Leviticus 16

A Parava ni Kavitagu a Naro Hale

Hosi e tune Aron bakovi ala rua ru habi a nihabi ne BAKOVI DAGI, pali e BAKOVI DAGI i uka ma i taki rua ru gu habi a nihabi, lakea i rabalaki rua. a Muri e BAKOVI DAGI i takia e Moses, “O takia e turamu e Aron, nahea ge dili na ningaru vona na Tabeke Nitaba Hateka na bitona kala dagi. Pali na tahuna i ngaru e rei a kilala ge dili vona, ge dili. A vuhuna iau a made pololilo na bubu, a bele kavakava na murina nidodo na Tava na Ngava Dagi. Ia ge dili tavula na tabeke iea, bara i mate.

b “Na tahuna e Aron ge dili na Tabeke Nitaba Hateka, muga ge bolea tara bulmakau karaba a toga, ge rata a nihabi na naro hale, a sipsip a toga tara ge bolea, ge a nihabi ni gutu-vuro. Na tahuna e Aron ge dili na Tabeke Nitaba Hateka, ge hilolo, ge rodo a maka nirodo keakea na prister: a poho, a nirodo ola ola, a palabele, a hoi. E huriki a Israel ri gi bole a meme a toga ge rua ne vona ni rata a nihabi na naro hale, a sipsip a toga tara ne vona a nihabi gutu-vuro, ri gi habi ne Aron.

“E Aron ge habia a nihabi na bulmakau, ne vona ni puga vuroki a naro hale vona, ne vona ni kavitagu ia turane huriki a kabu vona. Muri ge bole lakea ne BAKOVI DAGI na matana Kape na Vaponga a meme nga i rua. E Aron ge bole a kedo ge rua i tahoka a ngava. Ne vona e BAKOVI DAGI tara, ne vona e Asasel
(16:8)A pelegona ngava e ‘Asasel’ na nita Hibru i uka ma ni lohoka vona: ranga ni luhoi ta a rana hanitu na tabeke i ngeki, ranga ni luhoi ta a rana a tabeke na taua na malala golea. O masia Levi 16:26.
tara. Ge ruhulolo a kedo nga, ge bole tala takutaku ge kurahi iau vona tara, ge kurahi e Asasel vona tara.
E Aron ge bolea ra meme i kurahi e BAKOVI DAGI vona, ge habia, ge a nihabi na naro hale ne huriki. 10 Pali a meme i kurahi e Asasel vona, nahea ge rabalakia. Ni gi bole mahuri lakea na matane BAKOVI DAGI, ni gi vakakaloho vona a maka naro hale ne huriki, ge kaloho lakea ne Asasel na tabeke i ngeki.

11 “E Aron ge bole valai a nihabi ni puga vuroki a naro hale, ge ramaia ra naro iea, ge kavitagu ia turane huriki na kabu vona. Muri ge rabalakia a bulmakau a toga, ge a nihabi na naro hale vona. 12 Muri ge bole lakea na dede a ulo kiroko ni rata na aen, ge ru dili a katona kanono vona, ge bole lakea na matane BAKOVI DAGI na Tabeke Nitaba Hateka. Ge ragamu na limana balaka rua a havu mangisipa, ge guru dili na ulo i vona a katona kanono. A pokona a ulo bara i kavitagua a murina nidodo na Tava na Ngava Dagi. E Aron nahea ge masia a hini nga, ma ge mate. 14 Ge bole ranga darana bulmakau iea ge lutua a kukulimana, ge voro tamali langa na murina nidodo na Tava na Ngava Dagi, na tabeke na nirikena haro. Muri ge bole tabu na kukulimana, ge voro tamali balaka polorua na ngalana murina nidodo.

15  d “Muri ge rabalakia ra meme ni habi na naro hale ne huriki. Ge bole dilia na Tabeke Nitaba Hateka a darana, ge voro tamali langa na murina nidodo na Tava na Ngava Dagi, na hini muga na murina nidodo, i manga a hini i rata pali na darana bulmakau. 16 Na naro iea kunana i kavitagu a naro hale ne huriki a Israel, i ratea a Tabeke Nitaba Hateka i matapado, a vuhuna ri tagege, ri longotaro a nitane BAKOVI DAGI, ri rata a naro hale, lakea i muto ra hini nga. A Kape na Vaponga i pesi na kurukurune ria, pali a naro hale ne ria i rata a maki na kape ri muto. E Aron ge bole a dara popote ge voro langa na kape, ge matapado tabu, i manga a naro i rata na Tabeke Nitaba Hateka. 17 E Aron ge ratea a nihabi iea ne vona ni kavitagu ia, e huriki a kabu vona, turana e huriki a Israel. Na tahuna i dili na Tabeke Nitaba Hateka nahea tara viri ge dili na Kape na Vaponga, ge harena na tahuna e Aron i pagitala.

