Joshua 17

A Malala Ni Habi na Kabu ne Manase

A tabekena malala tara ni habi na kabu ne Manase, e tune Iosep a tabua. E tune Manase a tabua e Makir, e tamane Gilead. E Makir a bakovi hateka na vabinga, lakea ni vakasiri vona a tabekena malala e Gilead e Basan, ge ne vona e huriki a kabu vona. E huriki a hamone Manase e tune Iosep, a rane ria ra nga: e Abieser, e Helek, e Asriel, e Sekem, e Heper, e Semida. E huriki a Israel ri habi ne huriki a Manase ra malala i tabuli na tabekena nirolona haro ne Iordan. E Selopehad e tune Heper, e Heper e tune Gilead, e Gilead e tune Makir, e Makir e tune Manase. Pali e Selopehad i uka e tuna bakovi. I tahoka kunana e huriki e tuna ngatavine. A rane ria ra nga: e Mala, e Noa, e Hoglah, e Milka, e Tirsa. a Ra ngatavine nga ri vano, ri matai a prister e Eleasar turane Iosua e tune Nun, e huriki a matakari, ri taki ria, “E BAKOVI DAGI i vakukua e Moses ge habia na kabu ne mia tara tabekena malala.” Lakea ri habia ne ria a malala, ge manga ne huriki a turane ria a bakovi. I mavonga e huriki a hamone Manase ri bole a tabekena malala i ravulu, na nirolona haro ne Iordan, turana a tabeke i rua tabu ne Gilead ne Basan, a vuhuna e huriki a Israel ri habi a malala ne huriki e tune Selopehad a ngatavine. I ranga hamone Manase ri bolea a malala ne Gilead ne Basan na tabeke na nirikena haro ne Iordan.

A nagina malala na kabu ne Manase i tubu na malala na kabu ne Aser na tabeke mule sike, i vano i bele na tanga e Mikmeta, na tabeke na nirikena haro na tanga e Sekem. A nagi i puru lakea na tanga ne huriki a En-Tapua. A malala na tanga e Tapua ne vona a kabu ne Manase. A tanga e Tapua i pesi na nagi na kabu ne Manase, pali e Tapua a tanga ne huriki a kabu ne Epraim. A nagi i puru na naru kiroko e Kana. A maka tanga ri pesi mule puru na naru iea, ne vona a kabu ne Epraim. Ra tanga nga ri pesi na kurukuruna maka tanga ne huriki a Manase. A nagi na kabu ne Manase i tabuli mule sike na naru e Kana, i vano i bele na Dari na Kurukuruna Malala. 10 A malala i tabuli mule puru na naru e Kana, ne vona e huriki a Epraim. A malala i tabuli mule sike, ne vona e huriki a Manase. Na tabeke na nirolona haro, a Dari na Kurukuruna Malala i tabuli manga a nagi ne ria. Na tabeke mule sike, a nagine huriki a Manase i vano i harena na malala ne huriki a Aser na tabeke na nirolona haro, na malala ne huriki a Isikar na nirikena haro. 11 Pololilo na malala ne huriki a Isikar a Aser, e huriki a Manase ri bole a maka tanga nga: e Bet-San turana a maka tanga ri pesi tabukoi vona, e Napat-Dor, e Endor, e Tanka, e Megido turana a maka tanga ri pesi tabukoi ne ria. 12  b Pali e huriki a Manase ri keri ni lili tala e huriki a Kenan ri made vona a maka tanga nga. E huriki a Kenan ri tababana ni made vonga. 13 Pali na tahuna e huriki a Israel ri kinigao hateka, ri rata e huriki a Kenan ri leho manga a vorakato, pali i uka ma ri lili tala lobo ria.

14 Muri e huriki a hamone Iosep ri vano ri takia e Iosua, “I navai o habia ne mia a tabekena malala i taku kunana? Ra malala iea i uka ma i kara mia, a vuhuna e BAKOVI DAGI i rata kamumu mia, mi bele kupo.”

15 Lakea e Iosua i koli i ta maea, “A malala ne Epraim na lolo i uka ma i kara mua, mu lakea na kururobo ne huriki a Peres a Repaim, mu tolo puru a hini mu made vona.”

16 Lakea e huriki a hamone Iosep ri ta maea, “A tabekena lolo i uka ma i kara mia, pali mia bara mi ngaru ni bolena a bila, i uka ma mi kara, a vuhuna re huriki a Kenan ri made na tanga e Bet-San na maka tanga tabukoi vona, na maloku na tanga e Iesril, ri tahoka a maka karis na vabinga ni rata na aen.”

17 Lakea e Iosua i taki e huriki a hamone Epraim e Manase, “Muholi hateka, mu ala kupo mu gao hateka. A tabekena malala i taku i uka ma i kara mua. Ge mavonga, mu bole tabu ranga tabekena malala. 18 Ngane bara mu bole tabu a maka malala na kupona. Muholi ngi a kururobo, bara mu tolo lava mu bole, ge ne mua liu. E huriki a Kenan na tabeke iea ri gao ri tahoka a maka karis ni rata na aen, pali bara mu lili tala ria.

Copyright information for `BNP