Leviticus 11

A Maki Kaba, a Maki Muto

E BAKOVI DAGI i taki e Moses e Aron, ru gu taki e huriki a Israel ru gu ta maea, “A maki mahuri ri laho na malala, mu gu kani, ra nga: a sipsip, a bulmakau a tagulana vahana ria i bako, ri ngau a varili manga a bulmakau.

“Pali naha ni kani a kanirau manga a kamel, a gola,
(11:4-6)A gola i manga a murongi, i dupi na kedo.
a murongi talinga ola, a vuhuna ri ngau a varili manga a bulmakau, pali i uka ma i bako a tagulana vahane ria. Ri muto ni kani.
Naha ni kani a boro, a vuhuna a tagulana vahana i bako, pali i uka ma i ngau a varili. I muto ni kani. Naha ni kani ra maka kania nga, naha ni nugu na tahuna ri mate, a vuhuna ri muto.
(11:8)Ranga kanirau, i uka ma ni matai na tabeke ne Bola. I ranga rana kanirau nga, na nita Hibru i uka ma ni lohoka vona.


“A maki na naru, na dari bara mu kani, ra nga: a maka manu ri tahoka a honane ria a pelengane ria. 10 Pali a kabuna maki mahuri na naru, na dari, i uka honane ria, i uka pelengane ria, naha ni kani. Mu pile. 11 A maka maki nga mu pile, lakea naha ni kani ria, naha ni nugu ria na tahuna ri mate. 12 Mu longo kamumu, naha ni kani a manu i uka pelengane ria, a honane ria. Mu pile.

13 “Naha ni kani a kadirovo nga, a vuhuna ri muto. Mu pile: a loha, a kinikinimanu, pangopango-kaba, 14 a luama vokuvoku, a luama katokato, a maka luama viliha, 15 a maka kokoa viliha, 16 a kadirovo i manga a mengo, a haloho, a nae, a maka loha viliha, 17 a kuku kiroko, a kadirovo i manga a pato ni gale a komaran, a kuku dagi, 18 a maka kuku viliha, a kadirovo i manga a kongo, 19 a kadirovo ni gale a stork, a maka luhou viliha, a kadirovo ni gale a hupoe, a kopa.
(11:19)Ranga kadirovo, i uka ma ni matai na tabeke ne Bola. I ranga rana kadirovo nga, na nita Hibru i uka ma ni lohoka vona.


20 “Naha ni kani a maki ri tahoka a karapane ria, ri laho na vahane ria i va. Mu pile. 21 Pali mu kani a maki ri tahoka a karapane ria, ri laho na vahane ria i va, ri page viliha na malala. 22 I mavonga mu kani a maka koa lobo. 23 Pali a maki ri tahoka a karapane ria, ri tahoka a vahane ria i va, mu pile.

24 “Naha ni padoi a maki nga. A viri i padoia tara maki i mate, bara i muto i harena na malunga liu. 25 A viri i bole rikea tara maki i mate, ra bakovi iea i muto, ge loi pasi a varakia vona, pali bara i muto mavonga i harena na malunga liu.

26 “A maka kanirau a tagulana vahane ria i uka ma i bako hateka, o i uka ma ri ngau a varili, ri muto. A viri i padoi a kanirau nga, bara i muto. 27 A maka kanirau ri laho na vahane ria i va, i kabelabela a vahane ria, ri muto. Naha ni padoia tara ge mate. A viri i padoi a podana kanirau i mate, bara i muto mavonga i harena na malunga liu. 28 A bakovi i bole rikea a kanirau i mate, ge vahiloloa a varakia vona, pali ia bara i muto mavonga i harena na malunga liu, a vuhuna ra maki nga ri muto.

29 “Na maka kanirau ri laho lae na malala ri muto: a murongi, a kuruve, a kapore, a karapoda-dole, a tabelebako, a miho. 31 Ra maki nga ri laho viliha na malala, ri muto. Naha ni padoi na tahuna ri mate. Mua bara mu rata mavonga, bara mu muto i harena na malunga liu. 32 Na tahuna a maki nga ri mate ri boru langa na maki tara, ra maki iea i muto. A podana ge boru langa na maki ni rata na kai, na kala, na kulina bulmakau, na beke, ra maki lobo nga ri muto. Mu bole mu loi na naru, pali bara ri muto mavonga i harena na malunga liu. 33 Bara maki tara i mate i boru dili na ulo, a maka maki i tabuli pololilo ri muto. Mu bolea a ulo mu ubipodea. 34 A maki ni kani i tabuli pololilo vona, i muto. A naru i tabuli pololilo vona, ia tara i muto. 35 Bara podana maki mate i boru langa na stov, na oven ni rata na taka, ra maki nga ru muto, mu ubipoda. 36 Pali bara a maki mate i boru langa na naru i tua, o na lomu, a naru i uka ma ge muto. Pali a maki i padoi a maki nga i mate, bara i muto. 37 A maki i mate i boru langa na vutuna maki ni varo, a vutuna maki i kamumu kunana, i uka ma ri muto. 38 Pali a vutuna maki i tabuli na naru, lakea a maki i mate i boru langa ne ria, ra vutuna maki nga ri muto.

39 “A kanirau tara ra i kara ni gi kani, i mate, a viri i padoia bara i muto i harena na malunga liu. 40 A viri i kania a balena kanirau iea o i nugua, ge vahilolo a maka varakia vona. Pali ia bara i muto mavonga i harena na malunga liu.

41 “Naha ni kani a maki kiroko ri karaka o ri laho tabukoi viliha na malala, a maki i kupo a vahana. 43 Naha ni kani a maki nga. Bara mu kani, mu muto. 44  d Iau e BAKOVI DAGI, a Vure ne mua. Mu habi mua nau, bara mu kiripiripi, a vuhuna iau a kiripiripi. Naha ni kani a maka kuruve, a maki kiroko ranga ri karaka viliha na malala, ma mu gu muto. 45 Iau e BAKOVI DAGI, a bole tala mua o Egipto a taparaki valai mua koea, ge iau a Vure ne mua. Mu ramai a naro ge kiripiripi, a vuhuna iau a kiripiripi.

46 “Mu bolea pali ra vinara iea. I taki a maka kanirau, a maka kadirovo, a maka manu, a maka maki kiroko ri karaka ri laho na malala. 47 Mu pelekado kamumu a maki matapado, a maki muto, a maki mahuri mu gu kani, a maki mahuri i uka ma mu gu kani.”

Copyright information for `BNP