Leviticus 12

A Naro ni Vakamatapado a Ngatavine

E BAKOVI DAGI i takia e Moses i ta maea, “O taki e huriki a Israel, na tahuna a ngatavine i singou, i poda a koma bakovi, a ngatavine bara i muto na parava i polorua, i manga a hini i matai a keva. a Na polotoluna parava ni gi pala a kulina koma bakovi. Muri a ngatavine ge made tabu na ruma na parava ge ravulu tolu a polona i tolu (33), a vuhuna a darana i tua tala na tahuna i poda a koma. Nahea ge nugua tara maki ni gamai, o ge lakea na mailo na Vure, a vuhuna i muto. Ra ngatavine iea bara i muto mavonga ge harena na tahuna ni vakamatapado. Pali na tahuna a ngatavine ge poda a koma ngatavine, a ngatavine bara i muto na parava i ravulu a polona i va, i manga na tahuna i matai a keva. A ngatavine ge made tabu na ruma na parava ge ravulu polotara a polona i polotara (66), muri ge matapado, a vuhuna a darana i tua tala na tahuna i poda a koma vona.

“Na tahuna a maka parava ni vaka­matapado i lobo, a ngatavine ge habi na prister na matana Kape na Vaponga tara tuna sipsip, a pida vona i taku, ge a nihabi ni gutu-vuro. Ge habi tabua a balu, ge a nihabi na naro hale. A prister ge bole a sipsip, a balu na ngatavine, ge habi ne BAKOVI DAGI, ge kavitagua a ngatavine. Ngane bara i matapado, a darana i uka ma ge rata tabu ia ge muto. A ngatavine i poda a koma bakovi o a koma ngatavine, ge ramaia a vinara iea. b Pali a ngatavine iea ge uka a moni ni kona a tuna sipsip, ge bole valai a balu ge rua. A balu tara ne vona a nihabi gutu-vuro. A balu tara ne vona a nihabi na naro hale. A prister ge habi ne BAKOVI DAGI a balu nga i rua, ge kavitagua a ngatavine. Muri a ngatavine bara i matapado na matane BAKOVI DAGI.”

Copyright information for `BNP