Leviticus 17

Naha Ni Kani a Maki Vona Dara

E BAKOVI DAGI i takia e Moses, “O taki e Aron turana e tuna mai, e huriki lobo a Israel vona a maka vinara nga e BAKOVI DAGI i vakuku ria vona: Na tahuna a bakovi tara i habi a bulmakau, a tuna sipsip, a meme pololilo o polovavo na mada, pali i uka ma i bole vilia na matana Kape na Vaponga, ge habia manga a nihabi ne BAKOVI DAGI na matana mailo vona, i putu puru a vinara, i vakatua a dara, i tahoka a ngava. Ni gi tono tala na kabu vona. Ra vinara iea i ta pupukari ne huriki a Israel nahea ri gi rabalaki a sipsip, a bulmakau, ri gi rata a nihabi polovavo na mada. Ri gi bole a sipsip, a bulmakau ri gi lakea na matana Kape na Vaponga, ri gi rata a nihabi na nivalemu turane BAKOVI DAGI. Muri a prister ge bolea a darana sipsip, a bulmakau, ge voro tamali na gagana dede tabukoi na matana kape, ge gutu na dede a vina sipsip, a bulmakau. Na tahuna e BAKOVI DAGI i burongi a mangina bara i vivi. Pali nahea ri gi habi tabu a nihabi na meme taua. Na tahuna ri rata mavonga, ri manga a ngoi, ri mata here ne BAKOVI DAGI ri kavurike viliha a vure ranga. Ra maka vinara nga ge tabuli tora turane ria, e huriki a hamone ria bara ri ramai vakaroro muri ma.

“O taki ria e rei tara ne ria, o a mosi tara i made turane ria, i ngaru ni habi a nihabi ni gutu-vuro, pali i uka ma i taparaki lakea na matana Kape na Vaponga ni gi habi ne BAKOVI DAGI, bara ni tono tala na kabu vona.

10  a “E rei tara ne ria na kabu ne Israel o a mosi tara i made turane ria, i rabalakia a kanirau, i ninu o i kani a darana, bara iau a pile vona, ni gi lili tala na kabu vona. 11  b A dara i habi a nimahuri ne huriki a bakovi, a kanirau, i mavonga a taki maea mua. A prister ge guru na dede a darana kanirau, ne vona ni kavitagu a nimahuri vona, a vuhuna a dara kunana a maki ge kavitagu e huriki ri gi mahuri. 12 I mavonga e BAKOVI DAGI i taki e huriki a Israel, nahea tara ne ria, o a mosi tara i made turane ria, ge kani a bobona maki i vona a dara.

13 “Na tahuna a Israel tara o a mosi tara i pango, i lakavua tara kanirau, o a kadirovo i kara ni kanina, ge guru tala na malala a darana, ge kavitagua na malala, 14 a vuhuna a nimahuri ne huriki lobo, a nimahuri na maka kanirau i tabuli na dara. Na naro iea kunana, e huriki a Israel nahea ri gi kani a bobona kanirau i vona a dara. A viri i kani a bobona sipsip, a bulmakau i vona a dara bara ni tonotala na kabu vona. 15 Na tahuna a tahotanga o a mosi i kani a maki i mate, o i lakavua a kanirau hateka, ra bakovi iea i muto, bara i harena na malunga liu. Muri ge loi a maka varakia vona ge hilolo ia, bara i matapado. 16 Ia i uka ma ge loi na naru a varakia vona, i uka ma ge hilolo, bara i tahoka a ngava.”

Copyright information for `BNP