Leviticus 4

A Nihabi na Naro Hale

E BAKOVI DAGI i takia e Moses, “O taki e huriki a Israel e rei a viri i rata ruru a naro hale, i putu puru a maka vinara ne BAKOVI DAGI, ge ramai a naro nga:

“Na tahuna a prister dagi i rata a naro hale i habi a rarenga ne huriki, ge bolea tara bulmakau karaba, a toga ge gavutuvutu, ge habia ne BAKOVI DAGI ne vona a nihabi na naro hale vona. A prister ge bolea a bulmakau iea ge lakea na matana Kape na Vaponga na matane BAKOVI DAGI, ge ru langa a limana na gina bulmakau. Muri ge rabalakia na matane BAKOVI DAGI. A prister ni gamai ge bole ranga darana bulmakau iea, ge bole dili na Kape na Vaponga. Muri a prister ge lutua na dara a kukulimana, ge voro tamali balaka polorua na matane BAKOVI DAGI tabukoi na kala dagi i naviri mule a Tabeke Nitaba Hateka. Muri a prister ge lakea na dede na havu mangisipa i pesi na matane BAKOVI DAGI pololilo na Kape na Vaponga, ge ru na maka tupi na dede ranga dara. A darana bulmakau a toga i tababana, ge bole tala na matana Kape na Vaponga, ge guru na taruna dede na nihabi gutu-vuro. Muri ge bole tala na nihabi na naro hale a vina, ra vina i kavitagu a mahalana, a vina pololilo na mahalana, turana a vuanalipi i rua turana a vina i rako taho rua, a kinake tara ni riri tala turana a vuanalipi. 10 A prister ge gutu a mahalana nga, ge gutu na dede na nihabi gutu-vuro. Ge rata manga a vina bulmakau ni rata na nihabi na nivalemu. 11 Pali ge bole a kulina, a bobona, a gina, a maka vahana, a maka mahalana, a tahena, 12 a maka tabekena i tababana, ge bole tala na mada na hini i matapado ni guru a habulo vona, ge gutu na kanono vonga polomeli na mola.

13 “Na tahuna e huriki a Israel ri rata ruru a naro hale, ri putu puru a vinara ne BAKOVI DAGI, pali ria i uka ma ri lohoka vona, ra naro ri ratea ri tahoka a ngava vona. 14 Muri na tahuna ri matakilaka vona a naro hale ne ria, ri gi bole lakea na matana Kape na Vaponga tara bulmakau karaba a toga, ge a nihabi na naro hale ne ria. 15 Na matane BAKOVI DAGI, e huriki a gare na vaponga ri gi ru langa a limane ria na gina bulmakau, muri ri gi rabalakia na matane BAKOVI DAGI. 16 Muri a prister ni gamai ge bole dili na Kape na Vaponga ranga darana, 17 ge lutua na dara a kukulimana, ge voro tamali balaka polorua na matane BAKOVI DAGI tabukoi na kala dagi i naviri mule a Tabeke Nitaba Hateka. 18 Ge lakea na dede i pesi na matane BAKOVI DAGI pololilo na Kape na Vaponga, ge ravu na maka tupina dede ranga dara. A darana bulmakau a toga i tababana, ge bole paru, ge guru na taruna dede na nihabi gutu-vuro na matana Kape na Vaponga. 19 Muri ge bole a vina lobo, ge gutu na dede, 20 ge rata manga a naro i ratea na nihabi na naro hale vona. I mavonga kunana a prister ge rata a nihabi ge kavitagu ria, lakea bara ni puga vuroki a naro hale ne ria. 21 Muri ge bole talea a bulmakau a toga iea na mada, ge gutua na kanono, i manga a hini i gutu muga a bulmakau na naro hale vona. Ra bulmakau e huriki a Israel ri habia, a nihabi na naro hale ne ria.

22 “Na tahuna a matakari tara i rata ruru a naro hale, i putu puru a vinara ne BAKOVI DAGI, a Vure vona, ra naro i ratea, i tahoka a ngava vona. 23 Muri ge matakilaka vona a naro hale i ratea, ge bolea tara meme a toga ge gavutuvutu, ge a nihabi. 24 Na matane BAKOVI DAGI ge ru langa a limana na gina meme, muri ge rabalakia na hini ni rabalaki a maka kanirau ne vona a nihabi gutu-vuro. Iea a nihabi na naro hale. 25 Muri a prister ge lutua na darana meme iea a kukulimana, ra nihabi na naro hale, ge ravu na maka tupina dede na nihabi gutu-vuro. Muri ge bole paru a dara i tababana, ge guru na taruna dede. 26 Muri ge gutu a vina meme iea na dede, ge manga a naro i ratea na nihabi na nivalemu. I mavonga kunana a prister ge rata a nihabi ne vona ni kavitagu a matakari iea, a naro hale vona ni gi puga vuroki.

27  a “Na tahuna a bakovi tavula tara i rata ruru a naro hale, i putu puru a vinara ne BAKOVI DAGI, ra naro i ratea, i tahoka a ngava vona. 28 Na tahuna i matakilaka vona a naro hale i ratea, ge bole vilia tara meme a kinana ge gavutuvutu, ge a nihabi na naro hale vona. 29 Ge ru langea a limana na gina meme iea, ra nihabi na naro hale, muri ge rabalakia na tabeke ni gutu a nihabi gutu-vuro. 30 Muri a prister ge lutua na darana meme a kukulimana, ge ravu na maka tupina dede na nihabi gutu-vuro, ge bole paru a dara i tababana, ge guru na taruna dede. 31 Ge bole tala a vina meme lobo, ge manga a naro ni bole tala a vina na nihabi na nivalemu, ge gutu na dede. Na tahuna e BAKOVI DAGI i burongi a mangina kinani, bara i vivi. I mavonga kunana a prister ge kavitagua a bakovi iea, a naro hale vona ni gi puga vuroki.

32 “A bakovi bara i habia tara tuna sipsip ge a nihabi na naro hale, ge bolea a sipsip a kinana ge gavutuvutu. 33 Ge ru langea a limana na gina sipsip, ra nihabi na naro hale, muri ge rabalakia na hini ni rabalaki a maka kanirau ne vona a nihabi gutu-vuro. 34 Muri a prister ge lutu a kukulimana na darana sipsip, ra nihabi na naro hale, ge ravu na maka tupina dede na nihabi gutu-vuro, ge bole paru a dara i tababana, ge guru na taruna dede. 35 Ge bole tala lobo a vina tuna sipsip, ge manga a naro ni rata na nihabi na nivalemu. A prister ge gutu na dede langa na maka nihabi ni gutu na kanono ne BAKOVI DAGI. I mavonga kunana a prister ge rata a nihabi ne vona ni kavitagu a bakovi iea, a naro hale vona ni gi puga vuroki.”

Copyright information for `BNP