18 “Muri ge pagitala, ge lakea na dede ra i tabuli na matane BAKOVI DAGI, ge rata a leho ni kavitagua. Ge bole a darana bulmakau, a meme, ge ru na tupina dede. 19 Muri ge lutua a kukulimana tara na dara, ge voro tamali balaka polorua langa na dede. Na naro iea kunana i ratea a dede nitaba, i matapado na naroanga ne huriki a Israel.

20 “Muri ne Aron ge kavitagu loboa a Tabeke Nitaba Hateka, a Kape na Vaponga, a dede na nihabi ni gutu-vuro, ge bole lakea na matana kape a meme mahuri. 21 Muri ge ru langa varago na gina meme mahuri a limana, ge taki tala a maka vilo hale, a maka tagenga, a naro hale lobo ne huriki a Israel. Na naro iea kunana, i ru langa na gina meme a maka naro hale ne ria. Muri ge habia na bakovi ni vulaki pali, ge turaria lakea na tabeke i ngeki a meme, ge taparakia vonga. 22 Ra meme iea ge kaloho a naro hale lobo ne huriki a Israel. A viri i turaria, ge taparakia na tabeke i ngeki.

23  e “Muri na leho iea ge lobo, e Aron ge dili na Kape na Vaponga, ge kali tala vonga a maka nirodo i rodo na tahuna i dili na Tabeke Nitaba Hateka, ge taparaki vonga. 24 Ge vano ge hilolo na naru pololilo na nure i pesi halui a kape. Muri ge dili tabu na kape, ge rodo ge bagetu na maka bagetua na prister dagi. Na tahuna i pagitala ge rata a nihabi gutu-vuro ge rua, i tara ne vona, i tara ne huriki, ne vona ni kavitagu ia, ni kavitagu e huriki. 25 Ge gutu langa na dede a vina sipsip, a bulmakau nevona a nihabi na naro hale ne huriki.

26 “Ra bakovi i taparakia a meme i lakea ne Asasel, ge kali tala a maka varakia vona, ge hilolo, ge dili tabu na mada. 27  f Ri gi bole tala na mada a bulmakau, a meme, ra muga ni bole lakea na Tabeke Nitaba Hateka a darane rua ne vona a nihabi na naro hale. Ni gi gutu a kuline rua, a bobone rua, a tahene rua, ri gi vuro lobo liu. 28 Ra bakovi i gutu-vuro a sipsip, a bulmakau nga, ge vano ge vahilolo a nirodo vona, ge hilolo ia, muri ge dili tabu na mada.”

A Parava ni Kavitagu a Naro Hale

29  g E BAKOVI DAGI i ta tabu, “Mu ramai vakaroroa a vinara iea. Na ravuluna parava, na poloruana keva, mua a Israel turane huriki a mosi ri made ne mua, mu peremu na kinani, naha ni raulo, naha ni leho, mu malo kunana. 30 A vuhuna na parava iea kunana a prister ge rata a nihabi ne vona ni kavitagu mua, bara mu matapado na matane BAKOVI DAGI. 31 Ra parava dagi iea, a Parava Nimalo. Mu malele ha na maki nivivi, mu malo kunana. Ra vinara iea mu ramai vakaroroa. 32 E rei a prister ni gamai ge bole a murine tamana, ge ia a prister dagi, ia kunana ge ratea a leho ge kavitagu e huriki, ge rodoa a nirodo keakea na prister. 33 Muri ge rata a nihabi ni kavitagu, ge matapado a Tabeke Nitaba Hateka, a Kape na Vaponga, a dede, e huriki a prister, e huriki a Israel lobo.

34 “Ra vinara iea mu ramai vakaroroa. A vinara iea ni kavitagu a naro hale, ni gi rata balaka taku na maka pida lobo, ne vona a naro hale ne huriki a Israel.”

E Moses i rata lobo a maki e BAKOVI DAGI i vakuku ia vona ge rata.

Copyright information for `BNP