir, e Geder, 14e Horma, e Arad, 15e Lipna, e Adulam, 16e Makeda, e Betel, 17e Tapua, e Heper, 18e Apek, e Lasaron, 19e Madon, e Hasor, 20e Simron-Meron, e Aksap, 21e Tanak, e Megido, 22e Kedes, e Iokneam na tabeke ne Karmel, 23e Dor ia o Napat-Dor, e Goim na tanga e Gilgal, 24e Tirsa. E huriki a Israel ri ratapile e huriki a hariki ala ravulu tolu a polona i taku, ri bole a maka tanga ne ria.

Copyright information for `BNP