Luke 18

A Havuri i Ta Hinituhana

a Muri e Isu i taki e huriki a murimuri vona na nita vakakika tara, a vuhuna i ngaru ri gi vasileki vakaroro, ri gi hatenono. Lakea i ta maea, “Na tanga tara a mari ni pelekado i made vonga. I uka ma i mangenge na Vure, i uka ma i togo e huriki a bakovi. Na tanga iea, i tahoka a havuri i valai bala vona i nanea, ‘O tuhori iau ne huriki a pile nau.’

“I muga, a mari ni pelekado i longotaroa. Pali muri i taki mulea, i ta maea, ‘Iau i uka ma mangenge na Vure, i uka ma a togo e huriki a bakovi. Pali iau ga koria a ngatavine iea, a vuhuna i valai bala i vakapae iau! Iau i uka ma ga koria, bara i valai bala, i vakamalulu a tuhagu.’”

Lakea e Bakovi Dagi i ta maea, “Mu luhoi kamumu a naro i ratea a bakovi hale iea. I uka ma i kori malaviriri a havuri iea. Pali a Vure, i muholi hateka bara i kori e huriki i vulaki ria, re huriki ri galea vakaroro, na hatelanga, na malunga, na rodo. A taki muholi mua, bara i kori malaviriri ria. Pali na tahuna a Tuna Bakovi ge hamule valai na malala, ge matai ranga e huriki ri luhoi tora ia, o ge uka?”

A Bakovi ni Bole a Takis

E huriki ranga ri luhoi ta ria a viri kamumu, lakea ri biu e huriki ranga. Lakea e Isu i takia ne ria a nita vakakika iea, 10 “A bakovi ala rua ru sike na roho na Vure, ru gu vasileki. A Pariseo rua a bakovi ni bole a takis. 11 A Pariseo i pesi rike i vasileki mule vona, i ta maea, ‘Vure nau, a kavurike ioe a vuhuna iau i uka ma a manga e huriki a bakovi ranga ri rabalaki a viri, ri panaho a maki. Iau i uka ma a manga e huriki ri rata a naro hale, ri mole. Iau i uka ma a manga a bakovi iea, ra bakovi ni bole a takis. 12  b Iau a peremu balaka rua na vik i taku. A maki lobo nau a ru na naguna i ravulu, a habia vomu a tabekena i taku.’

13  c “Pali a bakovi ni bole a takis i pesi basi, i uka ma i mata sike na hunu. I dodo hateka vona a hini ia a bakovi hale. I maruhu hateka, i ta maea, ‘Vure nau, o dodo iau a bakovi hale.’

14  d “A taki mua, a Vure i puga vuroki a naro hale na bakovi ni bole a takis, pali a Pariseo iea, i uka ma i puga vuroki a naro hale vona, a vuhuna e rei a viri i bibi rike mule ia, a Vure bara i vakakirokoa. Pali e rei a viri i vakakiroko mule ia, a Vure bara i kavurikea.”

E Huriki a Koma Kiroko

(Mateo 19:13-15; Markus 10:13-16)

15 E huriki ri boko valai ne Isu e huriki a koma kiroko, ge padoi ria. Pali na tahuna e huriki a murimuri ri matai, ri tahate ria. 16 Pali e Isu i taki e huriki ri gi boko valai vona e huriki a koma nga, lakea i ta maea, “Naha ni hatekakari e huriki a koma. Mu taparaki ria ri gi valai nau, a vuhuna a harikianga na hunu ne vone ria e huriki a hulu nga. 17  e A taki muholi mua, e rei a viri i uka ma i ngaru a Harikianga na Vure ge manga e huriki a koma nga, i uka ma ge dili vona.”

A Bakovi na Mahala

(Mateo 19:16-30; Markus 10:17-31)

18  f Muri, a bakovi dagi tara i nanea e Isu i ta maea, “Mari ni tovo, o kamumu hateka. A ra maki ga ratea ga bole a nimahuri vakaroro?”

