Joshua 13

I Ranga Malala i Uka Ma Ni Bole Ma

Na tahuna e Iosua i kupo a pida vona i gare, e BAKOVI DAGI i takia, “Ioe o gare ngane. Pali i kupo a malala i uka ma o bole ma. Ra malala ne huriki a Palestina, a malala ne huriki a Gesur i tababana: i tubu na naru e Sihor na nirikena haro o Egipto, i lakea na robo e Ekron na tabeke mule sike, ra tabeke iea i matakaria e Kenan; a malala ne huriki a matakari o Palestina ri made o Gasa, o Asdod, o Askelon, o Get, o Ekron; a malala ne huriki a Avim na tabeke mule puru; a malala ne huriki a Kenan; a tanga e Meara na malala ne huriki a Sidon, i lakea na tanga e Apek na nagi na malala ne huriki a Amor; a malala ne huriki a Gebal; a malala lobo ne Lebanon i tubu na tabeke na nirikena haro na tanga e Bal-Gad, tabukoi na lolo e Hermon, i harena na dala lakea o Hamat; a a malala ne huriki e Sidon ri made na maka tanga na kurukuruna maka lolo ne Lebanon; a tanga e Misrepot-Maim. Iau kunana ga lili tala a kabu nga, o bole a malala ne ria, o veru na maka kabu ne Israel, ge ne ria liu. O ramai a ngava a taki. O verua ra malala nga na kabu i polova turana a kalavana kabu ne Manase, ri gi bole, ge ne ria liu.”

A Malala na Tabeke na Nirikena Haro ne Iordan

b A kabu ne Reuben, ne Gad, a kalavana kabu ne Manase, ri bole a malala na tabeke na nirikena haro na naru e Iordan. E Moses a vora ne BAKOVI DAGI i habi ne ria pali. A malala ne ria i tubu na tanga e Aroer na harena maloku na naru e Arnon, i lakea mai a tanga i pesi na kurukuruna maloku iea. Ra malala iea i bole loboa a bilane Medeba i harena na tanga e Dibon. 10 Ri bole lobo a maka tanga ne Sihon, a hariki ne huriki a Amor. Hosi e Sihon i made na tanga e Hesbon, i matakari a maka tanga i harena na nagi ne huriki a Amon. 11 Ri bole tabua a malala ne huriki a Gilead, a tabeke ne huriki a Gesur a Makat, a tabeke na lolo e Hermon, a tabeke na robo e Basan i harena na tanga e Saleka, 12 a malala lobo i matakari e Og na tahuna i matakari e Astarot e Edrei. E Og a hamone Repaim, ia a iku ne huriki a hariki lobo e Moses i rangi, i lili tala na vabinga. 13 Pali e huriki a Israel i uka ma ri lili e huriki a Gesur a Makat. Ri tababana ni made turane ria i harena mona.

14  c Pali e Moses i uka ma i habia na kabu ne Levi tara tabekena malala. A maka nihabi ne huriki ri habi ne BAKOVI DAGI a Vure ne Israel, e huriki a Levi ri bole, i ramaia a nitane BAKOVI DAGI.

15 E Moses i habi a tabekena malala na kabu takutaku ne Reuben, ri bole ne vone ria liu. 16 A nagi na malala ne ria i tubu na tanga e Aroer na harena maloku ne Arnon, i lokovonga na tanga i pesi na kurukuruna maloku iea. Ra tabekena malala iea i bole loboa a bilane Medeba. 17 Muri a nagi i lakea na tanga e Hesbon i lokovonga i bele na maka tanga na bila: e Dibon, e Bamot-Bal, e Bet Bal-Meon, 18 e Iahas, e Kedemot, e Mepat, 19 e Kiriataim, e Sipma, e Seret-Sahar ra tanga i pesi na kupona na bila, 20 e Bet-Peor turana a maka tanga na gagana lolo e Pisga e Bet-Iesimot, 21 turana a maka tanga ranga na bila. Ra tanga nga, ne vona e huriki a Amor, hosi i matakari a hariki e Sihon, ra hariki na tanga e Hesbon. E Moses i rangia na vabinga, muri i rangi tabu e huriki a matakari ne huriki a Midian, a Evi, a Rekem, a Sur, a Hur, a Reba. Re huriki a matakari nga ri made vona a malala iea, lakea a hariki e Sihon i habi a leho ne ria ri matakari a tabekena malala ne ria takutaku. 22 E Balam e tune Beor a bakovi na lohokanga na maki ge bele muri ma, ia tara e huriki a Israel ri rabalakia. 23 A naru e Iordan i nagia a malala na kabu ne Reuben. Ri bolea a malala ri vaveru, a malala ne ria liu.

24 E Moses i veru tabua a tabekena malala iea na kabu ne Gad, ri bole a malala ne ria liu. 25 I habia ne ria a maka tanga na robo e Iaser turana a maka tanga na robo e Gilead, a malala ne huriki a Amon i harena na tanga e Aroer pololilo na malala ne huriki a Amor, tabukoi na tanga e Raba na tabeke na nirikena haro. 26 Ra malala iea i tubu na tanga e Hesbon, i harena na tanga e Ramat-Mispe e Betonim. I tubu tabu na tanga e Mahanaim i harena na nagi na tanga e Debir. 27 Ri bole tabu a tanga nga na maloku ne Iordan: e Bet-Haram, e Bet-Nimra, e Sukot, e Sapon, a tabekena malala na hariki e Sihon na tanga e Hesbon. A nagi na malala ne huriki a Gad i tubu na naru e Iordan, i lakea na nirikena haro, i sike lakea i harena na darilomu e Galili. 28 Ra maka tanga nga, e huriki a hamone Gad ri bole ne vone ria liu.

29 E Moses i habi tabua na hamona kalavana kabu ne Manase tara tabekena malala, ri bolea a malala ne ria liu. 30 A malala i tubu na tanga e Mahanaim i bole loboa a tabeke ne Basan, hosi e Og a hariki o Basan i matakaria. E huriki a Manase ri bole tabu a tanga i ravulu polotara ne huriki a Iair na robo e Basan. 31 Ra malala iea i dili turana a tabeke na robo e Gilead, e Astarot, e Edrei ra tanga i made vona a hariki e Og. E Moses i habia a malala iea na kalavana kabu ne Makir, e tune Manase.

32 E Moses i veru na kabu nga a malala na gagane Iordan na tabeke na nirikena haro na tanga e Ieriko, na tahuna ri made na bilane Moab. 33  d Pali e Moses i uka ma i habi ne huriki a hamone Levi ranga malala. E BAKOVI DAGI a Vure ne Israel, ia kunana a maki kamumu ri bolea, i manga a ngava i ta muholi vona pali.

Copyright information for `BNP