Leviticus 15

A Maki i Muto na Kakaina Viri

E BAKOVI DAGI i taki e Moses e Aron, i ta maea, “O taki e huriki a Israel, a bakovi i tahoka a kume i pagitala na kapuna, ra kume iea i rata ia i muto. Na tahuna kume i pagitala turana a miha, o i gatuka i roga mule a dalana miha, ra bakovi iea i muto. A kiri vona i muto, a maki lobo i made vona, ngi ranga i muto.

“E rei a viri i nugu a kiri vona o i made na hini i made muga vona, ge loi pasi a maka varakia vona, ge hilolo ia, pali bara i muto mavonga i harena na malunga liu.

“A viri i padoi a bakovi i tahoka a gilanga iea, bara i muto i harena na malunga liu. Muri ge loi pasi a kala vona, ge hilolo ia.

“A bakovi i tahoka a gilanga iea i kalupe tahoa tara viri, ra viri i kalupe tahoa i muto, bara i muto i harena na malunga liu. Muri ge loi pasi a varakia vona, ge hilolo ia.

“A bakovi i tahoka a gilanga iea i made na sarel
(15:9)A sarel a maki ni made vona ngane na hos, a vilvil. Huriki hosi ri made langa na sarel na karis, a sarel na hos.
na hos, ra sarel iea i muto.
10 A viri i padoi a sarel vona, bara i muto i harena na malunga liu. A viri i kaloho a sarel na bakovi i giloa, ra bakovi i kaloho a sarel i muto bara i harena na malunga liu. Muri ge hilolo, ge loi a varakia vona, bara i matapado.

11 “Ra bakovi i tahoka a gilanga i uka ma i loi pasi a limana lakea i padoia a tara viri, ra viri i padoia bara i muto i harena na malunga liu. Muri ge loi pasi a varakia vona, ge hilolo ia.

12 “Ia bara i padoi a ulo, ra ulo i padoia ni gi ubipoda. Pali ia ge padoi a tavila, ra tavila iea ni gi loi pasi.

13 “Na tahuna a bakovi i lobo a gilanga vona, ra bakovi iea ge dava na parava ge polorua tabu, muga ne ia ge matapado. Ge lobo a parava i polorua, ge loi pasi a varakia vona, ge hilolo ia, bara i matapado. 14 Na polotoluna parava ge bole a balu ge rua, ge lakea na Kape na Vaponga ge habi na prister. 15 A prister iea ge bole a balu nga, ge rata a leho vona. A balu muga ge a nihabi na naro hale, a balu tara ge a nihabi gutu-vuro. Na naro iea kunana a prister ge kavitagua na matane BAKOVI DAGI a bakovi i lobo a gilanga vona.

16 “A bakovi tara i mahita i maguru tavula a kuvena, ra bakovi iea i muto, bara i muto i harena na malunga liu. Muri ge vahilolo loboa a kakaina, bara i matapado. 17 A kuvena ge maguru taho a kala vona, o a maki ni rata na kulina bulmakau, ra maki nga ri muto, bara i muto i harena na malunga liu. Muri ge bole ge vahilolo. 18 A bakovi i mahita turana a ngatavine, ra bakovi a ngatavine nga ru muto, bara ru muto i harena na malunga liu, muri bara ru hilolo, ru matapado.

19 “A ngatavine i matai a keva, bara i muto mavonga na parava i polorua. A viri i padoia bara i muto i harena na malunga liu. 20 A maki lobo i mahita vona i made vona, ri muto. 21 E rei a viri i padoi a kiri o a maki i made vona, bara i muto i harena na malunga liu. Muri ge vahilolo a varakia vona ge hilolo, ge matapado. 23 A ra maki a ngatavine i made vona, a moke o a maki tara, e rei a viri i padoia bara i muto, i harena na malunga liu. 24 A bakovi i mahita turana a ngatavine i matai a keva, ra bakovi iea i muto, bara i harena na parava ge polorua. Ra kiri i mahita vona bakovi i muto.

25 “A ngatavine i pori vona a dara na parava ranga na tahuna i uka ma i matai a keva, o na tahuna i tua mavonga a darana na tahuna i matai a keva, bara i muto ge harena na dara i lobo ni tua tala vona, i manga a hini i matai a keva. 26 A kiri i mahita vona, a hini i made vona, ngi ranga i muto. 27 A viri i padoi a maki nga, bara i muto i harena na malunga liu. Muri ge loi a kala vona, ge hilolo ia.

28 “Muri na dara i lobo ni tua, ge dava na parava ge polorua, muri bara i matapado. 29 Na polotoluna parava ge bole a balu ge rua, ge bole lakea na matana Kape na Vaponga, ge habi na prister. 30 A prister ge habia tara ne vona a nihabi na naro hale, i tara ne vona a nihabi gutu-vuro. Na naro iea a prister bara i kavitagua a ngatavine na matane BAKOVI DAGI, a vuhuna i muto na hini i pori vona a dara.

31 “Muru habi tora a ngava ne huriki a Israel, ri gi matakari kamumu ria na tahuna ri muto na matagu. A mailogu i tabuli na kurukurune ria. Na tahuna ri muto nahea ri gi dili vona, ma ri gi mate, a vuhuna ri vakamutoa a mailogu.”

32 Ra vinara nga, ne vona a bakovi i rali tala a kume na kakaina, a kuve i maguru tala tavula na kapuna, i rata ia i muto. 33 I taki tabu, a ngatavine na tahuna i matai a keva, a kume i rali tala na muduna bakovi, o a ngatavine i pori vona a dara, a bakovi i mahita turana a ngatavine i muto.

Copyright information for `BNP