19 Lakea e Isu i koli, i ta maea, “I navai o taki iau a kamumu? I uka tara viri ge kamumu. A Vure kikeri kunana a viri i kamumu. 20  g O lohoka vona a vinara nga: naha ni mole, naha ni rabalaki a viri, naha ni panaho, naha ni padi virihi tavula a viri na ngava. O togo e tamamu e kinamu.”

21 Lakea i ta maea, “A vinara lobo nga a muri mai, a vakatubu na tahuna a kiroko vona.”

22 Na tahuna e Isu i longoa, i takia, “A maki tara i uka ma o ratea ma. O vano o habi a maki lobo vomu ni gi kona. O bole a mapana o habi ne huriki a matasia, bara o tahoka a mahala na hunu. Muri o valai o muri nau.”

23 Na tahuna i longoa a ngava iea, i dodo hateka, a vuhuna i tahoka a mahala i kupo. 24 Lakea e Isu i mata lakea vona i ta maea, “I madihi hateka na bakovi na mahala ge dili na harikianga na Vure! 25 Muholi hateka a kamel i keri ni dili na dupi na kavato. I mavonga kunana, a bakovi na mahala i uka ma ge dili na harikianga na Vure.”

26 E huriki ri longoa a ngava iea ri turutu, ri nana, “Pali e rei ngane ge bole a nimahuri vakaroro?”

27 Pali e Isu i koli, i ta maea, “A maki i keri e huriki a bakovi, a Vure i kara ge rata.”

28 Lakea e Petrus i ta rike, i ta maea, “Pali mia, mi pe pali a tanga ne mia, mi muri vomu!”

29 E Isu i koli i ta maea, “A taki muholi mua, e rei a viri i lohopile a tanga vona, e girihina, e turana, e tamana, e kinana, e huriki e tuna, ge longototo a Vure, 30 bara i bole tabu i kupo hateka koea na malala. Muri ma meli na hunu bara i mahuri vakaroro.”

E Isu i Taki Tabu a Matenga Vona

(Mateo 20:17-19; Markus 10:32-34)

31  h E Isu i tuli lakea na gaga a murimuri vona ala ravulu a polona i rua, i taki ria, i ta maea, “Ngane si gi sike o Ierusalem, lakea a ngava lobo e huriki a propet ri here puru virihi mai a Tuna Bakovi bara i bele muholi. 32  i Bara ni habi ia na limane huriki a bakovi i uka ma ria a Iuda. Bara ri padikedea, ri rata halea, ri kalupe tahoa, 33 ri hotua, muri bara ri rabalakia. Muri na parava i tolu, bara i pesi rike mule na matenga.”

34  j Pali e huriki a murimuri i uka ma ri longokilalea a ngavane Isu. A pelegona ngava ni ruhulolo ne ria, i uka ma ri longokilalea.

E Isu i Vakamatapara a Kepa

(Mateo 20:29-34; Markus 10:46-52)

35 E Isu i bele tabukoi o Ieriko. A bakovi tara, a kepa, i mamade na dahana dala, i nonongi a maki ne huriki. 36 Na tahuna i longo e huriki ala kupo ri laho polo, i nana ria vona a ra maki i bele. 37 Lakea e huriki ri takia ri ta maea, “E Isu o Nasaret i laho polo ngane.”

38 Lakea i gale tala, i ta maea, “Isu, Tune Davit, o dodo iau!”

39 E huriki ri laho muga ri tahatea, ri takia ge vulai. Pali i gale hateka tabu, i ta maea, “O Tune Davit, o dodo iau!”

40 Lakea e Isu i pesi tata, i taki e huriki ri gi tuli vilia vona a bakovi iea. Na tahuna i valai tabukoi, e Isu i nanea, 41 “A ra o ngarua ga ratea?”

I koli i ta maea, “Bakovi Dagi, a ngaru ni matapara.”

42 Lakea e Isu i takia, “O matapara. O tavaga ngane, a vuhuna o luhoi tora iau.” 43 I malaviriri kunana i matapara, i muri ne Isu i kavurikea a Vure. Na tahuna e huriki a bakovi a ngatavine ri masia a kepa iea i matapara, ria ranga ri kavurikea a Vure.

Copyright information for `BNP