Luke 15

A Nivakakika na Sipsip i Velu

(Mateo 18:12-14)

Na parava tara, e huriki a bakovi ni bole a takis, e huriki a bakovi hale ri vaboletugu mai e Isu, ri gi longo a nitana. a Lakea e huriki a Pariseo, a mari na vinara ri ta barangungu, ri ta maea, “Ra bakovi iea i tagui e huriki a bakovi hale, i kani turane ria.”

Lakea e Isu i koli, i taki ria na nita vakakika iea, b “E rei a bakovi i tahoka a sipsip i 100, pali i velu tara, bara i pe puru na robo a maka sipsip i 99, i vano i matakanea a sipsip ra i velu. Bara i matakanea, matakanea, i matavisia. Na tahuna i matavisia, bara i vivi vona i vakoa, i lakea na tanga. Muri bara i gale palupu e huriki a turana, i taki ria, ‘Mu vivi turagu a vuhuna a matavisia pali a sipsip nau i velu.’ A Vure tara, na tahuna a bakovi hale i pulo a vilona, i vivi hateka. I vivi ne huriki ala 99 ri kamumu pali, ri pulo pali a vilone ria. Pali i vivi hateka na bakovi hale ala taku i pulo a vilona.”

A Nivakakika na Moni i Velu

E Isu i taki tabua tara nivakakika i ta maea, “A ngatavine tara i tahoka moni silva vona i ravulu, lakea i velu tara. A ra mu luhoia ge ratea? Bara i namia a lam, i kovo kadoa a ruma, i matakana lae, muri bara i matavisia. Na tahuna i matavisia bara i gale palupu e huriki a turana, e huriki ri made tabukoi vona, i taki ria, i ta maea, ‘Mu vivi turagu, a vuhuna a matavisia pali a moni nau i velu.’ 10 I mavonga kunana, a Vure turana e huriki a agelo bara ri vivi hateka, na tahuna ri masia a bakovi hale tara i pulo a vilona.”

A Nivakakika na Koma Bakovi i Velu

11 E Isu i ta lokovonga liu, i ta maea, “A bakovi tara i tahoka e tuna bakovi ala rua. 12 A viri kiroko i takia e tamana i ta maea, ‘O habi nau ngane a mahala nau.’ Lakea e tamane rua i vaveru rua vona mahala vona.

13 “I uka ma i tabaka, a viri kiroko i bole lobo a maki vona i vano, i havai maia a robo basi tara. I bele vona a robo iea, i vakalobo a mahala vona na naro hale. 14 I vuroki lobo a mahala vona. I bele ngane na robo iea a pago. I matasia, i vitolo mavonga. 15 Lakea i vano i bole a leho vonga na tahona malala tara. A bakovi iea i rudua ge matakari a nure na boro. 16 I vitolo hateka, i ngaru ni kani a maki ni kani na boro, pali i uka tara viri ge habi a maki ni kani vona.

17 “I bele vona ngane a niluhoi kamumu, lakea i ta maea, ‘E huriki a vora ne tata ri tahoka a maki ni kani i kupo, pali iau a mate mavonga koea na vitoloa! 18  c Ga vano ga hamule mai e tata, ga takia ga ta maea, “Iau a rata virihi a naro hale na Vure, a rata a naro hale virihi mai ioe. 19 I uka ma a bakovi kamumu go gale iau ge iau e tumu. O rata iau, ge iau a vora vomu kunana.’” 20 Lakea i pesi rike i hamule lakea ne tamana. Na tahuna i tabana ni laho basi, e tamana i masia, i dodoa. I nunu halala ia, i lakavua, i ngurua.

21 “Lakea i takia e tamana i ta maea, ‘Tata, iau a rata a naro hale virihia a Vure. A rata a naro hale virihi ioe. I uka ma a bakovi kamumu go gale iau ge iau e tumu.’

22 “Pali e tamana i taki e huriki a vora vona i ta maea, ‘Mu nunu, mu bole valai a varakia kamumu, mu vakarodoa vona. Mu bolea a paga, mu rodo dilia na kukulimana. Mu bole a vahapolo, mu vakarodoa. 23 Mu lavea a tuna bulmakau i gavutuvutu, mu rabalakia. Si gi rata habu, si gi vivi, 24  d a vuhuna re tugu iea i mate, ngane i mahuri mule. I velu, pali ngane ni matavisi.’ Lakea ri rata a habu, ri pitei.

25 “A tabua i tabana ni leho na hania. Na tahuna i hamule valai tabukoi na ruma, i longo e huriki ri kalolo, ri raulo. 26 Lakea i nanea a vora tara, i ta maea, ‘I navai, a ra ri ratea e huriki nga?’

27 “A vora i koli i ta maea, ‘E tarimu i hamule pali, lakea e tamamu i rabalakia a tuna bulmakau gavutuvutu, a vuhuna i vivi vona e tarimu i hamule valai, i made kamumu tabu koea.’

28 “Pali a tabua i madihi a hatena, i koi ni dili. Lakea e tamana i pagitala i lukea, i takia ge dili. 29 Pali i takia e tamana i ta maea, ‘Mata valai! Na pida i kupo pali a vora mavonga vomu. I uka ma a longotaroa tara nitamu. Pali o uka ma o ratea nau tara habu ga kani turana e huriki a turagu. 30 Pali re tumu iea, i vuroki tavula ne huriki a ngoi a mahala vomu. Ngane i hamule valai o rabalakia vona a tuna bulmakau gavutuvutu, o rata habu vona!’

31 “Lakea e tamana i ta maea, ‘O tugu, ioe o made turagu na parava vakaroro. A maki lobo nau, a maki vomu. 32 Pali ngane si gi rata a habu si gi vivi, a vuhuna e tarimu i mate, i mahuri mule tabu. Muga i velu, ngane ni matavisi.’”

Copyright information for `BNP