Joshua 6

A Tanga Dagi e Ieriko i Mapuka

E huriki a Ieriko ri longo e huriki a Israel ri valai tabukoi, lakea ri hebi torea a nihebi na nure dagi, nahea a viri tara ge laho virivarola vona a hini ngi.

Pali e BAKOVI DAGI i takia e Iosua i ta maea, “O longo kamumu! Ga habia vomu e Ieriko turana a hariki vona, e huriki a nugumaheto vona. Ioe turane huriki a nugumaheto vomu mu laho haluia a tanga balaka taku na parava ge taku. Mu rata mavonga na parava ge polotara. A prister ala polorua ri gi laho muga na Tava na Ngava Dagi ri gi bole a maka tavure ni rata na pelengana sipsip. Na poloruana parava ioe turane huriki a nugumaheto mu laho halui a tanga balaka polorua. E huriki a prister ri gi vaki a tavure. Muri e huriki a prister ri gi vaki lalu a maka nangina tavure, mu magulu rike taku, ge mapuka a nure na tanga, mu dili kunana.”

Lakea e Iosua e tune Nun i gale valai vona e huriki a prister i taki ria, i ta maea, “Mu kalohoa a Tava na Ngava Dagi ne BAKOVI DAGI. A prister ala polorua ri gi bole a tavure, ri gi muga na tava.” Muri e Iosua i taki e huriki a bakovi a ngatavine, “Mu vano ngane. Mu laho haluia a tanga, e huriki a nugumaheto ri gi laho muga na tava.

Ri rata manga a hini e Iosua i taki. A prister ala polorua ri laho na matene BAKOVI DAGI, ri muga na Tava na Ngava Dagi ri vaki a tavure. I ranga nugumaheto ri laho muga ne huriki a prister ri vaki a tavure, i ranga nugumaheto ri laho muri na Tava na Ngava Dagi. Na tahuna ri lalaho e huriki a prister ri vaki mavonga a tavure. 10 Pali e Iosua i taki ria nahea ri gi magulu o ri gi ta viliha ge harena na tahuna ge rudu vakuku ria. 11 Lakea i rudu e huriki a prister turana a Tava ne BAKOVI DAGI ri laho haluia a tanga dagi balaka taku. Muri ri hamule, ri made na mada vona a rodo iea.

12 E Iosua i hadongo na hatelanga pokopoko, e huriki a prister ri kaloho tabua a Tava ne BAKOVI DAGI, ri vano turana. 13 Ra prister ala polorua nga ri bole a maka tavure ri laho muga na Tava ne BAKOVI DAGI ri vaki. I ranga nugumaheto ri laho muga ne ria. I ranga nugumaheto ri laho muri na Tava ne BAKOVI DAGI. Na tahuna ri lalaho e huriki a prister ri vaki mavonga a tavure. 14 Na ruana parava ri rata mavonga tabu, muri ri hamule tabu na mada. Ri rata maea kunana na parava i polotara.

15 Na poloruana parava na hatelanga pokopoko ri hadongo, ri laho haluia a tanga dagi i manga a hini muga. Pali na parava iea ri laho halui balaka polorua a tanga dagi. 16 Na tahuna ri laho halui a tanga dagi balaka polorua, e huriki a prister ri vaki a maka tavure, lakea e Iosua i taki e huriki, i ta maea, “Mu magulu rike, e BAKOVI DAGI i habia ne hita pali a tanga dagi iea. 17 Si gi ratapilea a tanga dagi iea turana a maka maki lobo ri tabuli vona, ge ne vona e BAKOVI DAGI. Ra ngoi iea, e Rahap kunana, turana a kabu vona pololilo na ruma vona, naha ni rabalaki, a vuhuna i ruhulolo a kasisi si rudu valai ru gu kasisia a tanga dagi. 18 Naha ni bolena tara maki na tanga dagi. Ra maki nga ne vona e BAKOVI DAGI. A viri bara i bolea tara maki, bara i bole dili a maregoa a vuranga na mada ne hita a Israel. 19 A maki lobo ni rata na silva, na gol, na bras, na aen ni tabari pali ne BAKOVI DAGI. Mu bole valai na Tava vona.”

20  a Lakea e huriki ri magulu, e huriki a prister ri vaki a maka tavure. Na tahuna e huriki ri longo a nangina tavure, ria lobo ri magulu rike taku, i mapuka a nure dagi. Muri ri dili ri bolea a tanga dagi. 21 Ri rabalaki lobo e huriki a tahotanga na bainat. Ri rabalaki lobo e huriki a bakovi, a ngatavine, a koma, a gare, a maka bulmakau, a sipsip, a donki.

22 Lakea e Iosua i taki ra bakovi ru valai muga ru kasisi a tanga dagi, i ta maea, “Muru dili na ruma na ngoi, muru tuli vilia turana a kabu vona, ge manga a nita muru ta muholi vona.” 23 Lakea ru dili, ru tuli pori vilia e Rahap turana e tamana, e kinana, e huriki e kurabana, e huriki a vora vona. Ru bole ria ri vakamade tabukoi na mada ne huriki a Israel.

24 Muri ri rungania a tanga dagi turana a maki lobo ri tabuli pololilo vona. Pali e huriki a Israel ri bole a maka maki kamumu na tanga dagi, ri ru na tava na roho ne BAKOVI DAGI. 25  b E Iosua i uka ma i rabalakia e Rahap turana a kabu vona, a vuhuna e Rahap i ruhulolo a kasisi nga na tahuna ru dili o Ieriko ru matai panahoa. Re huriki a hamone Rahap ri made turane huriki a Israel i valai i harena mona.
(6:25)Ra ngava ‘i valai i harena mona’, i uka ma i taki a tahuna ne hita mona. I uka. I taki a tahuna na bakovi i herea ra buk iea.


26  d Lakea e Iosua i habi tora a ngava ne huriki, i ta maea, “A bakovi tara ge rata tabua a tanga dagi e Ieriko, e BAKOVI DAGI bara i habi a vuranga vona:

Na tahuna i tubu ni rata a leho na tanga dagi iea,
e tuna bakovi a tabua bara i mate.
Na tahuna i rata a maka nihebi dagi na tanga dagi
e tuna a kabina ruru bara i mate.”
27 I mavonga e BAKOVI DAGI i laho turane Iosua, e huriki lobo na robo iea ri bibi rikea a rana.

Copyright information for `BNP